ތިނަދޫ ސިޓީއަށް ފެނަކައިން ފެން ފޯރުކޮށްދިނުމަށް ގެންގުޅޭ ޕްލާންޓަށް މައްސަލަތަކެއް ދިމާވެ، ފެނުގެ ކޮލެޓީ އާއި ލިބުމުގެ މައްސަލަތަކެއް ދިމާވާތާ ފަސް މަސްދުވަސް ވެފައިވާ ކަމަށް ތިނަދޫގެ މޭޔަރު، ސައުދު އަލީ މިއަދު ވިދާޅުވެއްޖެ އެވެ.

ތިނަދޫ ސިޓީގައި ފެނުގެ ހިދުމަތް ދެމުންދާ ފެނަކަ ކުންފުނިން ދަނީ އެކި ގަޑިތަކަށް ބަހައިގެން އެ ސިޓީން ފެން ކަނޑަމުންނެވެ. އެކަމާ ގުޅިގެން އެ ސިޓީގެ ރައްޔިތުން ދަނީ ސޯޝަލް މީޑިއާގައި ވެސް ކަންބޮޑުވުން ފާޅުކުރަމުންނެވެ.

އެކަމާ ގުޅިގެން "އަދަދު" އާ ވާހަކަ ދައްކަވަމުން ސައުފު ވިދާޅުވީ މިދިޔަ ޖެނުއަރީ މަހުން ފެށިގެން ފެނުގެ މައްސަލަތަކެއް ދިމާވަމުން އަންނަ ކަމަށާއި ބައެއް ސަރަހައްދުތަކަށް ލިބޭ ފެނުގެ ކޮލެޓީ ވެސް އެހައި ރަނގަޅު ނޫން ކަމަށް ބުނެ ކައުންސިލަށް ޝަކުވާ ވެސް ލިބެމުން އަންނަ ކަމަށެވެ.

"ޖެނުއަރީން ފެށިގެން [ފެނ ޕްލާންޓުގެ] ފިލްޓާ ސިސްޓަމަށް މައްސަލަތަކެއް ކުރިމަތިވެގެން އުޅެނީ، ޑެއިލީ ބޭނުންވާ މިންވަރަށް ޕްލާންޓުން މިހާރު ފެނެއް ނުއުފެއްދޭ، ރަށުގެ ދެބައިކޮށްފައި އެއްބައި މީހުން ބޭނުން ކުރަނީ ސަޕްލައި ފެން، ވަޅު ފެން ބޭނުން ކުރާ މީހުންގެ އަދަދު ދަނީ މަދުވަމުން،" ސައުދު ވިދާޅުވި އެވެ.

ފެނުގެ ހިދުމަތަށް ބުރޫއަރާތާ ފަސް ފަސްދުވަހަށްވުރެ ގިނަ ދުވަސް ފާއިތުވެފައިވާއިރު ވެސް އެ މައްސަލަ ހައްލު ކުރަން އެކަށީގެންވާ ވަރުގެ މަސައްކަތެއް ފެނަކައިން ކުރަމުން ނުދާ ކަމަށް ސައުދު ވިދާޅުވި އެވެ. ތިނަދޫގައި ތިބި ޓެކްނީޝަނުން އެމީހުންނަށް ކުރެވޭ މިންވަރަކުން މައްސަލަ ހައްލު ކުރަން މަސައްކަތް ކުރި ނަމަވެސް އެކަމަށް ބޭނުންވާ ފުރިހަމަ އެހީތެރިކަން ފެނަކައިން ލިބޭ ކަމަށް ގަބޫލު ނުކުރެވޭ ކަމަށް ވެސް ސައުދު ވިދާޅުވި އެވެ.

"ކުންފުނީގެ ފަރާތުން އެކަން ހައްލު ކުރަން އެކަށީގެންވާ ވަރުގެ މަސައްކަތެއް ނުކުރޭ، މިތަނުގައި ތިބޭ ޓެކްނީޝަނުން އެމީހުންނަށް ކުރެވޭ ވަރަކަށް މަސައްކަތް ކުރޭ ހައްލު ކުރަން، އެންވަރަމެންޓު މިނިސްޓަރު ވެސް އިއްޔެ ވަޑައިގެންނެވި، އެކަމަކު މިނިސްޓަރު ވަޑައިގެންނެވިޔަސް ބޭނުންވާ ސަމާނު ކުންފުނިން ފޯރުކޮށްނުދޭ ކަމަށްވަންޏާ ހައްލެއް ނުވާނެތާ،" ސައުދު ވިދާޅުވި އެވެ.

ސައުދު ވިދާޅުވީ ކައުންސިލުގެ އެދުމަކީ ވީހައިވެސް އަވަހަކަށް ފެނުގެ މައްސަލަ ހައްލުކޮށް ތިނަދޫ ސިޓީގެ ރައްޔިތުންނަށް މެދުނެކެނޑި ފެނުގެ ހިދުމަތް 24 ގަޑިއިރު ލިބޭނެ ގޮތެއް ފަހިވުން ކަމަށެވެ.

"ކައުންސިލުން ބޭނުންވަނީ ވީހައިވެސް އަވަހަކަށް އެކަން ހައްލު ކޮށްދިނުން، ރާއްޖެއިން ނުލިބޭ އެއްޗެއްވިއްޔާ ރާއްޖެއިން ބޭރުން ވެސް ހޯދައިގެން އެކަން ހައްލު ކޮށްދިނުން،" ސައުދު ވިދާޅުވި އެވެ.

ތިނަދޫ ސިޓީއަކީ 10،000 އަށްވުރެ ގިނަ މީހުންގެ އާބާދީއެއް އޮންނަ ސިޓީއެކެވެ. ތިނަދޫއަށް ސިޓީއެއްގެ ދަރަޖަ ދިނީ މިދިޔަ ވެރިކަމުގަ އެވެ.

ތިނަދޫއަކީ ރާއްޖޭގައި ކަނޑައެޅުނު ފަސް ވަނަ ސިޓީ އެވެ. ތިނަދޫގެ އިތުރުން، ސިޓީއެއްގެ ދަރަޖަ ދީފައިވަނީ ވެރިކަންކުރާ މާލެ ސަރަހައްދާއި އެންމެ ދެކުނުގައިވާ އައްޑު އަތޮޅާއި ފުވައްމުލަކު އަދި ރާއްޖޭގެ އުތުރުން ހދ. ކުޅުދުއްފުއްޓަށެވެ.