ރާއްޖޭން ވެސް ބައިވެރިވެފައިވާ ބައިނަލްއަގުވާމީ އިންސާނީ ހައްގުތަކުގެ މުއާހަދާ ކަމަށްވާ އިންޓަރނޭޝަނަލް ކޮވެނަންޓް އޮން ސިވިލް އެންޑް ޕޮލިޓިކަލް ރައިޓްސް (އައި.ސީ.ސީ.ޕީ.އާރު.) ގެ ދަށުން ރާއްޖޭގައި ހައްގުތައް ކަށަވަރުކުރާނީ އިސްލާމް ދީނުގެ މިންގަނޑުގެ ތެރެއިން ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެ އެވެ.

ބަންޑާރަ ނައިބު މިމޭރުމުން ވާހަކަދެއްކެވީ ޖުލައި 2012 އިން މާރިޗު 2022 ގެ ނިޔަލަށް، ރާއްޖޭން ބައިވެރިވެފައިވާ އެ މުއާހަދާއާ އެއް ގޮތަށް ރާއްޖޭގައި މަދަނީ އަދި ސިޔާސީ ހައްގުތަކާއި މިނިވަންކަން އެ ގޮތުގައި ލިބިދޭ ކަން ކަށަވަރުކޮށް ދިނުމަށް ކޮށްފައިވާ މަސައްކަތްތަކުގެ ރިޕޯޓު ހުށަހެޅުމަށް ޓަކައި ސްވިޓްޒަރލޭންޑްގެ ޖެނީވާގައި ބޭއްވި ރިވިއު ސެޝަންގަ އެވެ.

އެ ސެޝަނުގައި ރާއްޖޭގެ ވަފުދުގެ ވެރިޔާގެ ހައިސިއްޔަތުން ދެއްކެވި ވާހަކަފުޅުގައި އުޝާމް ވިދާޅުވީ އިސްލާމް ދީނަކީ ދިވެހި ރައްޔިތުކަމުގެ މައިގަނޑު އެއް އަސާސް ކަމަށެވެ. އަދި އެއީ ދިވެހި މުޖުތަމަޢުގައި ބަދަލުކުރުމަށް ޖާގަ ނުދެވޭނެ އަސްލެއް ކަމަށް ވެސް އޭނާ ވިދާޅުވި އެވެ.

އައިސީސީޕީއާރުގައި ބަޔާންކުރާ ހައްގުތައް ރާއްޖޭގައި ލިބިދެވޭނީ، ރާއްޖޭގެ ޖުމްހޫރިއްޔާގެ ގާނޫނު އަސާސީއާއި، ގާނޫނުތަކާއި އިސްލާމް ދީނުގެ އަސްލުތަކާ އެއްގޮތްވާ ގޮތުގެ މަތިން ކަމަށް އުޝާމް ވިދާޅުވި އެވެ.

ދެ ސެޝަނަކަށް ބަހާލައިގެން ކުރިއަށްދިޔަ މި ރިވިއުގައި، ރައީސް އޮފީހާއި، އެޓަނީ ޖެނެރަލްގެ އޮފީހާއި، ފޮރިން މިނިސްޓްރީއާއި ހޯމް މިނިސްޓްރީއާއި ޖެންޑާ މިނިސްޓްރީއާއި، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި، ޖެނީވާގައި ހުންނަ އ.ދ. ގެ އޮފީހަށް ދިވެހިރާއްޖެއިން ކަނޑައަޅައިފައި ހުންނަ ދާއިމީ މިޝަން ހިމެނޭގޮތުން، ދިވެހި ސަރުކާރުގެ ހައި-ލެވެލް ޑެލެގޭޝަނެއް ބައިވެރިވެވަޑައިގެންފައިވެއެވެ.