ލަންޑަން (ޖުލައި 26) - ޗެލްސީ އަށް ކުޅެމުން އަންނަ ހުނަރުވެރި މިޑްފީލްޑަރު، ކޮނާ ގެލަގާ، ސްޕެއިނުގެ އެތުލެޓިކޯ މެޑްރިޑަށް ބަދަލުވުމާ ގާތަށް ޖެހިލައިފައިވާ ކަމަށް މީޑިއާ ރިޕޯޓްތައް ބުނެފި އެވެ.

ގެލަގާ، 24، މި ވަގުތު ޗެލްސީގެ ކޮންޓްރެކްޓްގައި ހުރީ އަންނަ އަަހަރުގެ ޖޫން މަހުގެ ނިޔަލަށެވެ. އެއްބަސްވުން އާ ކުރަން ޗެލްސީން މަޝްވަރާތަކެއް ކުރިއަށް ގެންދިޔަ ނަމަވެސް، އަލިމަގެއް ފެންނަ ގޮތެއް ނުވި އެވެ. ރިޕޯޓްތައް ބުނާގޮތުން، ގެލަގާ ބޭނުންވަނީ އާ ޗެލެންޖެއް ނެގުމަށެވެ.

އެ ގޮތުން، ސްޕެއިނުގެ އެތުލެޓިކޯ މެޑްރިޑާ ވާހަކަދައްކައި މިހާރު އެ ޓީމަށް ބަދަލުވާން އަނގަބަހުން އެއްބަސްވެފައިވާ ކަމަށް ސްޕެއިނާއި އިނގިރޭސި ބައެއް ނޫސްތަކުން ވަނީ ރިޕޯޓްކޮށްފަ އެވެ.

އިނގިރޭސި ގައުމީ ޓީމަށް ވެސް ކުޅޭ ގެލަގާ، ޗެލްސީން ދާނެ ކަމަށް ބަލައި، އެ ކްލަބުން ވަނީ، ލެސްޓާ ސިޓީ އަށް ކުޅޭ ކިއެރަން ޑިއުސްބަރީ-ހޯލް ސޮއިކޮށްފަ އެވެ.

އިނގިރޭސި ބައެއް މީޑިއާ ރިޕޯޓްތައް ބުނާގޮތުން، ގެލަގާ ވަނީ އެތުލެޓިކޯ މެޑްރިޑަށް ދިއުމާ ގުޅޭގޮތުން، އިނގިރޭސި ފުލްބެކް، ކިއެރަން ޓްރިޕިއޭއާ ވާހަކަ ދައްކައިފަ އެވެ. ނިއުކާސަލް ޔުނައިޓެޑަށް މި ވަގުތު ކުޅެމުން އަންނަ ޓްރިޕިއޭ ވަނީ މީގެ ކުރިން 2021 ވަނަ އަަހަރު އެތުލެޓިކޯ މެޑްރިޑަށް ކުޅެފަ އެވެ. ޓްރިޕިއޭ ވަނީ އެތުލެޓިކޯ މެޑްރިޑަށް ދިއުމަކީ ގެލަގާ އަށް ރަނގަޅު ނިންމުމަކަށްވާނެ ކަމަށް ބުނެފަ އެވެ.

ޗެލްސީ އެކެޑަމީން ފަށައިގެން ސީނިއާ ޓީމަށް އަންނަން ގެލަގާ ކުރަން ޖެހުނީ ނިސްބަތުން ބަލާއިރު އުނދަގޫ ދަތުރެކެވެ. ޗެލްސީގެ ކުޅުންތެރިއެއްގެ ގޮތުގައި ހުރެ ގެލަގާ ވަނީ ލޯން އުސޫލުން، ހަތަރު ޓީމަށް ކުޅެފަ އެވެ. އެއީ ޗާލްޓަން އެތުލެޓިކް، ސްވަންސީ ސިޓީ، ވެސްޓް ބްރޮމްވިޗް އަލްބިއަން އަދި ކްރިސްޓަލް ޕެލަސް އެވެ.

މިހާތަނަށް ޗެލްސީ އަށް ކުޅެދިން 95 މެޗުން ގެލަގާ ވަނީ އެ ޓީމަށް 10 ލަނޑު ޖަހައި، 10 ލަނޑު ޖަހަން ފުރުސަތު ތަނަވަސްކޮށްދީފަ އެވެ.