ދުނިޔޭގެ ކޯޗުކަމަށް ދުނިޔޭގެ އެކިކަންކޮޅުތަކުން 291 އެޕްލިކޭޝަން ލިބިފައިވާ ކަމަށް އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) އިން ހާމަކޮށްފި އެވެ.

މީގެ ވިއްސަކަށް ދުވަސް ކުރިން، އިންޑިއާގެ ގައުމީ ފުޓްބޯޅަ ޓީމުގެ ކޯޗަކަށް ހުރި، ކްރޮއޭޝިއާގެ އީގޯ ސްޓިމަކް ވަނީ ވަކިކޮށްފަ އެވެ. ކޮންޓްރެކްޓްގައި ބާކީ އަހަރެއް އޮއްވައި، ސްޓިމަކް ވަކިކުރުމުން، އޭނާ ވަނީ އޭއައިއެފްއެފް އަށް އިންޒާރެއް ދިނުމަށް ފަހު، ފައިސާ ދޭން އަންގައިފަ އެވެ.

ސްޓިމަކް، އިންޑިއާ ފުޓްބޯޅަ ފެޑެރޭޝަނަށް ގިނަ ތުހުމަތުތަކެއް ކުރި ނަމަވެސް އެ އަށް ނުބަަލައި، އެ ފެޑެރޭޝަނުން އަންނަނީ އާ ކޯޗެއް ހޯދުމުގެ މަސައްކަތް ކުރަމުންނެވެ. އެ ގޮތުން، އިންޑިއާގެ ކޯޗުގެ މަގާމަށް ކުރިމަތިލާން ހުޅުވާލި މުއްދަތު ހަމަވިއިރު، 291 އެޕްލިކޭޝަން ލިބިފައިވާ ކަމަށް އިންޑިއާ ފުޓްބޯޅަ ފެޑެރޭޝަނާ ހަވާލާދީ އެ ގައުމުގެ މީޑިއާތަކުން އަންނަނީ ރިޕޯޓްކުރަމުންނެވެ.

އެ ގޮތުން، ފެޑެރޭޝަނުން ފޯރުކޮށްދީފައިވާ މައުލޫމާތަށް ބަލާއިރު، އެ 291 އެޕްލިކޭޝަންގެ ތެރެއިން، 100 ކޯޗުންނަކީ ޕްރޯ ލައިސަންސް ހާސިލްކޮށްފައިވާ ކޯޗުންނެވެ. އަދި 20 ކޯޗުން އަތުގައި އޭއެފްސީ ޕްރޯ ލައިސަންސް އޮތްއިރު، ތިން ކޯޗެއް އަތުގައި، ދެކުުނު އެމެރިކާ ފުޓްބޯޅަ ފެޑެރޭޝަން، ކޮންމެބޯލްގެ ޕްރޯ ލައިސަންސް އެބައޮތެވެ.

މި ކޯޗުންގެ ތެރެއިން، އިންޑިއާ ފުޓްބޯޅަ ފެޑެރޭޝަންގެ ޓެކްނިކަލް ޑިޕާޓްމަންޓުން ލިސްޓުކުރާ ކޯޗުންނާ އިންޓަވިއު ކުރުމަށް ފަހު ވަރަށް އަވަހަށް އިންޑިއާ ޓީމަށް ކޯޗެއް ހަމަޖެއްސުމުގެ މަސައްކަތް ނިންމާލެވޭނެ ކަމަށް އިންޑިއާގެ ފުޓްބޯޅަ ފެޑެރޭޝަނުން ވަނީ ބުނެފަ އެވެ.

ރިޕޯޓްތައް ބުނާގޮތުން، އިންޑިއާގެ ކޯޗުކަމަށް ކުރިމަތިލާފައިވާ ކޯޗުންގެ ތެރޭގައި، 2022 ވަަނަ އަހަރު ގަތަރުގައި ބޭއްވި ވޯލްޑް ކަޕްގައި ޓީމުތަކަށް އިރުޝާދުދީފައިވާ ކޯޗުން ވެސް ހިމެނެ އެވެ.