މި ސަރުކާރުން މާލެ އަތޮޅު ފުށިދިއްގަރުފަޅު ހިއްކާ ރަސްމާލޭގެ ނަމުގައި ތަރައްގީކުރާ މަޝްރޫއަށް ސަޕްލައި ހޯދުމުގެ ނަމުގައި ހިންގި ސްކޭމެއްގައި ކުންފުންޏެއްގެ އެކައުންޓުން 1.9 މިލިއަން ރުފިޔާ ފޭރިގަނެފައިވާ ކަމަށް ފުލުހުން ބުނެފި އެވެ.

ފުލުހުން ބަލަމުންދާ ސްކޭމްގެ މައްސަލަތަކުގެ ތަފުސީލު ދިނުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި އިންސްޕެކްޓާ އޮފް ޕޮލިސް އާދަމް ނަވީދު ވިދާޅުވީ، މި ފަހުން ކުންފުންޏެއްގެ އެކައުންޓުން ދެ މިލިއަނެއްހާ ރުފިޔާ ފޭރިގަތް ސްކޭމް ހިންގާފައިވަނީ ރަސްމާލޭގެ ނަމުގައި ކަމަށެވެ.

"ނުދަންނަ ނަމްބަރަކުން ގުޅާ ރަސްމާލެ ޕްރޮޖެކްޓަށް ސަޕްލައި ކޮށްދިނުމަށް އެދި އައި ހުށަހެޅުމަކަށް ޖަވާބުދީ އެ ޕްރޮޖެކްޓަށް ސަޕްލައި ކުރުމަށްޓަކައި މި ބޭނުންވާ ތަކެއްޗާ ބެހޭގޮތުން ދެކެވުނު ވާހަކަތަކެއްގެ ތެރެއިން ކުރިން ދެންނެވި ގޮތަށް އެކައުންޓް ކޮމްޕްރޮމައިޒް ކުރަން ބޭނުންވާ މައުލޫމާތުތައް ހޯދައިގެން ހިންގިފައިވާ މުއާމަލާތެއް،" އޭނާ ވިދާޅުވި އެވެ.

މި ސްކޭމް ހިންގީ ޖޫން 18, 2024 ގައި އެ ކުންފުނީގެ ހިއްްސާދާރަކަށް ގުޅައި ވައިބާ އާއި ވަޓްސްއެޕް މެދުވެރިކޮށް ރަސްމާލެ ޕްރޮޖެކްޓަކަށް މުދާ ސަޕްލައި ކުރަން ކަމަށް ބުނެ ވެންޑާ ރަޖިސްޓްރީ ކުރުމަށް އީމެއިލް ހޯދައިގެންނެވެ.

އެއަށްފަހު އެމީހާގެ އެކައުންޓުން 25,000ރ. އަދި ވިޔަފާރީގެ އެކައުންޓުން 1,897,016ރ. ނަގާފައިވާ ކަމަށް ފުލުހުން ބުނެ އެވެ. އޭގެ ތެރެއިން 548,860ރ. އަނބުރާ ހޯދައިދީފައިވާ ކަމަށް ފުލުހުން ވަނީ ބުނެފަ އެވެ.

އެ ސްކޭމް ހިންގިއިރު 2.6 މިލިއަން ރުފިޔާ ވިޔަފާރީގެ އެކައުންޓުގައި ހުރި ކަމަށާއި އެތަނުން ސަލާމަތް ކުރެވުނީ އެންމެ 800,000ރ. ކަމަށް ފުލުހުން ބުނެ އެވެ.