ހަރުކަށި ފިކުރާއި ޓެރަރިޒަމާ ދެކޮޅަށް ކުރެވޭ މަސައްކަތްތަކާ ގުޅޭގޮތުން މަޝްވަރާ ކުރުމަށް ޑިފެންސް މިނިސްޓްރީން އިސްނަގައިގެން ފޯރަމެއް ފަށައިފި އެވެ.

"ޔުނައިޓެޑު ފޯ އަ ޕީސްފުލް އެންޑް ރެސިލިއަންޓު މޯލްޑިވްސް" ގެ ނަމުގައި ދެ ދުވަހުގެ މުއްދަތައް ކުރިއަށް ގެންދާ މި މަޝްވަރާތައް ފަށާފައިވަނީ މިއަދެވެ. މަޝްވަރާތައް ލީޑުކުރައްވަނީ ދިފާއީ ވަޒީރު ގައްސާން މައުމޫނެވެ.

އޭނާގެ އިތުރުން ވެސް އެ މިނިސްޓްރީގެ އިސް އޮފިޝަލުން މި ފޯރަމުގައި ބައިވެރިވެ އެވެ. ޑިފެންސުގެ އިތުރުން ޕްރޮސެކިއުޓާ ޖެނެރަލް ހުސެއިން ޝަމީމް އަދި ހޯމް މިނިސްޓްރީ އާއި އެމްއެންޑީއެފް އަދި ކައުންޓާ ޓެރަރިޒަމް ސެންޓަރުގެ އިސް ފަރާތްތަކުން މަޝްވަރާތަކުގައި ބައިވެރިވެ އެވެ.

މި ފޯރަމާ ގުޅިގެން ޑިފެންސުން ސޯޝަލް މީޑިއާގައި ކުރި ޕޯސްޓެއްގައި ބުނީ ދެ ދުވަހުގެ ތެރޭގައި އެއް އިދާރާއަކުން ޓެރަރިޒަމާ ދެކޮޅަށް ކުރެވޭ މަސައްކަތްތަކުގެ މައުލޫމާތު އެހެން ފަރާތްތަކާ ހިއްސާކުރުމަޢި ސިޔާސަތު އެކުލަވާލުމުގެ މަޝްވަރާތައް ކުރެވޭނެ ކަމަށެވެ.

އޭގެ އިތުރުން، ރާއްޖެ އާއި ބައިނަލްއަގުވާމީ އިދާރާތަކުން އެކުގައި މަސައްކަތް ކޮށް ހަރުކަށި ފިކުރާ ދެކޮޅު އަދި އެފަދަ ފިކުރުތަކާ ދެކޮޅަށް މަސައްކަތް ކުރާނެ މުޖުތަމައެއް ބިނާކުރުމަށް ކުރެވެން ހުރި ކަންކަން މި ފޯރަމުގައި ދެނެގަންނާނެ ކަމަށް ވެސް ޑިފެންސުން ބުންޏެވެ.