ގާނޫނުއަސާސީއަށް ފަސޭހައިން ބަދަލުތައް ނުގެނެވޭ ގޮތް ހަދަން ޖެހޭ ކަމަށް ޖޭޕީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހިމް ވިދާޅުވެއްޖެ އެވެ.

ރާއްޖޭގައި މިހާރު އަމަލު ކުރާ ގާނޫނުއަސާސީ ތަސްދީގު ކުރިތާ މިއަދު 16 އަހަރު ފުރުމާ ގުޅިގެން ގާސިމް ވިދާޅުވީ، މިއަދަކީ ދައުލަތުގެ ބާރުތައް ވަކިވެ، ދިވެހިންނަށް އާސާސީ ހައްގުތަކާއި ޑިމޮކްރެޓިކް އުސޫލުތަކަށް މަގުފަހިވެގެން ދިޔަ ދުވަސް ކަމަށެވެ.

ގާސިމަކީ މިހާރު އަމަލުކުރާ ފެހި ގާނޫނު އަސާސީ އެކުލަވައިލި ހާއްސަ މަޖިލީހުގެ ދެވަނަ ރައީސެވެ. އޭނާ ވިދާޅުވީ ކުރިން އޮންނަ ގޮތުން ގާނޫނު އަސާސީއަށް ބަދަލުގެނެވެނީ ހާއްސަ މަޖިލިސް އެއްކޮށްގެން ކަމަށާއި އެކަން އެގޮތަށް އޮތުމަކީ މުހިންމު ކަމެއް ކަމަށެވެ.

"އެހެން ނޫނީވިއްޔާ، ވަރަށް ފަސޭހައިން 75 ޕަސެންޓު ރައްޔިތުންގެ މަޖިލީހުގެ ތިބި މެންބަރުންގެ އަދަދުން ލިބޭ ވޯޓަކުން ގާނޫނު އަސާސީ ބަދަލުކުރެވޭ ކަމަށް ވަންޏާ އޭގެ ހުރި ނުރަނގަޅު ކަންތައްތަކެއް ވެސް އަތުވެދާނެ. އެކަމާ މެދުގަ ވެސް ވިސްނާލަން ޖެހޭ،"

ފެހި ގާނޫނު އަސާސީއަށް 16 އަހަރު ތެރޭގައި ގެނެވިފައިވަނީ މަދު އިސްލާހުތަކެއް ކަމަށާއި ގާނޫނު އަސާސީއަށް އިސްލާހު ގެނައުމަށް މިހާރު މަޖިލީހަށް ލިބިދޭ ބާރުތައް ބަދަލުކުރަން ޖެހޭ ކަމަށް ވެސް ގާސިމް ވިދާޅުވި އެވެ.

"ގާނޫނު އަސާސީ އިސްލާހު ކުރުމަށްޓަކާ ރައްޔިތުންގެ މަޖިލީހަށް މިހާރު ލިބިފައިވާ ހުރިހާ ބާރުތަކެއް އެގޮތަށް އޮތުމުގެ ބަދަލުގައި ކޮންމެވެސް މެކޭނިޒަމެއް އެބަ ލާންޖެހެއޭ އަޅުގަނޑުމެން އެގޮތަށް އެހާ ފަސޭހައިން ބަދަލު ނުކުރެވޭނެ މެކޭނިޒަމެއް،" މި ސަރުކާރާއެކު މަސައްކަތް ކުރައްވަމުން ގެންދަވާ ގާސިމް ވިދާޅުވި އެވެ.

އެކަން އެހެން ކުރަން ޖެހެނީ ބައެއްގެ ވިސްނުމަށް އަންނަ ހިޔާލާތެއްގެ ސަބަބުން ރައްޔިތުންގެ އަސާސީ ހައްގުތަކާއި އިސްލާމް ދީން ހިމާޔަތް ކުރުމަށް ގާނޫނު އަސާސީގައި ހިމަނާފައިވާ މާއްދާތަކަށް ހުރަސް އެޅިދާނެތީ ކަމަށެވެ.

ގާސިމް މިފަދައިން ވާހަކަދެއްކެވިއިރު މީގެ ކުރިންވެސް ވެރިކަންކުރާ ޕީއެންސީގެ މަޖިލިސް މެންބަރުން ވަނީ ގާނޫނު އަސާސީއަށް ބަދަލު ގެނައުމުގެ ކަންކަން ހަރުކަށިކޮށް، ގާނޫނު އަސާސީގައި "ތަޅު އަޅުވަން" ޖެހޭ ކަމަށް ވިދާޅުވެފަ އެވެ.

ނަމަވެސް، މި ސަރުކާރުގެ ލެޖިސްލޭޓިވް އެޖެންޑާގައިވެސް ގާނޫނު އަސާސީއަށް ބަދަލުގެނައުން ހިމަނާފައިވެ އެވެ. ގެންނަން ކަނޑައަޅާ ތަފުސީލެއް ސަރުކާރުން އަދި ހާމައެއް ނުކުރެ އެވެ.

މިހާރު އަމަލުކުރަމުން އަންނަ ގާނޫނުއަސާސީއަކީ، ގާނޫނުއަސާސީ އިސްލާހުކުރުމުގެ މަސައްކަތެއްގެ ގޮތުގައި ފެށި މަސައްކަތެއްގެ ނަތީޖާއެވެ. އިސްލާހުކުރުމުގެ ނަމުގައި މުޅިން އާ ގާނޫނުއަސާސިއެއް އެކުލަވައިލައި ނިމި، މި ގާނޫނު އަސާސީ ތަސްދީގުކުރީ 2008، އޮގަސްޓް 7، ގަ އެވެ.

އޭރުގެ ރައީސް މައުމޫނު އަބްދުލްގައްޔޫމު މި ގާނޫނުއަސާސީ ތަސްދީގުކުރެއްވީ އެކަން ނުކުރައްވައި ލަސްކުރައްވާތީ އޭރުގެ އިދިކޮޅު ފަރާތްތަކުން ރިޔާސީ ގަނޑުވަރުގެ ކައިރިއަށް އެއްވެ މުޒާހަރާތައް ވެސް ކުރި ފަހުންނެވެ.