މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ޑެޕިއުޓީ މެނޭޖިން ޑިރެކްޓަރު ކަމުން މުހައްމަދު ބައްސާމު އާދަމް ވަކިވީ ހަރަދު ކުޑަކުރުމަށް ރައީސް ޑރ. މުހައްމަދު މުއިއްޒު ކަނޑައަޅުއްވާފައިވާ ސިޔާސަތުގެ ތެރެއިން ކަމަށް ވިދާޅުވެ އޭނާ ސޯޝަލް މީޑީއާގައި ޕޯސްޓެއް ކުރައްވައިފި އެވެ.

ބައްސާމް އާއި އެ ކުންފުނީގައި އެންމެ ގިނަ ދުވަސްވީ މުވައްޒަފު އިބްރާހިމް އާސިމް ވަކިކުރި ސަބަބެއް އެ ކުންފުނިން ވެސް އަދި ސަރުކާރު ހިއްސާވާ ކުންފުނިތައް ބަލަހައްޓަމުންދާ ޕްރަވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވެސް އަދި ނުބުނެ އެވެ. އެކަމަކު އެއީ ހަރަދު ކުޑަކުރުމަށް އެ މަގާމުތައް އުވާލުމަށްފަހު ނިންމި ނިންމުމެއް ކަމަށް ބައެއް މަސްދަރުތަކުން ކިޔައިދީފައިވެ އެވެ.

ސޯޝަލް މީޑިއާ ޕްލެޓްފޯމެއް ކަމަށް "އެކްސް" ގައި ބައްސާމް ލިޔުއްވާފައިވާ ގޮތުގައި އެ މަގާމުން އޭނާ އިސްތިއުފާ ދެއްވީ އެވެ.

"ރައީސް މުއިއްޒުގެ ޚަރަދު ކުޑަކުރުމުގެ ފިޔަވަޅުތަކަށް ފުރިހަމަ އިހުތިރާމާއެކު އިސްތިއުފާ ދީފިން،" އޭނާ އިސްތިއުފާ ދެއްވި ސަބަބު ކަމަށް އެކްސްގައި ލިޔުއްވާފައިވެ އެވެ.

އެމްއެމްޕީއާރުސީގައި ހޭދަކުރެއްވި ދުވަސްވަރުގައި މުވައްޒަފުންގެ ދުޅަހެޔޮކަން އިތުރު ކުރުމަށާއި، ޑެސްޓިނޭޝަން މާކެޓިން ކުރިއެރުވުމަށާއި، ބައިނަލްއަގުވާމީ ޕާޓްނަރޝިޕްތައް ކުރިއެރުވުމަށް މަސައްކަތް ކުރެއްވި ކަމަށް ވެސް އޭނާ ލިޔުއްވާފައިވެ އެވެ. ލިބުނު ފުރުސަތަށް ޝުކުރު އަދާ ކުރެއްވާ ކަމަށް ވެސް ވިދާޅުވި އެވެ.

"ރައީސް މުއިއްޒަށް ހާއްސަ ޝުކުރެއް ދަންނަވަން، ކުންފުނީގެ އެންމެ އުނދަގޫ ދަނޑިވަޅުގައި ކުންފުނި ހިންގުމަށް އަޅުގަނޑަށް އިތުބާރު ކުރެއްވި ކަމަށް ޓަކައި, އަޅުގަނޑު އުންމީދު ކުރަނީ ކުރިއަށް އޮތް ތަނުގައި ވެސް އެއްބާރުލުން ދީ، މި ސިނާއަތުގެ ކުރިއެރުމަށް އެހީތެރިކަން ފޯރުކޮށްދިނުން," އިތުރަށް ލިޔުއްވާފައިވެ އެވެ.