ހުޅުމާލޭގައި ފުޑް ޓްރަކް ހިންގަން ބޭނުންވާ ފަރާތްތަކުން އެކަމަށް ޝައުގުވެރިކަން ފާޅުކޮށް ހުށަހެޅުމަށް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން ހުޅުވާލައިފި އެވެ.

އެޗްޑީސީން މިއަދު އާންމުކުރި ދައުވަތުގައި ބުނެފައިވަނީ ފުޑް ޓްރަކް ހިންގަން ހަވާލުކުރާނީ ވަކި ރޭޓަކަށް ކަނޑައަޅާފައިވާ ފީއަކަށް ކަމަށެވެ.

އެއް ހުށަހެޅުމަށްވުރެ ގިނައިން ފުޑް ޓްރަކް ހިންގަން ހުށަހަޅައިފިނަމަ އެޗްޑީސީން ބަލާނީ އެ ކޯޕަރޭޝަންގެ މާސްޓާޕްލޭނާ އެއްގޮތަށް އެ ހިދުމަތް ދެވޭނެ ބަޔަކު ކަނޑައެޅުމަށް ކަމަށް ބުނެފައިވެ އެވެ.

ފުޑް ޓްރަކް އޮޕަރޭޓު ކުރުމަށް ކަނޑައަޅާފައިވާ 12 ސަރަހައްދު

1. ފެރީ ޓާމިނަލް
2. އެސްޓީއޯ ހޮޓެލް ސަރަހައްދު
3. ސެންޓްރަލް ޕާކް
4. އެޗްޑީސީ, ހެޑް އޮފީސް
5. ފަހިވެނި, ކޮމިއުނިޓީ ސެންޓަރު
6. ފެހިރެސް ޕާކް
7. ރެހެންދި ސްކޫލް
8. ރުއްގަނޑު އެކެއް
9. ރުއްގަނޑު ދޭއް
10. ރެޑްބުލް ޕާކް
11. ފުޓްބޯލް ސްޓޭޑިއަމް ސަރަހައްދު
12. ވޯޓާ ތީމް ޕާކް

އެ ޓްރަކްތަކުން ހިދުމަތް ދޭން ޖެހެނީ އެޗްޑީސީން ކަނޑައަޅާފައިވާ މިންގަނޑުތަކަށް ފެތޭ ގޮތަށެވެ. އަދި, އެ ޓްރަކަކުން ފޯރުކޮށްދޭ ކާބޯތަކެއްޗަކީ އެޗްޕީއޭއިން ކަނޑައަޅާފައިވާ ގައިޑްލައިންތަކާ އެއްގޮތަށް ތައްޔާރުކޮށް ފޯރުކޮށްދޭ އެއްޗެއްސަށް ވާން ޖެހޭނެ ކަމަށް އެޗްޑީސީްނ ބުނެފައިވެ އެވެ.

ޓްރަކްތައް އޮޕަރޭޓު ކުރަން ހާއްސަ ގައިޑްލައިނެއް ވެސް އެޗްޑީސީން ވަނީ ކަނޑައަޅާފަ އެވެ. އެ ގައިޑްލައިންތަކާ ހިލާފުވާ ޓްރަކްތައް 5,000ރ. އާއި 50,000ރ. އާ ދެމެދުގެ އަދަދަކުން ޖޫރިމަނާ ކުރާނެ ކަމަށް ވެސް އޭގައި ހިމަނާފައިވެ އެވެ.

ދުނިޔޭގެ ބޮޑެތި ސިޓީތަކުގައި ފުޑް ޓްރަކްތަކަކީ މަގުބޫލު ހިދުމަތެއް ފޯރުކޮށްދޭ ވިޔަފާރިއެކެވެ. މިފަދަ ޓްރަކްތައް ފަރުމާކޮށްފައި ހުންނަނީ އާންމު ގޮތެއްގައި ސިޓީއެއްގެ އައިޑެންޓިޓީ ދައްކުވައިދޭ ފަދަ ކުލަގަދަ ގޮތަކަށެވެ.