ޕީޖީ އޮފީހުގައި އޮތީ، ނިޒާމުތަކަށް ބަރޯސާވާގޮތަށް މަސައްކަތް ބައްޓަންކޮށްފައި ކަމަށާއި, ކޮރަޕްޓް ނެޓްވޯކްތައް ނައްތާލައި، މައުލޫމާތު އާންމު ކުރުމުގެ މާހައުލުގެ ތެރޭގައި ކޮރަޕްޝަނަށް ދިރި ނޯވެވޭނެ ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެ އެވެ.

ޕީޖީ އޮފީހުން ނެރޭ އުންސުރުގެ ހަތް ވަނަ އަދަދުގައި 'ޕްރޮސެކިއުޓާ ޖެނެރަލްގެ ގަލަމުން' ޝަމީމް ލިޔުއްވާފައިވާ ލިޔުމެއްގައި ވަނީ, ރާއްޖޭގައި އޮތް ކޮރަޕްޝަނުގެ މައްސަލައަށް އަލިއަޅުއްވާލައްވާފަ އެވެ.

"ދިވެހިރާއްޖޭގެ ތަރައްގީއަށް ކުރިމަތިވެފައިވާ އެންމެ ބޮޑު މައްސަލައަކީ، އޭގެ ހުރިހާ މާނައަކާއި ސިފައެއްގައި، ކޮރަޕްޝަން. ކޮރަޕްޝަންގެ ސަބަބުން އިގްތިސޯދީ، އިޖްތިމާއީ އަދި ސިޔާސީ ހަމަޖެހުމާއި ކުރިއެރުމަށް ވެސް އަސަރުކޮށް، ދައުލަތަށް މީހުން ކުރާ އިތުބާރު ކުޑަވޭ," އޭނާ ލިޔުއްވާފައިވެ އެވެ.

ޝަމީމް ވިދާޅުވީ ޖިނާއީ އަދުލުގެ ނިޒާމު އެކުލެވިގެންވަނީ ގިނަ އިދާރާތަކެއްގެ މައްޗަށް ކަމަށް ވިޔަސް, މުޅި ނިޒާމު އެކީ މަސައްކަތް ކުރަންޖެހޭތީ، އެ ދާއިރާގެ އެންމެ ގުނަވަނެއްގައި ކޮރަޕްޝަންގެ ތުހުމަތު އޮތަސް ވެސް މުޅި ނިޒާމަށް ރައްޔިތުން ކުރާ އިތުބާރަށް އޭގެ ނުރަނގަޅު އަސަރު ކުރާ ކަމަށެވެ. އަދި އެކަން ހައްލުކުރެވޭނީ ކޮންމެ އިދާރާއެއް ވަކިން، އަދި ހުރިހާ އިދާރާއެއް އެއްކޮށްވެސް ކޮރަޕްޝަން ނައްތާލުމަށް ހަރުދަނާ މަސައްކަތްތަކެއް ކޮށްގެން ކަން އޭނާ ފާހަގަ ކުރެއްވި އެވެ.

ޝަމީމް ވަނީ ކޮރަޕްޝަން ނައްތާލުމަށް ޕީޖީ އޮފީހުގައި ކުރާ ތިން ބާވަތެއްގެ މަސައްކަތެއް ފާހަގަކޮށްފަ އެވެ.

ފުރަތަމަ ކަމަކީ، އޭނާ ވިދާޅުވި ގޮތުގައި އޮފީހުގެ މަސައްކަތްތައް މީހުންނަށް ބަރޯސާނުވެ، ނިޒާމުތަކަކަށް ބަރޯސާވާ އުސޫލަކަށް ރުކުރުވައިލުމެވެ. އަދި އޮފީހުގެ ކޮންމެ ނިންމުމަކީ ވެސް ލިޔެފައި ހުރި އުސޫލުތަކަކާއި އެސްއޯޕީތަކެއްގެ މައްޗަށް، މަދުވެގެން ތިން މީހުންގެ ބައިވެރިވުން ހިމެނިގެން ނިންމާ ނިންމުމަކަށް ހެދުމެވެ.

"އޭރުން ކޮރަޕްޓް ވިޔަސް ވާނީ ތިން މީހުން އެއްކޮށެވެ. މިއީ، ވުމަށްވުރެ ނުވުން ގާތް ކަމެއް," ޝަމީމް ލިޔުއްވި އެވެ.

ދެވަނަ ކަމެއްގެ ގޮތުގައި ޝަމީމް ފާހަގަ ކުރެއްވީ ކޮންމެ މަސައްކަތެއް ކުރާ މީހަކުވެސް، އަހަރަކު އެއްފަހަރު ބަދަލުވުމުގެ ސަގާފަތެވެ. އެއީ ކޮރަޕްޓް ނެޓްވޯކެއް އުފެދުމަށް ފުރުސަތު ނުދިނުމަށެވެ. ތިން ވަނަ ކަމެއްގެ ގޮތުގައި ޝަމީމް ވިދާޅުވީ މައުލޫމާތު ހާމަކުރުމެވެ.

"ޕީޖީ އޮފީހުގެ ފަލްސަފާއަކީ، ކޮންމެ ކަމެއްގެ އަސްލަކީ ވެސް ހާމަކުރުން ކަމެވެ. އެހެން ގޮތަކަށް ގާނޫނުގައި ނުވަތަ މައްސަލައެއްގައި އަނިޔާ ލިބުނު މީހެއްގެ ހާއްސަ މަސްލަހަތެއް ނެތްނަމަ، ހުރިހާ މައުލޫމާތެއް އާންމު ކުރުމެވެ. ޖަވާބުދާރީ ކުރުވަން ފުރުސަތު ދިނުމެވެ. މައުލޫމާތު އާންމުނުކޮށް، ޖަވާބުދާރީ ކުރުވުމަކީ ކުރެވޭނެ ކަމެއް ނޫނެވެ," ޝަމީމް ލިޔުއްވި އެވެ.

ޕީޖީ އޮފީހުގައި އޮތީ، ނިޒާމުތަކަށް ބަރޯސާވާގޮތަށް މަސައްކަތް ބައްޓަންކޮށްފައިކަން ފާހަގަކޮށް ޝަމީމް ވިދާޅުވީ ކޮރަޕްޓް ނެޓްވޯކްތައް ނައްތާލައި، މައުލޫމާތު އާންމު ކުރުމުގެ މާހައުލުގެ ތެރޭގައި ކޮރަޕްޝަނަކަށް ދިރި ނޯވެވޭނެ ކަމަށެވެ.