ނިއު ދިއްލީ، އިންޑިއާ (ޖެނުއަރީ 14) - އިންޑިއާގެ ފާސްޓް ބޯލަރު، ޖަސްޕްރީތު ބުމްރާގެ ބުރަކަށްޓަށް ލިބުނު އަނިޔާ ހީކުރި ވަރަށް ވުރެ ސީރިއަސް ކަމަށް ރިޕޯޓްތައް ބުނެފި އެވެ.

އިންޑިއާ އިން މި މަހުގެ 22 އިން އަންނަ މަހުގެ ދެ ވަނަ ދުވަހުގެ ނިޔަލަށް އިންގްލެންޑާ ދެކޮޅަށް ކުޅޭ ޓީ20 ސީރީސްގައި ބުމްރާ، 31، އަށް އަނިޔާގެ ސަބަބުން ނުކުޅެވޭތީ އޭނާ ވަނީ ސްކޮޑުން ވަކިވެފަ އެވެ. އެއީ، ޗެމްޕިއަންސް ޓްރޮފީ އަށް ފިޓްވުމުގެ ގޮތުން އައި ނިންމުމެއް ކަމަށް، އިންޑިއާ ކްރިކެޓް ބޯޑާ ހަވާލާދީ މީޑިއާތަކުން ވަނީ ރިޕޯޓްކޮށްފަ އެވެ.

ދާދި ފަހުން، ޓެސްޓް ކްރިކެޓްގައި 200 ވިކެޓް ހަމަކޮށް ރެކޯޑެއް ހެދި ބުމްރާ އަށް އަންނަ މަހުގެ ޗެމްޕިއަންސް ޓްރޮފީ މުބާރާތް ގެއްލުމުގެ ބިރު އެބައޮތް ކަަމަށް މިދިޔަ ދެ ދުވަހު އިންޑިއާ މީޑިއާތަކުން ވަނީ ރިޕޯޓްކޮށްފަ އެވެ.

ފެބްރުއަރީ 19 އިން މާޗް 9 ވަނަ ދުވަހުގެ ނިޔަލަށް ކުރިއަށްދާ ޗެމްޕިއަންސް ޓްރޮފީ މުބާރާތުގައި، އިންޑިއާ އާއި ޕާކިސްތާން ލައްވާލީ ނިއު ޒީލެންޑާއި ބަންގްލަދޭޝާ އެކު ގްރޫޕް އޭގަ އެވެ. އިންޑިއާ އިން މި މުބާރާތުގައި ކުޅޭ މެޗުތައް އޮތީ ދުބާއީގަ އެވެ.

އިންޑިއާ އަށް މި މުބާރާުތުގެ ގްރޫޕް ސްޓޭޖުގެ މެޗުތައް ބުމްރާ ނުލައި ކުޅެން ޖެހުމުގެ ބިރު އެބައޮތެވެ. އެހެންކަމުން، ސްކޮޑު ނަގާއިރު ބުމްރާ ހިމަނާނަމަ، ގްރޫޕް ސްޓޭޖުގައި ނުކުޅެވޭ ކުޅުންތެރިއަކު ސްކޮޑަށް ނެގުމުގެ އެ ރިސްކު އިންޑިއާ އިން ނަގާނެތޯ ވެސް މީޑިއާ އިން އަންނަނީ ސުވާލު އުފައްދަމުންނެވެ.

ޗެމްޕިއަންސް ޓްރޮފީ ގްރޫޕްގެ ފުރަތަަމަ މެޗުގައި އިންޑިއާ އިން އަންނަ މަހުގެ 20 ގައި ކުޅޭނީ ބަންގްލަދޭޝްއާ އެވެ. ދެ ވަނަ މެޗުގައި، އަންނަ މަހުގެ 23 ގައި ޕާކިސްތާނާ ކުޅޭނެ އެވެ. އަދި، ގްރޫޕްގެ ފަހު މެޗުގައި، އަންނަ މާޗް މަހު ދެ ވަނަ ދުވަހު، ނިއު ޒީލެންޑާ ކުޅޭނެ އެވެ.