މިއުނިކް (ޖުލައި 10) - ފްރާންސްގެ ކެޕްޓަން، ކީލިއަން އެމްބާޕޭ ދެކޭގޮތުގައި، މި ފަހަރުގެ ޔޫރޯ ފުޓްބޯޅަ މުބާރާތަކީ އޭނާ އަށް ފެއިލިއާއެއް ކަމަށް ބުނެފި އެވެ.

ފްރާންސް ކެޓީ، ރޭ ކުުޅުނު ޔޫރޯ ފުޓްބޯޅަ މުބާރާތުގެ ސެމީ ފައިނަލުގައި ސްޕެއިން އަތުން 2-1 އިން ބަލިވުމުންނެވެ. އެމްބާޕޭ ދިން ބޯޅައަކުން ރަންޑަލް ކޯލޯ މުއާނީ ޖެހި ގޯލުން ފްރާންސް އިން ލީޑުނެގި ނަމަވެސް، 16 އަހަރުގެ ލަމީން ޔަމާލް އާއި ޑެނީ އޯލްމޯ ޖެހި ގޯލުތަކުން، ސްޕެއިނުން ފުރަތަމަ ހާފުގައި ނަތީޖާ އަނބުރާލައި މެޗުން މޮޅުވީ އެވެ.

މެޗަށް ފަހު، އެމްބާޕޭ ދިން އިންޓަވިއުއެއްގައި ބުނީ، ޔޫރޯގައި އޭނާ ވީ ފެއިލް ކަމަށެވެ.

"އަހަރެން ބޭނުންވީ ތަށި ހޯދަން. އެކަން ހާސިލްނުވީމަ އެ ދެން ފެއިލްވީ، އެ ނޫން އިތުުރު ކަމަކަށް ޓާގެޓެއް ނުކުރަން،" އެމްބާޕޭ ބުންޏެވެ.

އަންނަ ސީޒަނުން ފެށިގެން ރެއާލް މެޑްރިޑަށް ކުޅެން ތައްޔާރުވަމުން އަންނަ އެމްބާޕޭ ބުނީ، ދެން ވިސްނުން ހުރީ ފުޓްބޯޅައިން ރަނގަޅު ބްރޭކެއް ނަގައި، ހަށިގަނޑު އެއްކޮށް ފިޓްވާ ވަރަށް އަރާމްކުރުމަށް ފަހު އެނބުރި އައުމަށް ކަމަށެވެ.

މި ފަހަރުގެ ޔޫރޯގައި އެމްބާޕޭގެ ނޭފަތުގެ ކަށިގަނޑަށް ލިބުނު އަނިޔާއަކާ ހެދި އޭނާ އަށް އެއް މެޗު ގެއްލުނުއިރު، ދެން ކުޅުނު މެޗުތަކުގައި މާސްކް އަޅައިގެން ކުޅެން ޖެހުމުން އުނދަގޫތަކެއް ކުރިމަތިވި އެވެ. އެކަމަކު، ރޭގެ ސެމީ ފައިނަލުގައި އެމްބާޕޭ ކުޅުނީ މާސްކް ނާޅަ އެވެ.

ރިޕޯޓްތައް ބުނާގޮތުން، އެމްބާޕޭ، ވަރަށް އަވަހަށް ނޭފަތުގެ އޮޕަރޭޝަނެއް ކުރާ ގޮތަށް ވަނީ ހަމަޖެހިފަ އެވެ.

ފްރާންސާ އެކު 2018 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި އެމްބާޕޭ، އެ ޓީމަށް ޔޫރޯގެ ދެ މުބާރާތް ކުޅެދިންއިރު، ޖެހުނީ އެންމެ ލަނޑެކެވެ. އެއީ، މި ފަހަރުގެ މުބާރާތުގައި ޕޮލެންޑް ކޮޅަށް ޖެހި ޕެނަލްޓީ އެވެ. އެންމެ ފަހުން ޔޫރޯގައި ފްރާންސް ކެޓީ ގަދަ 16 ޓީމުގެ ބުރުން ޕެނަލްޓީ ޖަހައިގެން ސްވިިޒަލެންޑް އަތުން ބަލިވުމުންނެވެ. އެ މެޗުގައި، އެމްބާޕޭ ޖެހި ޕެނަލްޓީ ވީ ނާކާމިޔާބެވެ.