ލޮސް އެންޖެލްސް، ޔުނައިޓެޑް ސްޓޭޓްސް (24 ޖުލައި) - މެންޗެސްޓާ ސިޓީގެ މުހިންމު މިޑްފީލްޑަރު ކެވިން ޑި ބްރޭނާ އެ ކްލަބުގައި މަޑުކުރާނެ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ޑި ބްރޭނާ ހޯދަން ސައުދީ ޕްރޯ ލީގުގެ ބައެއް ކްލަބުތަކުން މަސައްކަތްކު ރަމުންދާ ކަމަށް މީޑިއާ ރިޕޯޓްތަކުން ބުނެ އެވެ.

ސައުދީ ޕްރޯ ލީގުގައި ކުޅުންތެރިންނަށް ދެމުންދާ މުސާރައަށް ވިސްނާލާއިރު، އެ ލީގުގެ ކްލަބަކުން ލިބޭ ހުށަހެޅުމަކާމެދު ވިސްނާނެ ކަމަށް ޑި ބްރޭނާ ވަނީ މިދިޔަ މަހު ބުނެފަ އެވެ.

އެކަމަކު، ސިޓީގެ ކޯޗު ގާޑިއޯލާ ބުނީ ކުރިއަށް އޮތް ސީޒަންގައި ޑި ބްރޭނާ ފެންނާނީ ސިޓީން ކަމަށެވެ.

"ޑި ބްރޭނާ އެހެން ކްލަބަކަށް ބަދަލެއް ނުވާނެ،" ގާޑިއޯލާ ބުންޏެވެ.

ބެލްޖިއަމް ގައުމީ ޓީމުގެ ކެޕްޓަން، ޑި ބްރޭނާ ވަނީ ސިޓީއާ އެކު ޖުމްލަ ހަ ފަހަރު ޕްރިމިއާ ލީގު ކާމިޔާބުކޮށްފަ އެވެ. އަދި ޑި ބްރޭނާ ވަނީ ޗެމްޕިއަންސް ލީގާއި ކްލަބް ވޯލްޑް ކަޕް ވެސް ސިޓީއާ އެކު ހޯދައިފަ އެވެ.

ކުރިއަށް އޮތް ސީޒަނަށް ސިޓީން ތައްޔާރުވަމުންދާއިރު، އެ ޓީމުގެ ބްރެޒިލް ގޯލްކީޕަރު އެޑަސަން ވެސް ސައުދީ ލީގަށް ބަދަލުވާނެކަމުގެ އަޑުތައް ދަނީ ފެތުރެމުންނެވެ.

ގާޑިއޯލާ ބުނީ ކުރިއަށް އޮތް ސީޒަނަށް ސިޓީގެ ސްކޮޑަށް މާ ބޮޑު ބަދަލެއް އަންނާނެ ކަމަށް ނުބެލެވޭ ކަމަށެވެ.

"ކުޅުންތެރިއެއް އެހެން ކްލަބަކަށް ބަދަލުވެއްޖެއްޔާ، އެ ތަން ފޫބެއްދުމަށް އަހަރަމެން ވިސްނާނަން. އެކަމަކު، ބޮޑަށް ލަފާކުރެވެނީ ސްކޮޑާށް ބަދަލެއް ނާންނާނެ ކަމަށް،" ގާޑިއޯލާ ބުންޏެވެ.