ގައުމު އިސްލާހު ކުރުމަށްޓަކައި މީގެ ކުރިން އެހެން ވެރިޔަކަށް ކުރައްވަން ކެރިވަަޑައިނުގަތް އެތައް ކަމެއް ރައީސް ޑރ. މުހައްމަދު މުއިއްޒު ކުރިއަށް ގެންދަވާ ކަމަށް، ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމް މިރޭ ވިދާޅުވެއްޖެ އެވެ.

ޕީއެންސީގެ ހަރުގޭގައި ބޭއްވި ޖަލްސާގަިއ ނާޒިމް ވަނީ، މިނިވަން ދުވަހުގެ ޖަލްސާގައި ރައީސް މުއިއްޒު ގައުމު އިސްލާހުކުރުރެއްވުމަށްޓަކައި ކުރައްސަވާލަ ދެއްވި ކަންކަމަށް ތައުރީފު ކުރައްވައިފަ އެވެ. ރައީސްގެ ވާހަކައިން އެންމެ ބޮޑަށް ފާހަގަވީ އިސްލާހަށްޓަކައި ނުކުރާނެ އެއްވެސް ކަމެއް ނުބާއްވާނެ ކަމަށް ވިދާޅުވި ވާހަކަ އެވެ.

"އިސްލާހުކުރަންޖެހޭ ކޮންމެ ކަމެއް ކަމަށް ވިޔަސް އެކަމެއް އިސްލާހު ކުރައްވާނެކަން އަޅުގަނޑުމެންނަށް ޔަގީންވެގެން ދިޔަ. އަދި އަތް ނުލެވޭނެ އެއްވެސް މީހަކު ނުހުންނާނެކަން އަޅުގަނޑުމެންނަށް ޔަގީންވެގެން ދިޔަ. އެގޮތުން މިހާރު ފެށިގެން ހިނގަމުންދާ އިސްލާހީ ކަންކަމުގެ ތެރޭގައި މީގެ ކުރީގައި ގައުމުގައި އިސްލާހު ނުވެ ހުރި ކަންކަމުގެ ތެރެއިން ހަމަ އެއްގޮތަކަށް ވެސް އެއްވެސް ވެރިކަމެއްގައި ކުރަން ނުކުރެނު އެތައް ކަމެއް އެ ގެންދަވަނީ ކުރައްވަމުން،" ނާޒިމް ވިދާޅުވި އެވެ.

އެ އިސްލާހުތަކުގެ ތެރޭގައި ބިދޭސީންގެ މައްސަލަ އާއި ގޭންގު ކުށްތައް މަދުކުރުން ފާހަގަ ކުރެއްވި އެވެ. އަދި ޖުޑިޝަރީ އިސްލާހު ކުރުމުގެ ފިޔަވަޅުތައް ވެސް ނާޒިމް ވިދާޅުވި އެވެ.

މި ވެރިކަމުގައި ޖުޑިޝަރީ އިސްލާހުކުރުމަށްޓަކައި ފަށާ އެންމެ ބިޔަ މަޝްރޫއަކީ ކޯޓު ކޮމްޕްލެކްސް އެޅުން ކަމާއި އެ މަސައްކަތް އަންނަ އަހަރު ފެށޭނެ ކަމަށް ރައީސް ވިދާޅުވި ކަމަށެވެ.

ސިވިލް ކޯޓުގައި 4000 މައްސަލަ ފުނިޖެހިފައި

އަދުލް އިންސާފު ލިބުން ލަސްވުމަކީ ވަރަށް ބޮޑު ގެއްލުމެއް ކަމަށާއި ބައެއް ކޯޓުތަކަށް ކަންކަން ފަހިކޮށް ދިނަސް ނަތީޖާ ހުރީ ދައްކަން ފާހަގަ ކުރައްވައި، މިސާލެއްގެ ގޮތުގައި ނާޒިމް ވިދާޅުވީ ސިވިލް ކޯޓުގެ ވާހަކަ އެވެ.

"ސިވިލް ކޯޓުގައި 17 ފަނޑިޔާރުން ތިއްބެވިއިރު 4000 އަށްވުރެ ގިނަ މައްސަލަ ނުނިމި އެބަ އޮތް. އެންމެ މަދުން މައްސަލަ އޮތް ފަނޑިޔާރު އަތުގައި ވެސް 112 މައްސަލަ ނުނިމި އެބަ އތް. އެންމެ ގިނައިން މައްސަލަ އޮތް ފަނޑިޔާރު އަތުގައި 500 އެތައް މައްސަލައެއް އެބަ އޮތް،" އޭނާ ވިދާޅުވި އެވެ.

"އަޅުގަނޑުމެންނަށް މިކަމުން މި އެނގެނީ އަޅުގަނޑުމެން ހުރިހާ ވަސީލަތްތަކާއި ހުރިހާ ކަމެއް މެދުވެރިކޮށްދިފަިއ އޮންނަ އިރުވެސް މައްސަލަތައް ނުނިމިވާކަން."

ކްރިމިނަލް ކޯޓުގައި ވެސް ވަރަށް ގިނަ މައްސަލަތައް ނުނިމި އެބަ އޮތް ކަމަށާއި އެކަންކަން ރަނގަޅު ކުރަން މަޖިލީހަށް ކުރެވެން ހުރި ކަންކަން ވެސް ކުރައްވާނެ ކަމަށް ނާޒިމް ވިދާޅުވި އެވެ. އިޖުތިމާއީ މައްސަލަތައް އިސްލާހުކުރުމުގެ ބިލް އައުމުން އެ ބަދަލުތަކާއެކު ކުށްކުރުން މަދުވެ، އިޖުތިމާއީ މައްސަލަތައް ހައްލުވެގެން ދާނެ ކަމަށް ވިދާޅުވި އެވެ.

އިގުތިސާދީ އެޖެންޑާ

އިގުތިސޯދީ ކަންކަން އިސްލާހުކުރުމުގެ ޕްރޮގްރާމެއް ފަށާއިގެން ކުރިއަށް ގެންދާކަމަށާއި ހަރަދު ކުޑަކުރަން އަޅާ އެއްވެސް ފިޔަވަޅަކުން ރައްޔިތުންގެ ދިރިއުޅުމުގެ ފެންވަރަށް އެއްވެސް ކަހަލަ އުނިކަމެއް ނާންނާނެ ކަމުގެ ފުރިހަމަ ޔަގީންކަން އެބަ އޮތް ކަމަށް ނާޒިމް ވިދާޅުވި އެވެ.

ހަރަދު ކުޑަކުރަން ފިޔަވަޅު އަޅާ ވާހަކަ ދެއްކިޔަސް، ރައްޔިތުންނަށް އާސަންދަ އާއި މުހިއްމު ހިދުމަތްތައް ލިބިގެންދާނެ ކަމަށާއި މުހިއްމު މަޝްރޫއުތައް ވެސް ހިނގާނެ ކަމަށެވެ.