ސްރީ ލަންކާގައި އިއްޔެ ނިމިގެންދިޔަ އެ ގައުމުގެ ނެޝަނަލް އެންޑް ޖޫނިއާ ނެޝަނަލް ލޯންގް ކޯސް ސްވިމިން ޗެމްޕިއަންޝިޕްސްގައި ވާދަކުރި ރާއްޖޭގެ ޓީމުން ވަނީ ފަސް މެޑަލް ހޯދައިފި އެވެ

އެއީ، ތިން ލޯ މެޑަލް އާއި ދެ ރިހި މެޑަލް އެވެ. މެޑަލް ހޯދި އެތުލީޓުންނަކީ، އަމްނާ ތަޒްކިޔާ މިރުސާދު، ޒޯހާ އަޒްލީ ނަސީމް، މަލައިކާ ލިންޑާ އިމްރާން އަދި ޒާހާ ޒައިދުލް ހަލީލް އެވެ.

އިންޑިވިޖުއަލީ މި މުބާރާތުގައި އެންމެ މޮޅު ދިވެހި އެތުލީޓަކީ، 13 އަހަރުގެ ތަޒްކިޔާ އެވެ. ރާއްޖޭން ހޯދި ފަސް މެޑަލްގައި ވެސް އޭނާގެ ހިއްސާ އެބައޮތެވެ. އެ ގޮތުން، ތަޒްކިޔާ ވަނީ އިންޑިވިޖުއަލް ތިން މެޑަލް ހޯދައިފަ އެވެ.

ތަޒްކިޔާ އެންމެ ފަހުން މެޑަލް ހޯދީ، ޖޫނިއާ ކެޓަގަރީގެ 200 މީޓަރު އިންޑިވިޖުއަލް މެޑްލޭ އިވެންޓުން ރިހި މެޑަލް އެވެ. އޭގެ ކުރިން، ފުރަތަމަ ހޯދާފައިވަނީ 100 މީޓަރު ފްރީސްޓައިލް އިވެންޓުން ލޯ މެޑަލަކާއި 50 މީޓަރ ފްރީސްޓައިލް އިވެންޓުން ރިހި މެޑަލް އެކެވެ. މި މުބާރާތުގައި، ރާއްޖޭގެ ޖޫނިއާ ޓީމު، 4 ގުނަ 100 މީޓަރު މެޑްލޭ ރިލޭ އަދި 4 ގުނަ 50 މީޓަރު ފްރީސްޓައިލް ރިލޭ އިވެންޓުން ލޯ މެޑަލް ހޯދި ޓީމުގައި ވެސް ތަޒްކިޔާ ހިމެނެ އެވެ.

ލަންކާ މުބާރާތުގައި ވާދަކުރި އެތުލީޓުން ވަނީ ގިނަ ގައުމީ ރެކޯޑްތަކެއް ވެސް މުގުރާލައިފަ އެވެ. ޖުމްލަކޮށް ބަލާއިރު، މިއީ މި ފަހުން، ރާއްޖޭގެ ޖޫނިއާ ޓީމެއް ވާދަކުރި ސަރަހައްދީ އެންމެ ކާމިޔާބު މުބާރާތެވެ.