ކުޑަކުދިންނަށް އިސްހާލީ އަދި ރިހެބިލިޓޭޝަން ޕްރޮގްރާމްތައް ހިންގުމަށް މަރުކަޒެއް ބިނާ ކުރުމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.

އެފަދަ މަރުކަޒެއް އަޅަން ނިންމާފައިވާ ކަމަށް މީގެ ކުރިން ހޯމް މިނިސްޓަރު އަލީ އިހުސާން ވެސް ވަނީ ވިދާޅުވެފަ އެވެ. މަރުކަޒު އަޅަން ރައީސް ނިންމެވީ މިނިސްޓަރު ހުށަހެޅުއްވި ކަރުދާހެއްގެ މައްޗަށް ބިނާކޮށް ކަމަށް ރައީސް އޮފީހުން ބުނެ އެވެ.

އެ މަރުކަޒު ބިނާ ކުރާނީ މީހުން ދިރިނުއުޅޭ ރަށެއްގައި ކަމަށް ވެސް ރައީސް އޮފީހުން ބުންޏެވެ.

"ކުށަށް އަރައިގަތުމުގެ ނުރައްކަލުގައި ތިބޭ ކުދިންނާއި އެކި ސަބަބުތަކަށް ޓަކައި ކުށަށް އަރައިގަންނަން މެދުވެރިވާ ކުޑަކުދިންނަށް ބޭނުންވާ ފަރުވާ އާއި އެހީތެރިކަން ފޯރުކޮށްދިނުމަށްޓަކައި ކުޑަކުދިންގެ އަދުލުގެ ގާނޫނުގެ ދަށުން ބަޔާންކުރާ "ލޯންގް ޓާމް ރެސިޑެންޝަލް ކެއަރ ފެސިލިޓީ" މީހުން ދިރިނޫޅޭ ވަކި ރަށެއްގައި [ކުރިން މީހުން ދިރިއުޅެފައި، އުމްރާނީ ތަރައްގީގެ ކަންކަން ހަމަޖެހިފައިވާ ރަށެއްގައި] ގާއިމުކުރުމަށް ނިންމަވާފައިވޭ،" ރައީސް އޮފީހުން ބުނެފައިވެ އެވެ.

މީގެ ކުރިން ހޯމް މިނިސްޓަރު އިހުސާން ވިދާޅުވެފައި ވަނީ ކުށަށް އަރައިގަތުމުގެ ފުރުސަތު އޮތް ކުދިން އެތަނަށް ގެންދިޔުމަށްފަހު 18 އަހަރު ފުރުމުން ފުލުހުން ނުވަތަ ސިފައިންގެ ވަޒީފާއަށް ވައްދާނެ ކަމަށެވެ. މުޖްމަތަމައަށް އެ ކުދިން ދޫކޮށްލާނީ އޭގެ ފަހުން ކަމަށް ވެސް އޭނާ ވިދާޅުވެފައިވެ އެވެ.