ކުއްލި އާއިލީ ކަމެއް ދިމާވެގެން ކަމަށް ވިދާޅުވެ ރައްޔިތުންގެ މަޖިލީހަށް މިއަދު ހާޒިރުވާން އުޒުރުވެރިވެޑައިގެންނެވި ނަމަވެސް ހައުސިން މިނިސްޓަރު ޑރ. އަލީ ހައިދަރު އަހުމަދު މިއަދުވެސް އޮފީހަށް ނުކުމެވަޑައިގެންފި އެވެ.

މިއަދު މަޖިލީހުގެ ޖަލްސާއަށް ހައިދަރު ހާޒިރުވާން އެންގީ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް، ކުރީ ސަރުކާރުން މާލެ ސަރަަހައްދުގައި ފެށި ގެދޮވެރިޔާ އަދި ބިންވެރިޔާ ސްކީމުގެ އަދާހަމަ ހޯދުމަށް ކުރި ސުވާލަކަށް ޖަވާބު ދިނުމަށެވެ.

ނަމަވެސް، "ކުއްލި، އާއިލީ ކަމެއް" ދިމާވެގެން ހައިދަރަށް މިއަދު މަޖިލީހަށް ވަޑައިގެންނެވެން ނެތް ކަމަށް އަންގަވާފައިވާ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވި އެވެ.

މިނިސްޓަރު މިއަދު އޮފީހަށް ހާޒިރުވިތޯ މި ނޫހުން އެހުމުން، އެ މިނިސްޓްރީގެ އިންފޮމޭޝަން އޮފިސަރު ވަނީ ހައިދަރު އޮފީހަށް ނުކުންނެވި ކަމަށް ވިދާޅުވެފަ އެވެ. މަޖިލީހުގެ ޖަލްސާ ފެށީ 9:00 ގަ އެވެ. ހައިދަރު އޮފީހުގައި ހުންނެވި ކަމަށް މިނިސްޓްރީން މައުލޫމާތު ދިނީ 9:15 ގަ އެވެ.

ގާނޫނުއަސާސީގެ 98 ވަނަ މާއްދާގެ ހ. ގައި ބުނެފައިވާ ގޮތުން ވަޒީރުންގެ މަޖިލީހުގެ މެންބަރުން މަޖިލީހަށް ހާޒިރު ކުރުމަކީ އެ މަޖިލީހަށް ލިބިގެންވާ ބާރެކެވެ.

"ވަޒީރުންގެ މަޖިލީހުގެ މެންބަރަކު ނުވަތަ ސަރުކާރުގެ އެހެންވެސް މަގާމެއްގައި ހުރި މީހަކު ރައްޔިތުންގެ މަޖިލީހަށް ހާޒިރުވުމަށާއި، އެ މީހަކު އަދާކުރާންޖެހޭ ޒިންމާއާއި މަސްއޫލިއްޔަތާ ގުޅޭ ގޮތުން ރައްޔިތުންގެ މަޖިލީހުން ކަނޑައަޅާ ގޮތެއްގެ މަތިން، އެ މީހަކާ ކުރެވޭ ސުވާލުތަކަށް ތެދުބަހުން ޖަވާބު ދިނުމަށާއި، އެ މީހަކު އަދާކުރާންޖެހޭ ޒިންމާތަކާއި މަސްއޫލިއްޔަތުތަކާ ގުޅޭ ގޮތުން ރައްޔިތުންގެ މަޖިލީހުން ބޭނުންވާ ކޮންމެ ލިޔުމެއް ހުށަހެޅުމަށް ރައްޔިތުންގެ މަޖިލީހުން އެ މީހަކަށް އެންގިދާނެ،" އެ މާއްދާގައި ބުނެފައިވެ އެވެ.

އެ ބާރުގެ ދަށުން މަޖިލީހުން މަޖިލީހުގައި އަމަލުކުރާ އުސޫލަކީ މެންބަރަކު މިނިސްޓަރަކާ ސުވާލެއް ކުރައްވާ ނަަމަ، މަޖިލީހުގެ އިދާރާއިން އެ ސުވާލު، މިނިސްޓަރަށް ލިޔުމުން ފޮނުއްވައި، ޖަވާބުދެއްވަން ތައްޔާރުވެވަޑައިގެންނެވުމަށް 14 ދުވަހުގެ މުހުލަތެއް ދިނުމަށް ފަހު ޖަވާބު ދެއްވަން އެޖެންޑާ ކުރުމެވެ.

މިއަދުގެ މަޖިލީހުގައި ހައިދަރަށް އަމާޒު ކުރަން ބޭނުންވި ސުވާލުތަކުގެ ތެރޭގައި ބިންވެރިޔާ ސްކީމުގެ ދަށުން ދޫކުރި ގޯތިތައް ދޫކުރަން ފެށޭނެ ތާރިހަކާއި ގެދޮރުވެރިޔާ ސްކީމުގެ ދަށުން ދޫކުރި 4،000 ފުލެޓު ދޫކުރުމުގެ އަދާހަމަ ހޯދުން ހިމެނެ އެވެ.

މި މައްސަލާގައި މަޖިލީހުގެ ޕެޓިޝަން ކޮމެޓީއަށް ހާޒިރުކުރުމުން ހައުސިން މިނިސްޓްރީން މަސައްކަތް ކުރަމުން ދަނީ ގެދޮރުވެރިޔާ ސްކީމުގެ ދަށުން ދޫކުރުމަށް އަޅަމުން ދާ އިމާރާތްތަކުގެ މަސައްކަތްތައް ނިމުމުގެ ކުރިން ފުލެޓު ލިބޭ މީހުންގެ ފައިނަލް ލިސްޓެއް އެކުލަވައިލެވޭތޯ ކަމަށެވެ.

"އިމާރާތްކޮށް ނިމެންވާއިރަށް އަޅުގަނޑުމެން ހުރިހާ، ހޮވޭ ފަރާތްތައް އިއުލާނުކޮށް ފައިނަލް ލިސްޓު ގެޒެޓު ކުރާނަމޭ އިނގޭތޯ، އަޅުގަނޑަށް އެނގިފައިވާ ގޮތުގައި 32 ޓަވަރުގެ ތެރެއިން ފުރަތަމަ ހަ ޓަވަރު ނިމޭނީ އޮކްޓޯބަރު މަސް ނިމޭހައި ތަނަށް އަޅުގަނޑުމެން ފައިނަލް ލިސްޓު އާންމު ކުރާނަން،" ހައިދަރު އެ ދުވަހު ވިދާޅުވި އެވެ.

ގެދޮރުވެރިޔާ ސްކީމުގެ ދަށުން މިދިޔަ ސަރުކާރުން އިއުލާނު ކުރި ފުލެޓު ލިސްޓުގައި ހިމެނޭ މައްސަލައެއް ނެތް މީހުންނަށް ވީހާވެސް އަވަހަކަށް ފުލެޓު ދިނުމަށް މާލެ ސިޓީ ކައުންސިލުން މީގެ ދެ ހަފުތާ ކުރިން ވަނީ ހައުސިން މިނިސްޓަރީއަށް ލަފާ ދީފަ އެވެ.

މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފުލެޓު ދިނުމަށެވެ. ނަމަވެސް އެ ވެރިކަން ނިމުނުއިރު، ކޮންޓްރެކްޓު ކޮށް، މަސައްކަތް ފަށާފައި ވަނީ 4000 ފުލެއްޓެއްގެ އެވެ.