އައްޑޫ ސިޓީ ހިތަދޫގައި އަންހެނަކު ބަރަހަނާކޮށް ހުއްޓައި ކޮޓަރިއެއްގެ ދޮރު ވައްޓާލައިފައި ފުލުހުން ވަދެގަތް މައްސަލައެއް އިއްޔެ ފެންމަތިވެއްޖެ އެވެ.

ފުލުހުން ހިންގި ޑްރަގު އޮޕަރޭޝަނެއްގައި ގެއެއް ރެއިޑްކުރީ ކޯޓު އަމުރެއްގެ ދަށުން މީހަކު ހައްޔަރުކުރަން ނަމަވެސް، އެ އަމުރުގައިވާ ފަރާތް އެ ގޭގައި އެ ވަގުތު ނެތެވެ. އެހެންވެ އޭނާ ހައްޔަރެއް ނުކުރެ އެވެ.

ބަލައި ފާސްކުރި ގޭގައި ކުއްޔަށް އުޅެމުންދާ އިބްރާހިމް ސާއިމް "އަދަދު" އާ ވާހަކަ ދައްކަމުން ބުނީ ތިން ކޮޓަރި ހުންނަ އެ ގެ ރެއިޑްކުރިއިރު އެ ގޭގައި އެވަގުތު ތިބީ އޭނާގެ 19 އަހަރުގެ އަންހެނުންނާއި އަހަރެއް ނުވާ ތުއްތު ކުއްޖެއް ކަމަށާއި އަންހެނުން ފެންވަރަން ހުއްޓައި އެ ކޮޓަރީގެ ދޮރު ވައްޓާލައި ފުލުހުން ވަތް ކަމަށެވެ.

"ބޭރު ދޮރު ތަޅާ އަޑުއިވުނު ކަމަށް އަންހެނުން ބުނޭ. އަންހެނުން ހީކުރީ ފުރަތަމަ އޭނާ (ސާއިމް) ގެއަށް އައި ކަމަށް. ނަމަވެސް ބޭރު ދޮރު ވައްޓާލި ގޮތަށް ވަދެ ކޮޓަރި ދޮރުގައި ނޮކް ވެސް ނުކޮށް ފުނޑާލާފައި ވައްޓާލީ," އޭނާ ބުންޏެވެ.

"އެ މީހުން ވަތް ގަޑީގައި އަންހެނުން ހުރީ ފެންވަރަން. ފާހާނާ ދޮރު ހުރީ ކޮޓަރި ތަޅުލާފައި ހުރުމުން ތަޅު ނުލައި. ވަންނަ ދޮރު ކައިރީ ފާހާނާ ހުރީ. އަންހެން ފުލުހެއް ވެސް ނެތް. އަންހެނުން ވަރަށް ޕެނިކްވި އެ ގަޑީގައި އެކަހަލަ ކަމެއް އަލަށް ދިމާވުމުން. އަޅުގަނޑު ހުރީ ޑިއުޓީގައި އެ ވަގުތު."

ފުލުހުން ވަދެގަތް ވަގުތު ހަލާކުކޮށްލާފައިވާ ދޮރުތައް. ބޭރު ދޮރު އަދި ކޮޓަރި ދޮރު ވެސް ވަނީ ވައްޓާލާފައި

އައުރަ ނިވާކުރަން އަންހެނުން ފޮތިގަނޑެއް ގައިގައި އޮޅައި ނިކުންނަން އެންގުމުން، ފުލުހުން ނިކުމެފައި ނުވާ ކަމަށާއި އެއްޗެއް ފޮރުވަނީ ކަމަށް ތުހުމަތުކޮށް ދޮރު ކައިރީގައި ހެދުން ބަދަލުކުރި އިރު ވެސް ފުލުހުން ތިބި ކަމަށް ވެސް ސާއިމް ބުންޏެވެ.

ފުލުހުން އަމަލުކުރި ގޮތާ މެދު ކަންބޮޑުވެ، ސާއިމް ބުނީ ގެއިން އެއްވެސް އެއްޗެއް ފުލުހުންނަށް ފެނިފައި ނުވާ ކަމަށާއި ރެއިޑްކުރިއިރު ތަޅުލާފައި އިން ދެ ދޮރު ވައްޓާލުމުގެ އިތުރުން ތަޅުނުލާ ހުރި ތުއްތު ކުއްޖާ އޮތް ކޮޓަރިއަށް ވެސް ފުލުހުން ވަދެފައިވާ ކަމަށެވެ.

މުޅި އޮޕަރޭޝަންގައި 18 ވަރަކަށް ފުލުހުން ހަރަކާތްތެރިވެފައިވާ ކަމަށާއި އެތަނަށް އަންހެން ފުލުހެއް ދިޔައީ ވެސް ހުރިހާ ކަމެއް ނިމުނު ފަހުންކަން އޭނާ ފާހަގަކުރި އެވެ.

މި މައްސަލައާ ގުޅިގެން ފުލުހުންނާ ސުވާލުކުރުމުން ފުލުހުންގެ މީޑިއާ އޮފިޝަލް "އަދަދު" އަށް ބުނީ ތަހުގީގު ކުރަމުންދާ މައްސަލައަކާ ގުޅިގެން އިއްޔެ ހިތަދޫ ގެއެއް ބަލައި ފާސްކުރި ކަމަށާއި އެ އޮޕަރޭޝަންގައި ފުލުހުން ބޮޑީވޯން ކެމެރާ ބޭނުން ނުކުރާ ކަމަށެވެ. އެކަމާ ގުޅޭ އިތުރު ތަފްސީލެއް ފުލުހުން ނުދެ އެވެ.

"ފުލުހުން އައްޑޫ ސިޓީ ގައި އޮޕަރޭޝަނެއް ހިންގި. ނަމަވެސް އާޓިކަލްގައި ލިޔެފައިވާ ފަދަ ކަމެއް ދިމައެއް ނުވޭ. އަދި އެފަދަ މަންޒަރެއް ފުލުހުން ރިކޯޑު ކޮށްފައި ނުވާނެ ވާހަކަ ވެސް ދަންނަވަން," މި ހަބަރު ޝާއިއުކުރި ފަހުން ފުލުހުންގެ ތަރުޖަމާނު އަހްމަދު ޝިފާން އެކްސްގައި ވިދާޅުވި އެވެ.

އޭނާ ބުނީ މި މައްސަލަ ކަމާ ބެހޭ ފަރާތްތަކަށް ހުށަހަޅާނެ ކަމަށާއި އަންހެނުންނަށް މިކަމުގެ ސަބަބުން ނަފްސާނީ ގޮތުން ވަރަށް ބޮޑަށް އަސަރު ކޮށްފައިވާ ކަމަށާއި އެ ގޭގައި ހުރި ތުއްތު ކުއްޖާއަށް ވެސް އޭގެ ސަބަބުން އަސަރުކޮށްފައިވާ ކަމަށެވެ.

ފުލުހުންގެ އޮޕަރޭޝަންތަކުގައި މިފަދަ ކަންތައްތައް ހިނގުން ދަނީ އިތުރުވަމުންނެވެ. އެގޮތުން ފުލުހުންގެ އޮޕަރޭޝަންތަކުގައި ހިނގާފައިވާ އިހުމާލުގެ މައްސަލަތައް މިހާރު ވެސް ކަމާބެހޭ ފަރާތްތަކުން އަންނަނީ ތަހުގީގު ކުރަމުންނެވެ.