ގދ. ތިނަދޫގައި މުޒާހަރާ ކުރުމުން އެއީ ވިސާގެ ޝަރުތަކާ ހިލާފުވުން ކަމަށް ކަނޑައަޅައި ޑީޕޯޓްކުރުމަށް ސަރުކާރުން ނިންމާފައިވާ ބިދޭސީން އަދި ތިބީ އެ ރަށުގައި ކަމަށް ހޯމް މިނިސްޓްރީން މިއަދު ބުނެފި އެވެ.

ބަންގްލަދޭޝްގައި މިހާރު ހިނގަމުންދާ ހަމަނުޖެހުންތަކާ ދެކޮޅަށް އަޑު އުފުލުމަށް އެ ރަށުގެ ދާރުލްއާސާރު ކުރިމަތީ އެއްވި ބިދޭސީން ޑިޕޯޓްކުރަން ނިންމީ މީގެ ތިން ހަފުތާއެއް ކުރިންނެވެ. މިދިޔަ ހަފުތާގައި އެ މައްސަލަ އެޗްއާރުސީއެމުން ބަލަން ވެސް ފެށި އެވެ.

އިމިގްރޭޝަންގެ ކޮންޓްރޯލާ ޖެނެރަލް ޝައްމާން ވަހީދު "ސަންގުޓީވީ" ޕްރޮގްރާމެއްގައި ބައިވެރިވެވަޑައިގެން ރޭ ވިދާޅުވީ އެ ބިދޭސީން އަދި އިމިގްރޭޝަނާ ހަވާލުކޮށްފައި ނުވާ ކަމަށެވެ. އިމިގްރޭޝަންގެ ބެލުމުގެ ދަށަށް އައުމުން ރާއްޖޭން ބޭރު ކުރުމުގެ މަސައްކަތް ފަށާނެ ކަމަށް އޭނާ ވިދާޅުވި އެވެ.

އޭގެ ތަފުސީލު ހޯދަން ސުވާލު ކުރުމުން ހޯމް މިނިސްޓްރީގެ ތަރުޖަމާނު ފާތިމަތު ރިފާއަތު ފޮނުވި ޓެކްސްޓް މެސެޖެއްގައި ވިދާޅުވީ އެ ބިދޭސީން އަދި ތިބީ ތިނަދޫގައި ކަމަށެވެ. އަދި އެ ބިދޭސީން ތިބީ ބަންދެއްގައި ނޫން ކަމަށް ވެސް އޭނާ ވިދާޅުވި އެވެ.

"އެ މީހުން މާލެ ގެންނަން އިންތިޒާމު ކުރަން ޖެހޭ ކަންކަން އިންތިމާޒުކޮށްފައި ކުރިއަށް ގެންދާނެ،" އޭނާ ވިދާޅުވި އެވެ.

އެޗްއާރުސީއެމުން މި މައްސަލަ ބަލަން ފެށީ މުޒާހަރާ ކުރުމާއި އަޑުއުފުލުމަށް ސުލްހަވެރިކަމާއެކު އެއްވެ އުޅުމަކީ ހައްގަކަށްވާތީ ކަމަށް އެ ކޮމިޝަނުން ބުނެފައިވެ އެވެ.

ރާއްޖެއިން ސޮއި ކޮށްފައިވާ އދ. ގެ އިންސާނީ ހައްގުތަކުގެ އާންމު ގަރާރު، އައިސީސީޕީއާރުގެ 21 ވަނަ މާއްދާގައި ބުނަނީ ބިދޭސީން ހިމެނޭހެން ހުރިހާ އެންމެންނަށް ސުލްހަވެރިކަމާ އެކު މުޒާހަރާ ކުރުމުގެ ހައްގު ކަށަވަރު ކޮށްދޭން ޖެހޭ ކަމަށެވެ.

މި މައްސަލާގައި ޓްރާންސްޕޭރެންސީ މޯލްޑިވްސް އިން ވެސް ކަންބޮޑުވުން ފާޅުކޮށްފައިވެ އެވެ. ޓްރާންސްޕޭރެންސީން ގޮވާލީ ހޯމް މިނިސްޓްރީގެ ނިންމުން ބާތިލުކުރުމަށެވެ.

އަދި ހުރިހާ ބިދޭސީ މަސައްކަތްތެރިންނާއި އެ މީހުންގެ އާއިލާތަކުގެ މެންބަރުންގެ ހައްގުތައްް ހިމާޔަތްކުރުމާބެހޭ ބައިނަލްއަގްވާމީީ މުއާހަދާގައި ބައިވެރިވެ އެއަށް ޢަމަލުކުރުމަށާއި ބިދޭސީންނަށް އަޅާ ފިޔަވަޅުތަކާއި ތަފާތުކުރުންތައް ހުއްޓާލުމަށް އެ ޖަމިއްޔާއިން ގޮވާލާފައި ވެ އެވެ.