މިއަހަރުގެ ތެރޭގައި ގދ. އަތޮޅު ކައުންސިލުން ތުރުކީ އަށާއި ދުބާއީއަށް ކުރި ދަތުރުކަށް 837,000ރ. ހަރަދުކޮށްފައިވާ ކަމަށް ވިދާޅުވެ ކައުންސިލްތަކުން މާލީ ޒިންމާދާރުކަމެއް ނެތި ހަރަދުކުރާތީ ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް ކަންބޮޑުވުން ފާޅުކުރައްވައިފި އެވެ.

ދައުލަތުގެ ފިސްކަލް ޒިންމާގެ ބިލަށް ބަހުސް ކުރައްވަމުން ދިއްގަރު ދާއިރާގެ މެންބަރުކަން ވެސް ކުރައްވާ ނާޒިމް ވިދާޅުވީ ފިސްކަލް ޒިންމާއަށް ޒިންމާވުމުގެ ބާރު ދައުލަތުގައި ނެތް ހާލަތު މިހާރު އޮތް ބައެއް ގާނޫނުތަކުގެ ސަބަބުން ފަހިވެފައިވާ ކަމަށެވެ. ކައުންސިލްތަކުގެ ގާނޫނުގެ ދަށުން ދީފައިވާ ބާރު ކައުންސިލްތަކުން ހިފަނީ އެއްވެސް މާލީ ޒިންމާދާރުކަމެއް ނެތި ކަމަށް އޭނާ ވިދާޅުވި އެވެ.

"ބްލޮކް ގްރާންޓްގެ ގޮތުގައި 2024 ގައި 2.2 ބިލިއަން ރުފިޔާ ސަރުކާރުން ކައުންސިލްތަކަށް އެބަދޭ. އަތޮޅު ކައުންސިލްތަކުން އިގުތިސޯދު މިހާ ދަތިވެފައި އޮތް ދަނޑިވަޅެއްގައި އަތޮޅު ކައުންސިލްތަކުން ތުރުކީ އާއި ދުބާއީ އާއި ބެންކޮކަށް ދަތުރުކުރަމުންދާކަން ފާހަގަކުރަން," ނާޒިމް ވިދާޅުވި އެވެ.

އަންނަ ޖުލައި 26, ގެ ބަންދުގައި ވެސް ހއ. އަތޮޅު ކައުންސިލަރުން ބެންކޮކް ދަތުރެއް ރާވާފައިވާ ކަމަށް ވިދާޅުވެ ނާޒިމް ވަނީ މިއަހަރުގެ ތެރޭގައި ގދ. އަތޮޅު ކައުންސިލުން ބޭރަށް ކުރި ދަތުރެއްގެ ތަފްސީލު ހިއްސާކުރައްވާފަ އެވެ.

"ގދ. އަތޮޅު ކައުންސިލަރުން 12 ދުވަހަށް ތުރުކީއަށް ތިން ދުވަހަށް ދުބާއީއަށް ދަތުރުކުރުމަށް 837,078.96ރ. ހަރަދުކޮށްފައިވޭ. ޑޮލަރު ގަތީ ކަޅު ބާޒާރުން 17.60ރ. އަށް. މިއީއެއް ނޫން އަޅުގަނޑުމެން ކުރަންވީ ކަމަކީ. އަޅުގަނޑުމެން އެބަޖެހޭ ޒިންމާދާރުވާން," ނާޒިމް ހާމަކުރެއްވި އެވެ.

ކައުންސިލްތަކުގެ ގާނޫނަށް ގެނަން ޖެހޭ އިސްލާހެއް ގެނެސްގެން ނަމަވެސް ދައުލަތުގެ ވިސްނުމާ އެއްގޮތަށް ކައުންސިލްތަކުގެ ވިސްނުން ވެސް އެއްގޮތް ކުރައްވާނެ ކަމަށް އޭނާ ވިދާޅުވި އެވެ.

ގދ. އަތޮޅު ކައުންސިލްގެ ރައީސަކީ ޕީޕީއެމްގެ ޓިކެޓުގައި އިންތިހާބުވެވަޑައިގެންނެވި ހަސަން ފައިހަތު ގުދުރަތުالله އެވެ. އޭނާގެ އިތުރުން އެ ކައުންސިލުގައި އެމްޑީޕީގެ ހަތަރު މެންބަރުންނާއި ޕީޕީއެމް/ޕީއެންސީގެ ހަތަރު މެންބަރުން އަދި މިނިވަން މެންބަރަކު ހިމެނެ އެވެ.