މިއުނިކް (ޖުލައި 1) - މި ފަހަރުގެ ޔޫރޯ ފުޓްބޯޅަ މުބާރާތުގައި ނޭފަތުގެ ކަށިގަނޑަށް ލިބިފައިވާ އަނިޔާއަކާ ހެދި އޮޕަރޭޝަން ކުރެވެންދެން، ކީލިއަން އެމްބާޕޭ، މާސްކެއް އަޅައިގެން ކުޅެން ޖެހިފައިވާއިރު، އެ ގޮތަށް ހުރެ ކުޅެން އުނދަގޫ ކަމަށް އޭނާ ބުނެފި އެވެ.

މި ފަހަރުގެ ޔޫރޯގައި ފްރާންސް ކުޅުނު ފުރަތަމަ މެޗުގައި، އޮސްޓްރިއާއާ ދެކޮޅަށް، އެމްބާޕޭގެ ނޭފަތު ކަށިގަނޑަށް ލިބުނު އަނިޔާއާ ހެދި އެ މެޗުގައި އޭނާ ބަދަލުކުރި އެވެ. ގިނަ ޓެސްޓްތަކެއް ހެދިއިރު، އެމްބާޕޭގެ ނޭފަތު ކަށިގަނޑުގެ އޮޕަރޭޝަނެއް ކުރަން ޖެހޭކަން ކަށަވަރުވި ނަމަވެސް އޭނާ ވަނީ ޔޫރޯ އަށް ފަހު އެކަން ކުރަން ނިންމައިފަ އެވެ.

ގްރޫޕް ސްޓޭޖުގައި ފްރާންސް ކުޅުނު ދެ ވަނަ މެޗުގައި، ނެދަލެންޑްސްއާ ދެކޮޅަށް އެމްބާޕޭ، 25، ބޭނުމެއް ނުކުރެ އެވެ. އެކަމަކު، ފަހު މެޗުގައި އެމްބާޕޭ ވަނީ ޕޮލެންޑާ ދެކޮޅަށް ކުޅެ ލަނޑު ޖަހައިފަ އެވެ.

ފްރާންސް އިން ނޮކައުޓް ބުރުގައި ކުޅޭ ފުރަތަމަ މެޗުގައި މިރޭ ބެލްޖިއަމްއާ ބައްދަލުކުރާނެ އެވެ. އެ މެޗުގެ ކުރިން އެމްބާޕޭ ވަނީ މާސްްކް އަޅައިގެން ކުޅެން ޖެހުމާ ބެހޭގޮތުން ވާހަކަ ދައްކައިފަ އެވެ.

"މާސްކް އެއް އަޅައިގެން ކުޅެން ވަރަށް އުނދަގޫ، މި ޖެހެނީ މާސްކް އަވަސް އަވަހަށް ބަދަލުކުރަން. ކޮންމެ ފަަހަރަކު އާ އުނދަގުލެއް ތަހައްމަލުކުރަން އެބަޖެހޭ،" އެމްބާޕޭ ބުންޏެވެ.

"ދެން، އިތުރު ޗޮއިސް އެއް ނެތް. އަޅައިގެން ކުޅެން ޖެހޭ މުއްދަތުގައި އެކަން ކުރަން ޖެހިފައި މި އޮތީ. ކިތަންމެ އުނދަގޫ ވިޔަސް މި ހާލަތުގައި އޮތީ މި ގޮތަށް ކުރިއަށް ދިއުން،"

އެމްބާޕޭ، ކުޅުމަށް އެނބުރި އަންނަން މާސްކެއް އަޅަން ނިންމިއިރު، އޭނާ ބޭނުންކުރަން ފުރަތަމަ ފަރުމާކުރި މާސް އަޅަން ހުއްދަ ނުލިބުނެވެ. ޔުއެފާގެ ގަވާއިދު ބުނާގޮތުން މެޑިކަލް ކަމެއްގައި ކުޅުންތެރިއަކު ބޭނުންކުރާ މާސްކް ފަދަ އެއްޗެއް ހުންނަން ޖެހޭނީ އެއް ކުލައެއްގަ އެވެ. އެކަމަކު، އެމްބާޕޭ މާސްކް ހެދީ ފްރާންސްގެ ދިދައިގެ ތިން ކުލަޔާއި އޭނާގެ ބްރޭންޑް ނަން ހިމަނައިގެންނެވެ. އެ މާސްކް ބޭނުންކުރަން ޔުއެފާ އިން ހުއްދަ ނުދިނުމުން، އެމްބާޕޭ އެޅީ އެއްކޮށް ކަޅު ކުލައިގެ މާސްކެކެވެ.