މާލެ އާއި ހުޅުލެ ގުޅާލުމަށް އަޅާފައިވާ ސިނަމާލެ ބްރިޖަށް މާލެއިން އަރާ ތަނުގައި ހުންނަ ގޭޓު މަރާމާތުކޮށް އެ ތަނުގައި ވެރިކަންކުރާ ޕީއެންސީގެ ރަސްމީ ކުލަ ލައިފި އެވެ.

ބްރިޖު ގޭޓުގައި ހުންނަ އަކުރުތަކާއި ބޮކިތައް އާކޮށް އެތަނުގައި ޖަހާފައި ހުރި ދަބަރުތައް ކެހުމަށް މީގެ ދެތިން މަސްކުރިން މަސައްކަތް ފެށި އެވެ. އެގޮތުން އެތަނުގައި ކަޅުދާ ދަމައިގެން ފެށި އެ މަސައްކަތް މިހާރު ވަނީ ނިމެން ކައިރިވެފަ އެވެ.

މީގެ ކުރިން ގޭޓުގެ ނަން ހުންނަ ހިސާބުގައި ލާފައި ހުރީ ނޫ ކުލަޔާ ހިލާފަށް މިފަހަރު ލާފައިވަނީ ޕީއެންސީގެ ރަސްމީ ކުލަ ކަމަށްވާ ވިލުނޫ ކުލަ ނުވަތަ (Turquoise) އެވެ. ކުރިން ލާފައި ހުރީ އެއަށްވުރެ ގަދަ ނޫ ކުލައެކެވެ.

ބްރިޖުގެ މެއިންޓެނެންސް މަސައްކަތް ކުރަނީ ބްރިޖު އެޅުމުގެ މަޝްރޫއު ވެސް ހިންގި ޗައިނާ ކުންފުންޏެއް ކަމަށްވާ ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ ސެކަންޑް ހާބާ އިންޖީނިއަރިން ކޮމްޕެނީ ލިމިޓެޑް (ސީސީސީސީ އެސްއެޗްއީސީ) އިންނެވެ.

މީގެ ކުރިން ސިނަމާލެ ބްރިޖުގެ ގޭޓުގައި ލާފައި ހުރި ކުލަ -- ފޮޓޯ: އަދަދު

ބްރިޖުގެ މެއިންޓެނަންސް މަސައްކަތް މިހާރު ހަވާލުކޮށްފައި ވަނީ ތިން އަހަރަށެވެ.

ކޮންސްޓްރަކްޝަން މިނިސްޓްރީން ކުރިން ބުނީ ބްރިޖުގެ މެއިންޓެނަންސް މަސައްކަތް ޗައިނާ ކުންފުންޏާ ހަވާލުކުރާ މުއްދަތު ނިމުމުން އެކަމާ ހަވާލު ވެވޭނެ ފެންވަރަށް ދިވެހިން ބިނާކޮށް, ދެން އެ މަސައްކަތް ކުރިއަށް ދާނީ ދިވެހި ޓީމުގެ ބެލުމުގެ ދަށުން ކަމަށެވެ. އަދި ޓީމަށް ބޭނުންވާ ހުރިހާ ތަމްރީނުތައް ހިންގާނީ ސިނަމާލެ ބްރިޖު މެއިންޓެނަންސް މަސައްކަތްތައް ކުރުމުގެ ތެރެއިން ކަމަށް މިނިސްޓްރީން އޭރު ބުންޏެވެ.

މެއިންޓެނަންސް މަސައްކަތްތަކަށް ދިވެހިން ތަމްރީނު ކުރެވޭނީ ބްރިޖް އިންޖީނިއަރިން, ރޯޑް އިންޖީނިއަރިން, އިލެކްޓްރޯ މެކޭނިކަލް, ޓްރެފިކް ސޭފްޓީ, ފެސިލިޓީ ލޭންޑްސްކޭޕިން އަދި ބްރިޖު މެއިންޓެނަންސްގެ ދާއިރާތަކުންނެވެ.