ރައީސުލްޖުމްހުރިއްޔާގެ ރަސްމީ ގެކޮޅު، މުލީއާގޭގެއަށް ރައީސް ޑރ. މުހައްމަދު މުއިއްޒު ބަދަލުވެވަޑައިގަންނަވާތީ، އެތަން މަރާމާތުކުރަން ދައުލަތުގެ ބަޖެޓުން 3.6 މިލިއަން ރުފިޔާ ހަރަދުކުރި ކަމަށް ރައީސް އޮފީހުން ބުނެފި އެވެ.
މި މައުލޫމާތު ދިނީ ރައީސްގެ ރަސްމީ ގެކޮޅަށް ދިޔަ ހަރަދުގެ ތަފުސީލު ދިނުމަށް އެދި "އަދަދު" އިން މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ހުށަހެޅުމުންނެވެ. މެއި 14، ގައި ހުށަހެޅި މި އާރުޓީއައި ރިކުއެސްޓަށް ޖަވާބުދިނީ އިއްޔެ އެވެ.
ރައީސް އޮފީހުގެ ޖަވާބުގައި ބުނީ ނޮވެމްބަރު 17، 2023 އިން ފެށިގެން މުލީއާގޭގެ މަރާމާތުގެ އެކި ކަންކަމަށް ދައުލަތުގެ ބަޖެޓުން ޖުމްލަ 3،607،711ރ. ހަރަދުކޮށްފައިވެ އެވެ.
ނައިބު ރައީސްގެ ރަސްމީ ގެކޮޅު ހިލާލީގެއެކޭ އެއްގޮތަށް މުލީއާގޭގެ މަރާމާތުގެ މަސައްކަތްވެސް ކުރަނީ އެސްޓީއޯ އިންނެވެ. މި ވެރިކަމުގައި ހިލާލީގޭގެ މަރާމާތައްވެސް ޖުމްލަ 5،486،248ރ. ވަނީ ހަރަދުކޮށްފަ އެވެ.
ހަރަދުވީ ފައިސާގެ އަދަދާއެކީ ރައީސް އޮފީހުން ވަނީ ވަކި ވަކި ބިލުތަކަށް އެރި އަދަދުތައް ވެސް ހިއްސާކޮށްފަ އެވެ. ނަމަވެސް އެ ބިލުތަކުގައި ހަރަދުކުރި ކަންކަމުގައި ތަފުސީލު ހިމަނާފައިވާ ނުވާތީ، މުލީއާގެއަށް ރައީސް ބަދަލުވެވަޑައިގަންނަވަން ކުރީ ކޮން ކަހަލަ މަރާމާތެއް ކަމެއް ސާފެއް ނޫނެވެ.
ވެރިކަމާ ހަވާލުވެވަޑައިގަންނަވައި ރައީސް އަދި އާއިލާ ފުރަތަމަ ދިރިއުޅުއްވީ ރައީސްގެ އަމިއްލެ ގެކޮޅު މ. ދިމްޔާތުގަ އެވެ. ރައީސްގެ ދެކަނބަލުން މުލީއާގެއަށް ބަދަލުވެވަޑައިގެންނެވީ ވެރިކަަމަށް 80 ދުވަސް ވި ފަހުން ފެބްރުއަރީ 5، ގަ އެވެ.
މީގެކުރިން މި ނޫހަށް މައުލޫމާތު ލިބުނު ގޮތުގައި މުލިއާގޭގެ މަރަމާތުގެ ތެރޭގައި އިތުރު ދެ ކޮޓަރި ވަނީ ހަދާފަ އެވެ. އެއީ ރައީސް މުއިއްޒު އާއި އަނބިކަނބަލުން އަދި ތިން ބޭފުޅުންގެ ބޭނުމަށެވެ.
ރައީސުލްޖުމްހޫރިއްޔާ ދިރިއުޅުއްވާ, ރިޔާސީ ގަނޑުވަރުގެ ގޮތުގައި މުލީއާގެ ހަމަޖެއްސީ ކުރީގެ ރައީސް މައުމޫނު އަބްދުލް ގައްޔޫމެވެ. އޭގެ ފަހުން ތީމުގެ ބިނާކޮށް ނިމެންދެން އެމަނިކުފާނު އެގޭ ގައި ދިރިއުޅުއްވި އެވެ. ކުރީގެ ރައީސް މުހައްްމަދު ނަޝީދު ވެސް 2012 ވަނަ އަހަރު އެމަނިކުފާނުގެ ވެރިކަން ނިމެންދެން ދިރިއުޅުއްވީ އެ ގޭގަ އެވެ. އެއަށްފަހު އެ ގޭގައި ދިރިއުޅުއްވީ ރައީސް އިބްރާހިމް މުހައްމަދު ސޯލިހެވެ.
ކުރީގެ ރައީސް އަބްދުالله ޔާމީންގެ ވެރިކަމުގައި މުލިއާގެ ބޭނުންކުރެއްވީ އެމަނިކުފާނުގެ ސިޔާސީ ހަރަކާތްތައް ކުރިއަށް ގެންދިޔުމަށެވެ. އެމަނިކުފާނު ދިރިއުޅުއްވަމުން ގެންދެވީ އަމިއްލަފުޅު ގެކޮޅު ކަމަށްވާ ގ. ދޫވެހީގަ އެވެ.
