އީރާނުގައި ހުންނަވަނިކޮށް ހަމާސްގެ ޕޮލިޓިކަލް ޗީފް، އިސްމާއިލް ހަނިއްޔާ ޝަހީދުކޮށްލި މައްސަލަ ދުނިޔޭގެ ބޮޑެތި ގައުމުތަކުން ކުށްވެރި ކޮށްފި އެވެ. ނަމަވެސް އެ ގަތުލަށް ހަ ގަޑިއިރަށްވުރ ގިނައިރު ވެގެންދިޔައިރު ވެސް ރާއްޖެއިން އަދިވެސް އެކަމުގައި ބަހެއް ނުބުނެ އެވެ.

ހަނިއްޔާ ޝަހީދުކޮށްލާފައި ވަނީ އިރާނުގެ އައު ރައީސް ހުވާ ކުރެއްވުމުގެ ރަސްމިއްޔާތަށް އެގައުމުގެ ވެރި ރަށް، ތެހެރާނަށް ވަޑައިގެން ހުންނަވަނިކޮށް ރޭ ފަތިހު އެވެ. ހަނިއްޔެ ޝަހީދުކޮށްލި ހަމަލާ ދީފައި ވަނީ އޭނާ ހުންނެވި އިމާރާތަށް ދިން ހަމަލާއެއްގަ އެވެ. އެ ހަމަލާގައި ހަނިއްޔާގެ ބޮޑީ ގާޑެއް ވެސް ޝަހީދުފައިވެ އެވެ.

ހަނިއްޔާ އަށް ދިން ހަމަލާގެ ޒިންމާ އަދި އެއްވެސް ފަރާތަކުން އުފުލައިފައެއް ނުވެ އެވެ. ނަމަވެސް އެއީ އިޒްރޭލުން ދިން ހަމަލާއެއް ކަމަށް ހަމާސްއިން ވަނީ ތުހުމަތުކޮށްފަ އެވެ. ހަމަލާ އާ ގުޅިގެން އިރާނުގެ ރިވޮލިއުޝަނަރީ ގާޑުން ބުނެފައި ވަނީ އެ މައްސަލަ ތަހުގީގު ކުރަމުންދާ ކަމަށާއި ވަރަށް އަވަހަށް އެ ހަމަލާ ދިން ގޮތާ ގުޅޭ މައުލޫމާތު އާންމު ކުރާނެ ކަމަށެވެ.

އެ ހަމަލާ ކުށްވެރިކޮށް ޗައިނާ އާއި ރަޝިޔާ އަދި ރާއްޖޭގެ ސަރުކާރާ ގާތް ގުޅުމެއް އޮންނަ ތުރުކީން ވެސް ބަސް ބުނެފައިވެ އެވެ.

އޭގެއިތުރުން ގަތަރާއި އިރާނާއި މެލޭޝިޔާގެ އިތުރުން ޔަމަނުން ވެސް ހަނިއްޔާ އަށް ދިން ހަމަލާ ކުށްވެރިކޮށްފައިވެ އެވެ.

އެ ހަމަލާ އާ ގުޅޭގޮތުން ރާއްޖެއިން މިހައިތަނަށް އެއްވެސް އެއްޗެއް ބުނެފައެއް ނުވެ އެވެ.

ނަމަވެސް ރައީސް ޑރ. މުހައްމަދު މުއިއްޒު މީގެ ކުރިން ވަނީ "ފަލަސްތީނުގެ ހައްގުގައި، ބައިނަލް އަގުވާމީ މައިދާނުގައި ކުރެވޭ ކޮންމެ ކަމެއްގައި ރާއްޖޭން ބައިވެރިވެ ދެމިއޮންނާނެ،" ކަމަށް މެއި، 20 ގައި އެކްސްގައި ކުރެއްވި ޕޯސްޓެއްގައި ވިދާޅުވެފަ އެވެ.

ހަނިއްޔާ އަށް ދިން ހަމަލާ އާ ގުޅޭގޮތުން ރާއްޖެއިން ބަހެއް ނުބުނާތީ އެކަމަށް ފާޑުކިޔައި ބައެއް މީހުން އަންނަނީ ސޯޝަލްމީޑިއާގައި ފާޑު ވެސް ކިޔަމުންނެވެ.