ދައުލަތުގެ މުސާރަތައް އެއްހަމަ ކުރަން، ފެށި "ޕޭ ހާމަނައިޒޭޝަން ޕްރޮގްރާމް" ކުރިއަށް ނުގޮސް އޮތުމުގެ ސަަބަބުން މުވައްޒަފުންގެ މުސާރައިގެ ފަރަގު އިތުރަށް ބޮޑުވެ، އެކަން ބޮޑު ޝަކުވާއަކަށް ވެފައިވާ ކަމަށް ސިވިލް ސާވިސް ކޮމިޝަނުން މިއަދު ބުނެފި އެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ބޭއްވި ބައްދަލުވުމުގައި ސިވިލް ސާވިސް ކޮމިޝަން (ސީއެސްސީ)ގެ ރައީސް މުހައްމަދު ނާސިހު ވިދާޅުވީ ޓީޗަރުންނާއި ޕްރިންސިޕަލުން އަދި ޑޮކްޓްރުންނާއި ނަރުހުން މުސާރައިގެ އާ އޮނިގަނޑަށް ހިޖުރިކުރި ފަހުން، ޕޭ ހާމަނައިޒޭޝަންގެ މަސައްކަތް އަދި ކުރިއަށް ގޮސްފައި ނުވާ ކަމަށާ އެހެންވެ، އެ ޕްރޮފްރާމްގެ މަގުސަދު ހާސިލުނުވާ ކަމަށެވެ.

ޕޭ ކޮމިޝަނުން ފެށި ޕޭ ހާމައިޒޭޝަން މަސައްކަތުގައި ސިވިލް ސާވިސް ކޮމިޝަނުގެ ބައިވެރިވުން ކުޑަކަން ވެސް އޭނާ ފާހަގަ ކުރެއްވި އެވެ. އޭނާ ވިދާޅުވި ގޮތުގައި ސިވިލް ސާވިސް މުވައްޒަފުންގެ ތެރެއިން ޓެކްނިކަލް ބައެއް މުވައްްޒަފުންނަށް މުސާރަ ބޮޑުވި ނަމަވެސް އިދާރީ މުވައްޒަފުންގެ މުސާރައަށް އެއްވެސް ބަދަލެއް ނާދެ އެވެ.

"އެކެއް މެއި ދެހާސް ބާވީސް ވަނަ އަހަރު ފުރަތަމަ ޓީޗަރުންނާއި ޕްރިންސިޕަލުންގެ، އެއީ އެޑިއުކޭޝަން ދާއިރާގެ އޮނިގަނޑުގެ ޕޭ ފްރޭމްވޯކް ނިންމެވުމަށް ފަހުގައި ހިކުރެވިގެން ދިޔައީ އެދާއިރާގެ މުވައްޒަފުން. ދެން އޭގެ ތެރޭގައި ޓެކްނިކަލް ސާވިސްގެ ތިން މެޓްރިކްސް އެއް ހިމެނޭ. އަދި އެކެއް މެއި ދެހާސް ތޭވީހުގައި ނަރުހުންނާއި ޑޮކްޓަރުންގެ ޕޭ ފްރޭމްވޯކަށް ހިޖުރަކުރެެވިގެން ދިޔައީ، އޭގެ ފަހުން މި މަސައްކަތް އަދިއެއް ކުރިއަށް ގޮސްފައެއް ނެތް،" ނާސިހު ވިދާޅުވި އެވެ.

އެ ދެ އޮނިގަނޑު އެކުލަވައިލީ އޭނާ ވިދާޅުވި ގޮތުގައި ޕޭ ހާމަނައިޒޭޝަންގެ ނަމުގައި ފެށި މަސައްކަތެއްގެ ތެރެއިން ކަމަށް ވިޔަސް ކުރިއަށް ނުދާތީ އެކަމުގެ މަގުސަދު މިހާރު ހާސިލެއް ނުވެ އެވެ.

"ހަގީގަތުގައި އޭގެ މަގުސަދެއް މިހާރު ހާސިލެއް ނުވޭ، އެ ފަރަގު [މުސާރައިގެ ފަރަގު] ބޮޑުވެފައި މިއޮތީ ކުރިއަށް ވުރެ، ޓީޗަރުންގެ މުސާރަތައް ބޮޑުވުމަށް ފަހުގައި، އެ ހިސާބުން ފެށިގެން މިހާރު ދެ އަހަރު މިވީ ސިވިލް ސާވިސް ގިނަ މުވައްޒަފުންތަކެއްގެ އޮނިގަނޑު ތަކަށް ހިޖުރަ ނުކުރެވޭތާ. އެހެންވީމާ ފަރަގު ބޮޑުވެފައި މިއޮތީ،" ނާސިހު ވިދާޅުވި އެވެ.

އެކަން އެހެންވީ އެ މަސަައްކަތް ކުރިއަށް ދިޔަ ގޮތުން ކަމަށް ދެކެވަޑައިގަންނަވާ ކަމަށް ވެސް އޭނާ ވިދާޅުވި އެވެ. ސިވިލް ސާވިސް އަކީ ދައުލަތުގެ އެންމެ ގިނަ ބަޔަކަށް ވަޒީފާދޭ އިދާރާއަށް ވީ އިރު މުސާރައިގެ އޮނިގަނޑު އެކުލަވައިލުމުގައި އެ ކޮމިޝަނުގެ މަޝްވަރާ ހޯދާފައި ނުވާ ކަމަށް ވެސް އޭނާ ވިދާޅުވި އެވެ.

އެ މަޝްވަރާގައި ބައިވެރިވާން ކޮމިޝަނުން އެދިފައިވާނެ ކަމަށް ވެސް ވިދާޅުވި އެވެ.