ރާއްޖޭން ރޯ މަސް ބޭރުކުރަމުން ދަނީ ދަޅުގައި މަސް ބަންދުކޮށްގެން އަދި އެ ނޫން ވެސް ގޮތްގޮތަށް އަގު އެއްކޮށްގެން މަހުގެ ބާވަތްތައް ބޭރުކުރާނަމަ ގައުމުތަކަށް ދައްކަން ޖެހޭ ޓެކްސް އަދި ޓެރިފް ބޮޑު ވުމުން އެހެން ގޮތެއް ނެތި މަޖުބޫރު ވެގެން ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

ދުނިޔޭގެ ކާބޯތަކެއްޗާއި ބެހޭ ޖަމިއްޔާ، އެފްއޭއޯގެ މަސްވެރިކަމުގެ ކޮމިޓީގެ 36 ވަނަ ޖަލްސާގައި ބައިވެރިވެވަޑައިގެން ޝިޔާމް ވިދާޅުވީ ބައިނަލް އަގުވާމީ މާރުކޭޓަށް މަހުގެ ބާވަތްތައް ނެރުމަށް ކުރަން ޖެހޭ ހަރަދުތައް ވަރަށް ބޮޑު ކަމަށެވެ.

ރާއްޖޭން ރޯ ގަނޑުކުރި ކަޅުބިލަމަސް ދުނިޔޭގެ ބާޒާރަށް ނެރެން މަޖުބޫރުވެފައިވާ ކަމަށް ޝިޔާމް ވިދާޅުވި އެވެ. އެއީ މަސް ބޭރު ކުރުމަށް ރާއްޖޭން ވެސް ގައުމުތަކަށް ބޮޑު ޓެކްސްއެއް ދައްކަން ޖެހޭތީ ކަމަށް މިނިސްޓަރު ވިދާޅުވި އެވެ.

ނަމަވެސް ރައީސް ޑރ. މުހައްމަދު މުއިއްޒުގެ ސަރުކާރުގެ އަމާޒަކީ މަހުގެ އަގު އެއްކޮށްގެން ރާއްޖޭން މަސް ބޭރުކުރުން ކަމަށާއި އަދި މި ހާލަތު ބަދަލުކުރަން ބޭނުންވާ ކަމަށް އޭނާ ވިދާޅުވި އެވެ. ރާއްޖޭން ހިންގާ ދޮށީގެ ދެމެހެއްޓެނިވި މަސްވެރިކަމުގެ އުކުޅުގެ ނަމޫނާ ދުނިޔޭގެ ކޮންމެ ގައުމަަކުން ވެސް ބަލައިގަނެ، އެ މަސްވެރިކަން ކުރިއެރުވުމަށް އަޅަން ޖެހޭ ފިޔަވަޅުތައް އެޅުމަށް ވަކާލާތު ކުރެއްވި އެވެ.

މިނިސްޓަރު ޝިޔާމް ވަނީ ދުނިޔޭގެ އެ ޖަމިއްޔާގެ އިސް ބޭފުޅުންނާއި ބައްދަލުކުރައްވައި ރާއްޖެއަށް އެހީތެރިކަން ބޭނުންވާ ދާއިރާތައް ފާހަގަކުރައްވައި މަޝްވަރާތަކެއް ކުރައްވައިފަ އެވެ.

އެ ޖަމިއްޔާގެ އެހީތެރިކަމާއެކު ކުރީގެ ރައީސް މައުމޫން އަބްދުލްގައްޔޫމުގެ ވެރިކަމުގައި މީގެ 40 އަހަރު ކުރިން ފެށި ކަނދުފަތީގެ މަޝްރޫއު އިތުރަށް ހަރުދަނާ ކުރުމަށް ކަނދުފަތި ކަނޑައިގެންދާ މިންވަރު މަދުކުރަން ޑިޒައިނަށް ބަދަލުތަކެއް ގެންނަން ޖެހޭ ނަމަ އެބަދަލުތައް ގެނައުމަށް އެއްބަސްވެފައިވެ އެވެ.

އޯޝަން ރިސޯސަސް ގާނޫނެއް ޑްރާފްޓްކުރުމަށް ބޭނުންވާ ތަޖްރިބާކާރުންގެ އެހީތެރިކަން ފޯރުކޮށްދިނުމަށްވެސް އެއްބަސްވެވުނެވެ.

މެރިކަލްޗަރ ސިނާޢަތެއްގެ ގޮތުގައި ކުރިއެރުވުމަށް ސަރުކާރުން ކުރަމުންދާ މަސައްކަތުގައި ބޭނުންވާ ފަންނީ އަދި މާލީ އެހީތެރިކަން ފޯރުކޮށްދިނުމާއި ބެހޭގޮތުންވެސް ފުޅާދާއިރާއެއްގައި މަޝްވަރާކުރެވުނެވެ.

ރާއްޖެއިން ޔޫރަޕަށް އެކްސްޕޯޓްކުރާ މަހުން ނަގާ 24 ޕަސެންޓު ޑިއުޓީ ކަނޑާލުމަށް ކޮންމެ ސަރުކާރަކުން ވެސް މަސައްކަތްތަކެއް ކޮށްފައިވެ އެވެ. ކުރީގެ ސަރުކާރުގައި ޑިއުޓީއަކާ ނުލާ މަހުގެ ބާވަތްތައް އެތެރެކުރަން އިނގިރޭސިވިލާތާއެކު މިނިވަން ވިޔަފާރީގެ އެއްބަސްވުމެއް ގާއިމުކުރަން ވާހަކަ ދައްކާފައިވެ އެވެ.