ގަވާއިދާ ހިލާފަށް އުޅޭ ބިދޭސީންނާ ދެކޮޅަށް ފަށައިގެން އުޅޭ އޮޕަރޭޝަނުގެ ދަށުން، ހުޅުމާލޭ އިމާރާތަކުން ރަސްމީ ލިޔެކިޔުމެއް ނެތި މަސައްކަތް ކުރަމުން ދިޔަ ބިދޭސީންތަކެއް އިމިގްރޭޝަނުން ރޭ އަތުލައިގެންފި އެވެ.

އިމިގްރޭޝަނުން އެކްސްގައި ކުރި ޕޯސްޓެއްގައި ބުނި ގޮތުގައި އެ އިދާރާއިން މި އިމާރާތް ބަލައިފާސްކުރީ ސޯޝަލްމީޑިއާގައި ކަންބޮޑުވުން ފާޅުކުރުމާ ގުޅިގެންނެވެ. މިހާރު އިމިގްރޭޝަނުން މިގޮތަށް އާންމުންކުރާ ޝަކުވާތައް ބަލަ އެވެ.

އިމިގްރޭޝަނުން ހިންގި އޮޕަރޭޝަނުގައި ހުޅުމާލެއިން ތިން ބުރީގެ އިމާރާތެއް ބަލައި ފާސްކުރި އެވެ. އަދި އެތަނުގައި ކާބޯތަކެތީގެ ވިޔަފާރިކޮށް، ގަވާއިދާ ހިލާފަށް މަސައްކަތް ކުރަމުން ދިޔަ 22 ބިދޭސީން އެ އިދާރާގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން ބުންޏެވެ.

އިމިގްރޭޝަނުން ބުނި ގޮތުގައި މި ތަނަކީ ދިވެހި އަންހެނަކާ ކައިވެނިކޮށްގެން އުޅޭ ބިދޭސީ ފިރިހެނަކާ ގުޅުން އޮތް ތަނެކެވެ. އަދި މި މައްސަލަ އިތުރަށް ތަހުގީގުކުރަމުން އަންނަ ކަމަށް ވެސް އެ އިދާރާއިން ބުނެފައިވެ އެވެ.

މިއީ މިހާތަނަށް ހިންގި މިފަދަ އެންމެ ބޮޑު އެއް އޮޕަރޭޝަން ކަަމަށް ވެސް އިމިގްރޭޝަނުން ބުންޏެވެ.

ސަރުކާރުގެ ސިޔާސަތަކީ މިގޮތަށް އަތުލައިގަނެވޭ ބިދޭސީން، ގަވާއިދުގެ ތެރެއަށް ވަންނަން އިތުރު ފުރުސަތެއް ނުދީ ރާއްޖެ ނާދެވޭ ގޮތަށް އަނބުރާ ގައުމަށް ފޮނުވާލުމެވެ. މިހާތަނަށް މިގޮތަށް 100 އަށް ވުރެ ގިނަ ބިދޭސީން ޑީޕޯޓުކޮށްފައިވާ ކަމަށް މިފަހުން އިމިގްރޭޝަނުން ބުނެފައިވެ އެވެ.