އޮޑިޓާ ޖެނެރަލްގެ އޮފީހުން ކުރާ މަސައްކަތްތަކާ ގުޅިގެން މުވައްޒަފުންނަށް ނުރައްކަލާ ކުރިމަތިލާން ޖެހޭ ކަމަށް، އެ އޮފީހުގެ ލީގަލް ކައުންސެލް މުހައްމަދު ނަސީމު މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ބޭއްވި ބައްދަލުވުމުގައި މެންބަރަކު ކުރެއްވި ސުވާލަކަށް ޖަަވާބު ދެއްވަމުން ނަސީމު ވިދާޅުވީ އޮޑިޓް އޮފީހުގެ މުވައްޒަފުންނަށް ފާޑުފާޑުގެ "ތުރެޓްތައް" އައިސްފައި އެބަހުރި ކަމަށާއި މުދަލަަށް ގެއްލުން ލިބޭ ހިސާބަށް ވެސް ކަންތައްތައް ގޮސްފައި އެބަހުރި ކަމަށެވެ. ފޯނުކޯލްތަކުގެ ޒަރިއްޔާއިން ބިރުދެއްކުން ފަދަ ކަންތައްތައް ހިނގާ ކަމަށް ވެސް އޭނާ ވިދާޅުވި އެވެ.

"އަޅުގަނޑުމެން ސީދާ ކޯޓަކަށް ގެންގޮސް ދައުވާކޮށް، އެކަހަލަ ކަމެއް ކޮށްފަކާ ނެތް، އެކަމަކު އަޅުގަނޑުމެންނަށް ފާޑުފާޑުގެ ތުރެޓްތައް އައިސްފައި އެބަހުރި،" އޭނާ ވިދާޅުވި އެވެ.

އެހެން ވިދާޅުވުމުން ކޮމިޓީގެ މެންބަރަކު ސުވާލު ކުރެއްވީ އެގޮތަށް ކަންތައް ކުރީ ކޮން ފަރާތަކުން ތޯ އެވެ.

ނަސީމު ވިދާޅުވީ އެގޮތަށް ބިރު ދައްކަނީ ކޮންބައެއްކަން ނޭނނގޭ ކަމަށާ އެނގޭ ނަމަ ކަމާ ބެހޭ އިދިރާތަކަށް ހުށަހެޅުނީސް ކަމަށެވެ.

"އަޅުގަނޑުމެންގެ މުދަލަށް ވެސް ހަމަ ގެއްލުން ލިބޭ ހިސާބަށް ކަންތައްތައް ގޮސްފައި އެބަހުރި، އަނެއްކޮޅުން ފޯނުކޯލުން ހަަމަ ބިރުދެއްކުން ކަހަލަ ކަންތައްތައް ވެސް ގޮސްފައި އެބަހުރި. ދެން އަޅުގަނޑުމެންނަކަށް ސިދާ މީހާއެއް ނޭނގޭ، އައިޑެންޓިފައި ކުރެވޭ ގޮތަކަށް އެއްވެސް މީހަކު އެކަހަލަ ކަމެއް ނުއެއް ކުރާނެތާ،" ނަސީމު ވިދާޅުވި އެވެ.

އޭނާ ވިދާޅުވީ ގާނޫނީ ވާޖިބެއް އަދާކުރުމުން އެކަހަލަ ބިރުދެއްކުންތައް އަންނާތީ "ދެންނެވެން ނޯންނަ" ކަމަށެވެ.

"އަަޅުގަނޑުމެންނަށް މިކަންތައް ކޮށްގެން މިކަހަލަ ތުރެޓެއް އެބަ އާދޭ، އެހެން ކިޔާފައި ދެންނެވޭކަށް ނެތޭ އަސްލު ގާނޫނީ ގޮތުން، އެއީ އަަޅުގަނޑުމެން މި ދަންނަވާ އެއްޗަކީ. އެކަމަކު ހަމަ އަަޅުގަނޑުމެން ކަހަލަ އެހެން މިނިވަން މުއައްސަސާތަކަށް އެބަ ހުއްޓޭ އެ ފުރުސަތު،"

އޭނާ އެމޭރުމުން ވާހަކަ ދެއްކެވުމުން ކޮމިޓީގެ މެންބަރު އަދި މަޖިލީހުގެ ހިތަދޫ މެދު ދާއިރާގެ މެންބަރު އަހުމަދު އަޒާން ސުވާލުކުރެއްވީ އޮޑިޓް އޮފީހަށް ލިބިފައި ހުރި އިންޒާރުތަކުގެ މައްސަލަ ކަމާ ބެހޭ ފަރާތްތަކަށް ހުށަހަަޅާފައިވާނެތޯ އެވެ.

އެ ސުވާލަށް ޖަވާބު ދެއްވަމުން އޮޑިޓާ ޖެނެރަލް ހުސައިން ނިޔާޒީ ވިދާޅުވީ، ނަސީމު އެ ވިދާޅުވީ އެމްއެމްޕީއާރުސީގެ އޮޑިޓް ކުރިއިރު ކުރިމަތިވި ކަންތައްތަކެއްގެ ވާހަކަ ކަމަށެވެ. އެ މައްސަލަތައް އޭރު ފުލުުހުންނަށް ހުށަހަޅާފައިވާނެ ކަމަށް ވެސް އޭނާ ވިދާޅުވި އެވެ.