ލަންޑަން (ޖުލައި 27) - ވިޔަރެއާލަށް ކުޅެމުން އަންނަ ގޯލްކީޕަރު، ފިލިޕް ޖޯގެންސަން، އިނގިރޭސި ޕްރިމިއާ ލީގުގެ ޗެލްސީ އަށް ބަދަލުވުމަށް ހުރިހާ ކަމެއް ހަމަޖެހިއްޖެ އެވެ.

ޖޯގެންސަން، 22 ގެ ސޮއިހޯދަން ޗެލްސީން ޖުމްލަ އެކު، 27 މިލިއަން ޑޮލަރު ހަރަދުކުރަން ވަނީ ނިންމައިފަ އެވެ. އަދި ޗެލްސީއާ އެކު، ޖޯގެންސަން، ދިގު މުއްދަތުގެ ކޮންޓްރެކްޓެއް ސޮއިކުރަން ވަނީ ނިންމައިފަ އެވެ.

އެ ގޮތުން، ޗެލްސީގެ މެޑިކަލް ޓެސްޓްތައް އަންނަ ހަފްތާގައި ފުރިހަމަކޮށް، އެއްބަސްވުމުގެ ކަންކަން ނިންމާލާ ގޮތަށް ވަނީ ޝެޑިއުލްކޮށްފަ އެވެ.

ސްވިޑެންގެ މަލްމޯ އާއި ސްޕެއިނުގެ މަޔޯކާ ޔޫތު ޓީމަށް ކުޅެފައިވާ، ޖޯގެންސަން ވަނީ ވިޔަރެއާލަށް ޔޫތު ލެވަލްގައި ބަދަލުވެފަ އެވެ. އެ ގޮތުން، ވިޔަރެއާލްގެ ބީ ޓީމަށް ވެސް ގިނަ މެޗުތަކެއް ކުޅުނު ޖޯގެންސަން ސީނިއާ ޓީމަށް ޕްރޮމޯޓްވެފައިވަނީ، މީގެ ހަތަރު އަހަރު ކުރިންނެވެ. އަދި ފާއިތުވި ސީޒަނުގައި އޭނާ ވަނީ، ވިޔަރެއާލްގެ އެއް ވަނަ ކީޕަރުގެ ގޮތުގައި މޮޅު ކުޅުމެއް ދައްކައިފަ އެވެ.

ޗެލްސީން ވަނީ އާ ކީޕަރެއް ހޯދުމުގެ މަސައްކަތުގައި، އެ ޓީމުގެ ސްޕެއިން ކީޕަރު، ކެޕާ އަރިއްޒަބަލާގާ އާއި ރެއާލް މެޑްރިޑްގެ އަންޑްރީ ލުނިން ބަދަލުކުރަން ވެސް މަޝްވަރާތަކެއްކޮށްފަ އެވެ. އެކަމަކު، ޔޫކްރެއިން ގައުމީ ޓީމުގެ ކީޕަރު ލުނިން އެ ޑީލަށް ނުރުހޭތީ ކުރިއަށްނުދިޔަ އެވެ. އެއާ އެކު، ޗެލްސީން ޖޯގެންސަންގެ ޑީލް އަވަހަށް މި ވަނީ ނިންމައިލައިފަ އެވެ.

ޖޯގެންސަން ޗެލްސީ އަށް ބަދަލުވިޔަސް، ޗެލްސީގައި މި ވަގުތު ހުރި ސްޕެއިންގެ ކީޕަރު، ރޮބަޓް ސަންޗޭޒް އެ ޓީމުގައި މަޑުކުރާނެ އެވެ. ކުރިން ބްރައިޓަން އަށް ކުޅުނު ސަންޗޭޒް، މީޑިއާ އަށް ދިން އިންޓަވިއުއެއްގައި ބުނީ ޗެލްސީގެ އެއް ވަނަ ކީޕަރަށް ވުމަށް މަސައްކަތްކުރަން އެ ޓީމުގައި މަޑުކުރާނެ ކަމަށެެވެ. އެކަމަކު، ސަންޗޭޒަށް އަނިޔާވުމުން މިދިޔަ ސީޒަނުގައި ޗެލްސީގެ ގޯލު ބެލެހެއްޓި ކީޕަރު، ޖޯޖޭ ޕެޓްރޮވިޗް އެ ޓީމު ދޫކޮށްލާނެ ކަމަށް ބެލެވެ އެވެ.

އެންޒޯ މަރެސްކާ، ޗެލްސީގެ ކޯޗަކަށް ހަމަޖައްސައި، ޗެލްސީން ވަނީ މި ފަހަރުގެ ޓްރާންސްފާ މާކެޓްގައި، މިހާތަނަށް ހަ ޑީލް ނިންމައިފަ އެވެ. އެއީ، ހިލޭ ޓްރާންސްފާއެއްގައި ފުލަމް އިން އައި ޑިފެންޑަރު، ޓޮސިން އަޑެރާބިއޯޔޯ، ބާސެލޯނާ އިން ހަ މިލިއަން ޑޮލަރަށް ގެނައި، މާކް ގުއިއޫ، އެމްއެލްއެސްގެ އެޓްލަންޓާ އިން 10 މިލިއަން ޑޮލަރަށް ގަތް ސެލެބް ވައިލީ، ބަސެލް އިން 14 މިލިއަން ޑޮލަރަށް ގަތް ރެނާޓޯ ވެއިގާ، އެސްޓަން ވިލާ ޔޫތު ޓީމުން 23 މިލިއަން ޑޮލަރަށް ގެނައި އޮމާރީ ކެލީމަން އަދި ލެސްޓާ ސިޓީ އަށް 36 މިިލިއަން ޑޮލަރު ދެއްުކުމަށް ފަހު، ގަތް ކިއެރަން ޑިއުސްބަރީ-ހޯލް އެވެ.