ޕެރޫގައި މި އަހަރު ކުރިއަށްގެންދަން ނިންމާފައިވާ ދުނިޔޭގެ 20 އަހަރުން ދަށުގެ އެތުލެޓިކްސް މުބާރާތުގައި ރާއްޖޭން ވާދަކުރާނެ އެތުލީޓެއްގެ ގޮތުގައި، މަރިޔަމް ރޫޔާ އަލީ ހޮވިއްޖެ އެވެ.

ލީމާގައި އަންނަ މަހުގެ 27-31 އަށް ކުރިއަށްދާ 20 އަހަރުން ދަށުގެ ދުނިޔޭގެ މުބާރާތުގައި ވާދަކުރުމުގެ ފުރުސަތު ރޫޔާ، 19، އަށް ލިބުނީ އެ ކެޓަގަރީން ރާއްޖޭގެ އެންމެ ބާރު އެތުލީޓު ކަމަށްވުމުންނެވެ.

ބެންކް އޮފް މޯލްޑިވްސްގެ އެތުލީޓް ސްކޮލަޝިޕް ޓްރެއިނިން ޕްރޮގްރާމްގެ އެހީގައި، ޖެމެެއިކާގައި ޓްރެއިނިން ހަދާފައިވާ ރޫޔާ ވަނީ މިދިޔަ އަހަރެއްހާ ދުވަހު ބޮޑެތި ކުރިއެތުންތަކެއް ހޯދައިފަ އެވެ.

ރާއްޖޭގެ ތާރީހުގައި ވެސް އަންހެން އެތުލީޓަކު، 100 މީޓަރު ރޭސް 12 ސިކުންތަށް ވުރެ އަވަހަށް ނިންމުމުގެ ޝަރަފް ހޯދީ ރޫޔާ އެވެ. އެ ގޮތުން، މިދިޔަ މެއި މަހު، ޖެމެއިކާގައި ކުރިއަށްދިޔަ ޖޭއޭއޭއޭ އޯލް ކަމާސްގެ އިވެންޓުގައި ދުވެ، ރޫޔާ، ރޭސް ނިންމީ، 11.87 ސިކުންތުންނެވެ. އެ މަހުގެ ކުރީކޮޅުގައި ވެސް ރޫޔާ ވަނީ 100 މީޓަރު ދުވުމުގެ ރެކޯޑް މުގުރާލައިފަ އެވެ. އެ ފަހަރު ރޭސް ނިންމީ، 12.02 ސިކުންތުން ދުވެގެންނެވެ.

ބައިނަލްއަގުވާމީ މުބާރާތެއްގައި ފުރަތަމަ ފަހަރަށް 2022 ވަނަ އަހަރުގެ ބާމިންހަމް، ކޮމަންވެލްތުގޭމްސްގައި ދުވުނު ރޫޔާ އަކީ މި ވަގުތަށް ބަލާއިރު ރާއްޖޭގެ އެންމެ އުންމީދީ އަންހެން އެތުލީޓެވެ.

މިދިޔަ މާޗް މަހު، ޖެމެއިކާގައި ކުރިއަށްދިޔަ ވެލޯސިޓީ ފެސްޓް 14 ގައި ވާދަކޮށް، ރޫޔާ ވަނީ 200 މީޓަރު ދުވުމުގެގައުމީ ޖޫނިއާ ރެކޯޑް މުގުރާލައިފަ އެވެ. ރޫޔާ، ފަހުން ރެކޯޑް ހެދި ޓައިމިން އަކީ، 25.11 ސިކުންތެވެ.