ޕެރިސް (ޖުލައި 28) - ނިއު ޒީލެންޑް އަންހެން ފުޓްބޯޅަ ޓީމުގެ ޓްރެއިނިން ކުރިއަށްދަނިކޮށް، އެ ތަނުގެ މަތިން، ކެނަޑާ ޓީމުގެ އޮފިޝަލަކު ޑްރޯން ދުއްވި މައްސަލައިގެ ތަހުގީގުގެ ތެރެއިން، ފީފާ އިން ކެނަޑާ ޓީމަށް ފިޔަވަޅު އަޅައިފި އެވެ.

މިދިޔަ ހޯމަ ދުވަހު، ސެއިން އެޓިއެންގައި ނިއު ޒީލެންޑުން ޕްރެކްޓިސް ކުރަމުން ދިޔަ ވަގުތެއްގައި ކެނަޑާ އޮފިޝަލަކު ވަނީ މަތިން ޑްރޯން ދުއްވައި، ވީޑިއޯ ކޮށްފަ އެވެ. ނިއު ޒީލެންޑް ޓީމުން މި މައްސަލަ، ޕޮލިހުންނަށް ރިޕޯޓްކުރުމާ އެކު، ޑްރޯން އެރުވި ފަރާތް، ފުލުހުން ހިފެހެއްޓިއިރު، އެއީ ކެނަޑާ ޓީމު އޮފިޝަލެކެވެ.

ކެނަޑާ އޮލިމްޕިކް ކޮމިޓީން ބުނީ، ފުލުހުން ހިފެހެއްޓި، ކެނަޑާގެ ޓީމު އޮފިޝަލަކީ މި ފަހަރުގެ މުބާރާތަށް އެކްރެޑިޓްކޮށްފައިވާ އޮފިޝަލެއް ނޫން ކަމަށެވެ. އެކަަމަކު، މި ފަދަ ކަމެއް ހިނގުމަކީ ދެރަ ކަމެއް ކަމަށާއި މި ކަމާ ނިއު ޒީލެންޑްގެ ކިބައިން މާފަށް އެދޭ ކަމަށެވެ. ކަންތައްތައް ދިމާވި ގޮތުން، އިންޓަނޭޝަނަލް އޮލިމްޕިކް ކޮމިޓީގެ އެންގުމާ އެއްގޮތަށް، ކެނަޑާ އިން ވަނީ، އެ ޓީމުގެ އެސިސްޓަންޓް ކޯޗު، ޖާސްމީން މެންޑާ އާއި އެކްރެޑިޓްކޮށްފައިނުވާ، އެނަލިސްޓް، ޖޯސެޕް ލޮމްބާޑީ ގެއަށް ފޮނުވާލައިފަ އެވެ.

ޓޯކިޔޯ 2020 އޮލިމްޕިކްސްގެ (ކޮވިޑް-19އާ ހެދި 2021 ގައި ބޭއްވި އޮލިމްޕިކްސް)، އަންހެން ފުޓްބޯޅައިން ރަން މެޑަލް ހޯދި ކެނަޑާ އަންހެން ޓީމުގެ ކޯޗަކީ، ބެވަލީ ޕްރީސްޓްމަން، 38، އެވެ. އޭނާ ވަނީ ޓީމު އޮފިޝަލުން ކުރި ކުށުގެ ޒިންމާ ނަގާ ކަމަށް ބުނެ، ފުރަތަމަ މެޗުގައި، ޓީމަށް އިރުޝާދުދިނުމުގައި ބައިވެރިނުވާން ނިންމައިފަ އެވެ. އެކަމަކު، ފަހުން ކެނަޑާ ފުޓްބޯޅަ ފެޑެރޭޝަނުން ވަނީ ޕްރީސްޓްމަން، މަގާމުން އެކަހެރިކޮށްފަ އެވެ.

ފީފާ އިން މި މައްސަލަ ބެލުމަށް ފަހު ނިންމީ، 175،720 ޕައުންޑުން، ކެނަޑާ ފުޓްބޯޅަ އެސޯސިއޭޝަން ޖޫރިމަނާ ކުރުމަށާއި ޕްރީސްޓްމަން، މެންޑާ އަދި ލޮމްބާޑީ އެއް އަހަރަށް ސަސްޕެންޑްކުރަން ނިންމައިފަ އެވެ.

ކެނަޑާގެ މީޑިއާގައި އާންމުވި ރިޕޯޓްތަކަކީ، ކެނަޑާގެ އަންހެން އަދި ފިރިހެން ގައުމީ ޓީމުން، މީގެ ކުރިން މުބާރާތްތަކުގައި ވެސް އިދިކޮޅު ޓީމުތަކުގެ މައުލޫމާތު ހޯދަން ޑްރޯން ދުއްވާފައިވާ ކަމެވެ.

މި ކަންތައްތަކާ ހެދި، ކެނަޑާ އޮލިމްޕިކް ކޮމިޓީގެ ޗީފް އެގްޒެކްޓިވް، ޑޭވިޑް ޝޫމޭކާ ވަނީ، ކެނަޑާ އަންހެން ޓީމަށް އެންމެ ފަހުން އޮލިމްޕިކްސްގައި ލިބުނު ރަން މެޑަލް އަތުލަފާނެ ކަމުގެ މައުލޫމާތުތަކެއް އޭނާ އަށް ވެސް ލިބިފައިވާ ކަމަށް ވިދާޅުވެފަ އެވެ.

އެކަމަކު، މި ކަންކަމުގެ ސީދާ މައުލޫމާތު ލިބޭނީ، ކުރިއަށްދާ ތަހުގީގުތައް ނިމުމަށް ފަހު ކަމަށް ޝޫމޭކާ ވިދާޅުވި އެވެ.