ސަރުކާރުގެ 100 ޕަސެންޓް ހިއްސާ އޮންނަ ރޯޑު ޑިވެލޮޕްމެންޓު ކޯޕަރޭޝަން (އާރުޑީސީ) އަށް ސޯޝަލް މީޑިއާގައި ފާޑުކީ މީހަކާ ދިމާލަށް އެ ކުންފުނީގެ ރަސްމީ އެކައުންޓަކުން ހުތުރު އަވަގުރާނަ ގޮވައިފި އެވެ.

ސޯޝަލް މީޑިއާގައި އަވަގުރާނަ ގޮވައި ރައްދު ދިނީ އެކްސްގައި އާރުޑީސީއިން ބޭނުންކުރާ ރަސްމީ އެކައުންޓެއް ކަމަށްވާ "އާރުޑީސީ މީޑިއާ" ގެ ނަމުގައި ހިންގާ އެކައުންޓުންނެވެ. އެ ޕޯސްޓު ކުރިތާ ކުޑަ އިރުކޮޅެއް ތެރޭ ވަނީ ޑިލީޓުކޮށްފަ އެވެ.

މިކަމާ ގުޅޭ ގޮތުން މިހާތަނަށް އާރުޑީސީގެ ރަސްމީ ބަހެއް ލިބިފައެއްނުވެ އެވެ. ނަމަވެސް އެ މައްސަލައިގައި ގިނަ ބަޔަކު ދަނީ ސޯޝަލް މީޑިއާގައި އެ ކުންފުންޏަށް ފާޑުކިޔަމުންނެވެ.

އާރުޑީސީގެ އެކައުންޓުން ރައްދުދިނީ، އެ ކުންފުނިން ހަރަދުކުޑަކުރަން ނިންމާފައިވަނިކޮށް ބޮޑު މުސާރަ ލިބޭ ގޮތަށް ދެ ކޮންސަލްޓަންޓަކު ނެގި މައްސަލާގައި އާންމު މީހަކު ފާޑުކިޔާ ކޮށްފައިވާ ޕޯސްޓަކަށެވެ. ނަމަވެސް އެ ދެ ކޮންސަލްޓަންޓުން ނަގާފައިވާކަން އެ ކުންފުނިން މިއަދު ވަނީ "އަދަދު" އަށް ކަށަވަރުކޮށްދީފަ އެވެ.

އާރުޑީސީއިން ރިޕެއާ އެންޑް މެއިންޓަނަންސް ކޮންސަލްޓަންޓަކަށް ނަގާފައިވަނީ މޭޖާ ރިޓަޔާޑް އަލީ ނަޖީބް އެވެ. އެޗްއާރު ކޮންސަލްޓަންޓަކަށް ނަގާފައިވަނީ ޣުފްރާން އަބްދުލްޣަނީ އެވެ.

"ކޮންސަލްޓަންޓަކަށް [މުސާރައިގެ ގޮތުގައި] އުޅޭނީ ގާތްގަނޑަކަށް 35،000ރ. ވަރު،" މުސާރައާ ގުޅޭ ގޮތުން ސުވާލުކުރުމުން އެ ކުންފުނިން ބުންޏެވެ.

އެ މީހުން ނަގާފައިވަނީ މަދުވެގެން އަހަރެއްހާ ދުވަހުގެ މުއްދަތަކަށެވެ. އެހެންކަމުން ދެ ކޮންސަލްޓުންގެ މުސާރައިގެ ގޮތުގައި ކުރިއަށް އޮތް އަހަރު އާރުޑީސީއިން 840،000ރ. ހަރަދުކުރާނެ އެވެ.