ސިހުރު ހެދިކަމަށް ތުހުމަތުކޮށް ފުލުހުން ހައްޔަރުކޮށްފައި ހުރި ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް އާއި އޭނާގެ ކޮއްކޮ 20 ދުވަހު ޖަލުގައި ބަންދުކުރުމަށްފަހު ދޫކޮށްލީ ބަންދުގައި ބައިތިއްބަން ނުފެންނާތީ ކަމަށް ފުލުހުން މިއަދު ބުނެފި އެވެ.

ޖޫން 23، ގައި ފުލުހުން ހައްޔަރު ކުރީ ޝަމްނާޒް އާއި އޭނާގެ އެއްބަނޑު އެއްބަފާ ކޮއްކޮ ހައްވާ ސަނާ އަލީ ސަލީމް އާއި ސިހުރު ހެދި ކަމަށް ބުނާ މުލީއާގޭގެ ކުރީގެ ކައްކާ ތ. ކިނބިދޫ، ނިވައިދޮށުގޭ، ހުސައިން ސަމީރެވެ. އޭގެ ތެރެއިން ހުސެއިން ސަމީރު ދޫކޮށްލީ ޖުލައި 1، ގަ އެވެ.

މި މައްސަލާގައި ފުލުހުން މިއަދު ބުނީ ޝަމްނާޒް އާއި އޭނާގެ ކޮއްކޮ މިއަދު ފުލުހުންގެ ބަންދުން ދޫކޮށްލާފައިވާ ކަމަށެވެ.

"އެމީހުން ދޫކޮށްލާފައިވަނީ ބަންދުގައި ބައިތިއްބުމަށް ނުފެންނާތީ، މި މައްސަލަ ފުލުހުން ގެންދަނީ ތަހުގީގުކުރަމުން،" ފުލުހުން ބުންޏެވެ.

އެ މައްސަލައިގައި ހައްޔަރުކުރި ޝަމްނާޒް ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރުކަމުން ވަނީ ވަކިކޮށްފަ އެވެ. އަދި އޭނާގެ ކޮއްކޮ ސަނާ ވަނީ އެންވަރަމަންޓް މިނިސްޓްރީގެ ސީނިއާ ޕޮލިޓިކަލް ޑިރެކްޓަރުކަމުން ވަކިކޮށްފަ އެވެ.

ޝަމްނާޒް ހައްޔަރުކުރިއިރު ގާތުން ދޭ އެއް އަހަރާއި ފަސް މަހުގެ ކުއްޖަކު ހުއްޓެވެ. ނަމަވެސް ބަންދުގައި ހުރި 20 ދުވަހުގެ ތެރޭގައި ގާތުން ދިނުމަށް ފުރުސަތު ދީފައެއް ނުވެ އެވެ.

އެއީ ޝަމްނާޒް އާއި ރައީސް އޮފީހުގެ މިނިސްޓަރު އާދަމް ރަމީޒުގެ ތުއްތު ކުއްޖެކެވެ. ރަމީޒު ވަނީ މިދިޔަ މަހުގެ ތެރޭގައި ޝަމްނާޒް ވަރިކޮށްފަ އެވެ. ޝަމްނާޒް ހައްޔަރު ކުރި ފަހުން ސަރުކާރުން ވަނީ ރަމީޒު މަގާމުން ސަސްޕެންޑުކޮށްފަ އެވެ.

މައްސަލާގައި ޝަމްނާޒްގެ މައްޗަށް އެއްވެސް ހެއްކެއް ނެތް ކަމަށާއި، ރަމީޒުއާ ދެކޮޅަށް ބަޔާން ދިނުމުން އޭނާ ދޫކޮށްލާނެ ކަމަށް ފުލުހުން ބުނި ކަމަށް ޝަމްނާޒްގެ ވަކީލު ވަނީ "އަދަދު" އާ ވާހަކަ ދައްކަމުން ބުނެފަ އެވެ. ނަމަވެސް ފުލުހުން އެ ވާހަކަ ދޮގުކުރެ އެވެ.