ނިއު ދިއްލީ، އިންޑިއާ (ޖުލައި 7) - ޓީ20 ވޯލްޑް ކަޕްގެ ޗެމްޕިއަންކަން ހޯދި އިންޑިއާ ގައުމީ ޓީމަށް، އިންޑިއާގެ ކްރިކެޓް ބޯޑު (ބީސީސީއައި) އިން 15 މިލިއަން ޑޮލަރުގެ ފައިސާގެ އިނާމެއް ދީފި އެވެ.

އިންޓަނޭޝަނަލް ކްރިކެޓް ކައުންސިލް (އައިސީސީ) ވަނީ ޗެމްޕިއަންކަން ހޯދި އިންޑިއާ ޓީމަށް 2.45 މިލިއަން ޑޮލަރު ދީފަ އެވެ. މީގެ އިތުރުން، އައިސީސީ އިން ވަނީ މުބާރާތުގައި ކޮންމެ ޓީމެއް މޮޅުވި ކޮންމެ މެޗަކަށް ބޯނަހެއްގެ ގޮތުގައި، 31،154 ޑޮލަރު ދީފަ އެވެ.

މި ފަހަރު އައިސީން މި ވަނީ ޓީ20 ކްރިކެޓް ވޯލްޑް ކަޕްގެ ޕްރައިޒް ޕޫލް ބޮޑުކޮށްފަ އެވެ. މި ފަހަރުގެ މުބާރާތުގެ އިނާމް ފައިސާގެ ޖުމްލަ، 11.25 މިލިއަން ޑޮލަރަށް ބޮޑުކޮށްފަ އެވެ. މީގެ ކުރިން، 2022 ވަނަ އަހަރު ބޭއްވި މުބާރާތުގެ ފައިސާގެ އިނާމްގެ ޖުމްލަ އުޅެނީ 5.6 މިލިއަން ޑޮލަރުގަ އެވެ.

އެންމެ ފަހުން، 2022 ވަނަ އަހަރުގެ ޓީ20 ވޯލްޑް ކަޕް ކާމިޔާބުކުރި އިންގްލެންޑަށް ލިބުނު ފައިސާގެ އިނާމަށް ވުރެ މި ފަހަރު، 850،000 ޑޮލަރު އިތުރެވެ. އެ ގޮތުން، 2022 ވަނަ އަހަރުގެ ޓީ20 ވޯލްޑް ކަޕްގެ ޗެމްޕިއަންކަން ހޯދި އިންގްލެންޑަށް ލިބުނީ، 1.6 މިލިއަން ޑޮލަރު އެވެ.

މި ފަހަރު ރަނަރަޕަށް ދިޔަ ދެކުނު އެފްރިކާ އަށް 1.28 މިލިއަން ޑޮލަރު ލިބުނުއިރު، 2022 ވަނަ އަހަރުގެ ރަނަރަޕް ޕާކިސްތާނަށް ލިބުނީ 800،000 ޑޮލަރު އެވެ. އަދި މި ފަހަރު ތިން ވަނަ އަށް ދިޔަ އަފްގާނިސްތާނާއި އިންގްލެންޑަށް 787،500 ޑޮލަރު ލިބުނެވެ. އެ ގޮތުން، 2022 ވަނަ އަހަރު ސެމީ ފައިނަލުން ބަލިވި ޓީމުތަކަށް ލިބުނީ، 400،000 ޑޮލަރެވެ.