ހޯމް މިނިސްޓަރީގެ ސްޓޭޓު މިނިސްޓަރުކަމުން އިސްތިއުފާދެއްވީ ބޮޑު މުސާރަ ނަގައިގެން މަސައްކަތެެއް ނުކޮށް ހުންނަން ބޭނުން ނުވާތީ ކަމަށާ އޭރުން އެ މަގާމުގެ މުސާރަ ހަލާލުނުވާނެ ކަމަށް ޔޫސުފް މާނިއު މިއަދު ވިދާޅުވެއްޖެ އެވެ.

ކޮމިޝަނާ ޖެނެރަލް އޮފް ކަސްޓަމްސްގެ މަގާމުން ވަކިކޮށް، ހޯމް މިނިސްޓަރީގެ ސްޓޭޓު މިނިސްޓަރެއްގެ މަގާމަށް ހޯމަ ދުވަހު ބަދަލުކުރި މާނިއު ސްޓޭޓް މިނިސްޓަރުކަމުން އިސްތިއުފާދެއްވީ އިއްޔެ އެވެ.

މާނިއު "އަދަދު" އަށް ވިދާޅުވީ މަސައްކަތެއް ނުކޮށް ބޮޑު މުސާރައެއް ނަގައިގެން ސްޓޭޓް މިނިސްޓަރުކަމުގައި ހުންނަން ބޭނުން ނުވާ ކަމަށާއި އިސްއިއުފާދެއްވީ އެއީ އެންމެ ރަނގަޅު ގޮތް ކަމަށް ނުފެންނާތީ ކަމަށެވެ. އޭނާ ވިދާޅުވި ގޮތުގައި ސަރުކާރުގެ ވިސްނުމަކީ ހަރަދުކުޑަކުރުން ކަމަށާއި މީހަށް 20،000 ރުފިޔާ ދީގެން ކުރެވެން އޮތް މަސައްކަތެއް ކުރަން 45،000 ދީފައި ސްޓޭޓް މިނިސްޓަރުންތަކެއް އައްޔަން ކުރުން އެއީ އެއީ ޒަމީރު ގަބޫލުކުރާ ކަމެއް ނޫނެވެ.

"އަޅުގަނޑާ ދޭތެރޭ ވެސް ރަނގަޅަށް ކަންތައް ކުރައްވަންވެގެން ރައީސުލްޖުމްހޫރިއްޔާ ވަގުތުން ބަދަލުކުރެއްވީ ވެސް. އަޅުގަނޑަކަށް ހަލާލު ކަމަކަށް ނުފެންނާނެ އެވަރުގެ ރެސްޕޮންޒިބިލިޓީއެއް ނެތި ފައިސާ ނަގާކަށް ދައުލަތުން،" މާނިއު ވިދާޅުވި އެވެ.

ސްޓޭޓް މިނިސްޓަރަކަށް ބަދަލުކުރީ ރަނގަޅަށް ކަންތައް ކޮށްދޭން ކަމަށް ބެލެވޭ ކަމަށާއި ނަމަވެސް ވަޒީފާގެ މަސްއޫލިއްޔަތެއް ނެތި ބޮޑު މުސާރައެއް ހަލާލުވާނެ ކަމަށް ގަބޫލު ނުކުރެވޭ ކަމަށް އޭނާ ވިދާޅުވި އެވެ.

މާނިއު ވިދާޅުވީ ކޮމިޝަނާ ޖެނެރަލްގެ މަގާމުން އެއްވެސް އެންގުމެއް ނެތި ވަކިކުރުމުން ހައިރާންވާ ކަމަށާއި މަގާމުގައި ހުރިއިރު ގިނަ މަސައްކަތްތަކެއް ކުރައްވާފައި ވާނެ ކަމަށެވެ.

"އެއްވެސް އެންގުމެއް ނެތް، އެއްވެސް ކަހަލަ މަޝްވަރާއެއް ނެތް. ހަމަ ކުއްލިއަކަށް ހަމަ ބަދަލުކޮށްލީ. ހަމަ އެއްވެސް ގޮތަކަށް ނޭގޭ. އިޝާރާތެއް ވެސް ނުދެއްވާ. އެއީ އަޅުގަނޑު ވެސް ހައިރާންވި ކަމަކީ. ހުރިހާ ބޭފުޅުންނަށް ވެސް އެނގޭނެ މިދިޔަ 15 އަހަރުވެސް ނުކުރެވި ހުރި ބައިވަރު ކަންތައްތައް އަޅުގަނޑުކޮށް ނިންމައިފިކަން،" މާނިއު ވިދާޅުވި އެވެ.

އެގޮތުން ކުރިން ރައްޓެހިންނާއި ގާތް މީހުންނަށް އަވަހަށް ކަންތައް ކުރުމުގެ ސަގާފަތް ނިމުމަކަށް ގެނެސް، އޮންނަ ޕްރޮސެސް ތެރެއިން ކިއުއިން ކަންކަން ކުރަން ފެށި ކަމަށާއި އެންމެ ނިކަމެތި މީހާއާއި މުއްސަނދި މީހާއާ އެއްހަމަކުރި ކަމަށް އޭނާ ވިދާޅުވި އެވެ.

ކަސްޓަމްސްގެ ކޮމިޝަނަރުކަމުން މާނިއު ވަކި ކުރީ ކޮން ސަބަބަކާ ހުރެ ކަމެއް ސަރުކާރުން ހާމައެއް ނުކުރެ އެވެ. ރައީސް އޮފީހުން ބުނި ގޮތުގައި ކޮމިޝަނާ ޖެނެރަލްގެ މަގާމަށް ދިޔާނާ އައްޔަންކުރީ ކަސްޓަމްސް ގާނޫނުގެ ދަށުން ރައީސް ޑރ. މުހައްމަދު މުއިއްޒުއަށް ލިބިވަޑައިގަންނަވާ ބާރުގެ ދަށުން ކަމަށެވެ.

ކަސްޓަމްސްގެ ކޮމިޝަނަރުކަމުން މާނިއު ވަކި ކުރީ، އެ މަގާމުގައި ހުންނަވައިގެން ދެއްކެވި ގިނަ ވާހަކަތަކަކަށް ގިނަ ބައެއްގެ ފާޑުކިޔުން އަމާޒުވެފައިވަނިކޮށެވެ.