ޓިއުރިން (އޮގަސްޓް 4) - ޔުވެންޓަސް އަށް ކުޅެމުން އަންނަ އިޓަލީ ގައުމީ ޓީމުގެ ވިންގް، ފެޑެރީކޯ ކިއޭސާ، އެ ޓީމުން ވިއްކާލާ ކުޅުންތެރިންގެ ލިސްޓުގައި ހިމަނައިފި އެވެ.

ކިއޭސާ، 26، ގެ ކަކުލަށް މީގެ އަހަރެއް ކުރިން، ލިބުނު އަނިޔާ އަކާ ހެދި ކުޅުމާ ދުރުގައި ވެސް އަހަރެއްހާ ދުވަހު ހުންނަންް ޖެހުނެވެ.

އިޓަލީން 2020 ޔޫރޯ ކާމިޔާބުކުރިއިރު ތަފާތު ދެއްކި ކިއޭސާ، އަލުން ކުޅުމަށް އެނބުރި އައިސް، ކުރިން ދައްކަމުން އައި ލެވަލްގެ ކުޅުމެއް ދެއްކިފައިނުވެ އެވެ. ޔުވެންޓަސްގައި ކިއޭސާގެ މުސްތަގުބަލާ މެދު ވެސް އޮތީ ސުވާލު އުފެދިފަ އެވެ.

ޔުވެންޓަސްއާ ހަވާލުވި އާ ކޯޗު ތިއާގޯ މޮޓާ ވަނީ، އެންމެ ފަހުން ކުޅުނު ޕްރީ ސީޒަން މެޗުގެ ސްކޮޑުގައި ކިއޭސާ ނެތީ، އޭނާ އަކީ ޓީމުގެ ކުރިއަށް އޮތް ޕްލޭނުގައި ނުހިމެނޭ ކުޅުންތެރިއެއް ކަމަށް ވުމުންކަން ހާމަކޮށްފަ އެވެ.

އަންނަ އަހަރުގެ ޖޫން މަހުގެ ނިޔަލަށް ޔުވެންޓްސްއާ އެކު ކޮންޓްރެކްޓް ހަދާފައިވާ ކިއޭސާ އަށް އިނގިރޭސި ދެ ކްލަބެއްގެ ޝައުގުވެރިކަން އެބަހުއްޓެވެ. އޭގެ ތެރެއިން، ކިއޭސާ އަށް ބިޑްކުރާނެ ކަމަށް ބެލެވެނީ، އިންގްލެންޑްގެ ޓޮޓެންހަމް ހޮޓްސްޕާސް އިން ކަމަށް ރިޕޯޓްތައް ބުނެ އެވެ.

ކިއޭސާ ވިއްކާލަން ޔުވެންޓަސް އިން 30 މިލިއަން ޑޮލަރުގެ ފީ އަކަށް ޑިމާންޑްކުރާނެ ކަމަށް ރިޕޯޓްތައް ބުނެ އެެވެ.

އިޓަލީގެ މީިޑިއާ ރިޕޯޓްތައް ބުނާގޮތުން، ކިއޭސާ އަށް ސައުދީ ޕްރޮފެޝަނަލް ލީގު (ޕްރޯ ލީގުގެ) ކްލަބަކުން އޮފާއެއް ލިބުނަސް އެ ގަބޫލުކުރަން ކިއޭސާ ބޭނުމެއް ނުވެ އެވެ. ސަބަބަކީ، ޔޫރަޕްގައި ފުޓްބޯޅަ ކެރިއަރު ކުރިއަށްގެންދަން ބޭނުންވުމެވެ.

ޖަރުމަނުގައި މި ފަހަރު ކުރިއަށްދިޔަ ޔޫރޯ ފުޓްބޯޅަ މުބާރާތުގައި ކިއޭސާ ވަނީ އިޓަލީ ގައުމީ ޓީމަށް ކުޅެފަ އެވެ. ކިއޭސާ އަށް އިޓަލީގެ ޓީމެއްގެ އޮފާ ލިބުނަސް، ޔުވެންޓަސް އިން އެ ޑީލް ކުރިއަށްގެންދާނެ ކަމަށް ނުބެލެވެ އެވެ.