ބާލިން (ޖޫން 29) - އެންމެ ފަހުގެ ޗެމްޕިއަން، އިޓަލީ 2-0 އިން ބަލިކޮށް، އެ ޓީމު ކަޓުވާލުމަށް ފަހު، ސްވިޒަލެންޑުން ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގެ ފުރަތަމަ ޖާގަ ހޯދައިފި އެވެ.

ސްވިޒަލެންޑުން މި ވަނީ ޖެހިޖެހިގެން ދެ ޔޫރޯގެ ކުއާޓާ ފައިނަލުން ފުރުސަތު ހޯދައިފަ އެވެ. އެންމެ ފަހުން ޔޫރޯގެ ގަދަ 16 ގައި އެ ޓީމުން ފްރާންސް ކަޓުވާލިއިރު، މި ފަހަރު މި ވަނީ އިޓަލީ ގެއަށް ފޮނުވާލައިފަ އެެވެ. ސްވިޒަލެންޑް މިިދިޔަ ފަހަރު ކެޓީ ކުއާޓާގައި ސްޕެއިން އަތުންނެވެ.

މި މެޗަށް ނުކުތްއިރު އިޓަލީ އަށް ވަނީ މައްސަލަތަކެއް ކުރިމަތިވެފަ އެވެ. އެ ގޮތުން، ގްރޫޕް ސްޓޭޖުގައި އެ ޓީމަށް ތިން މެޗުގައި ވެސް ކުޅުނު ދެ ޑިފެންޑަރުން ކަމަށްވާ ރިކާޑޯ ކަލަފިއޯރީ އާއި ފެޑެރީކޯ ޑި މާކޯ ނުލައި ކުޅެން ޖެހުމެވެ. އެ ގޮތުން، ޑި މާކޯ އަށް އަނިޔާއާ ހެދި މެޗު ގެއްލުނުއިރު، ކަލަފިއޯރީ ހުރީ ދެ ރީނދޫ ކާޑު ހަމަވެގެން ސަސްޕެންޝަނުގަ އެވެ.

ބާލިން އޮލިމްޕިކް ސްޓޭޑިއަމްގައި މިރޭ ކުޅުނު މެޗު ފަށައިގެން ސްވިޒްލެންޑުން މެދުތެރޭގެ ކޮންޓްރޯލް ނަގައިގެން ކުޅެން ފެށިއިރު، އިޓަލީން އެކަން ހުއްޓުވަން ކުރި މަސައްކަތުގައި އެ ޓީމުގެ ބްރަޔާން ކްރިސްޓަންޓޭ އަށް ގިނަ ފައުލުތަކެއް ކުރަން ޖެހުނެވެ.

ސްވިޒަލެންޑްގެ ފްރެއުލާ އިޓަލީގެ ގޯލަށް ބޯޅަ ފޮނުވާލަނީ.---

ފުރަތަމަ ހާފުގައި އިޓަލީގެ ގޯލްކީޕަރު، ޖިއަންލުއީޖީ ޑޮނަރުންމާ އަށް ގިނަ ހަމަލާތަކެއް ހުއްޓުވަން ޖެހުނެވެ.

އެ ގޮތުން، މެޗުގެ 24 ވަނަ މިނިޓްގައި ސްވިޒަލެންޑްގެ ފަބިއަން ރައިޑާ ކުރިއަށް ދިން ބޯޅައެއްގައި އިޓަލީގެ ޑިފެންސްލައިނުގެ އޮފްސައިޑް މަޅިން ސަލާމަތްވެ، ސްވިޒަލެންޑްގެ ފޯވާޑް، ބްރީލް އެމްބޯލޯ މުޅިން ހުސްކޮށް އޭރިއާތެރެއަށް ވަދެ، ޖެހި ބޯޅަ ކީޕަރު ޑޮނަރުންމާ ވަނީ މަތަކޮށްފަ އެވެ.

ސްވިޒަލެންޑުން ފުރަތަމަ ހާފުގައި ކުޅުނު ރަނގަޅު ކުޅުމުގެ ނަތީޖާ ފެނުނީ، 37 ވަނަ މިނިޓްގަ އެވެ. އޭރިއާތެރެއަށް ބޯޅަ އަށް އެރި ރެމޯ ފްރެއުލާ ވަނީ ގޯލުގެ ކައިރީ ކަނަށް ބޯޅަ ފޮނުވާލައިގެން، ސްވިޒަލެންޑަށް ލީޑުނަގައިދީފަ އެވެ. ރުބެން ވާގާސް ދިން ބޯޅައަކުން ފްރެއުލާ ޖެހި ބޯޅަ ގޯލަށް ވަނީ އިޓަލީގެ ކުޅުންތެރިއަކު ގައިގައި ޖެހިފަ އެވެ.

ކައުންޓަ އެޓޭކުގައި އިޓަލީގެ ފެޑެރީކޯ ކިއޭޒާ އަށް ލިބުނު ބައެއް ފުރުސަތުތަކުގައި އެޓޭކެއް ކުރެވޭތޯ ބެލި ނަމަވެސް ސްވިޒަލެންޑްގެ ކީޕަރު ޔެން ސޮމާ ޓެސްޓް ކޮށްލެވޭ ގޮތެއްނުވި އެވެ.

ފުރަތަމަ ހާފުގެ އިތުރު ވަގުތުގައި، ސްވިޒަލެންޑްގެ ރައިޑާ ހިލޭ ޖެހުމަކުން ޖެހި ބޯޅަ ބޭރުވީ ކީޕަރު ޑޮނަރުންމާ އަތުގައި ޖެހި، ދަނޑީގައި ވެސް ޖެހިފަ އެވެ.

ސްވިޒަލެންޑްގެ ފްރެއުލާ ލަނޑު ޖެހުމަށް ފަހު އުފާފާޅުކުރަނީ.

ދެ ވަނަ ހާފް ފަށައިގެން އިޓަލީން ކުޅުން ފެށި ނަމަވެސް ތަފާތު ދެއްކީ ސްވިޒަލެންޑުންނެވެ. މި ހާފްގެ ކުޅުން ފެށިގެން 27 ސިކުންތުގެ ތެރޭގައި ސްވިޒަލެންޑުން ދެ ވަނަ ލަނޑު ޖެހި އެވެ. އޭރިއާތެރެއިން ވާގާސް އަށް ލިބުނު ބޯޅަ އޭނާ ވަނީ ގޯލުގެ މަތީ ކަނަށް ފޮނުވާލައިފަ އެވެ.

ބަދަލުތަކެއް ގެނެސްގެން އިޓަލީން ލަނޑެއް ޖެހޭތޯ ކުރި މަސައްކަތުގައި އެ ޓީމުން ފުރުސަތުތަކެއް ތަނަވަސްކުރި އެވެ. އެ ގޮތުން، ބަދަލަކަށް ކުޅެން އެރި އިޓަލީގެ މަޓެއާ ޒަކާނިއޭ ދިން ބޯޅައެއްގައި މުޅިން ހުސްކޮށް އަރައި، ޖިއަންލޫކާ ސްކަމާކާ އަށް ރަނގަޅަށް ފޮނުވާލެވޭ ގޮތެއްނުވި އެވެ. އަނެއްކޮޅުން، ބަދަލަކަށް އެރި މަޓެއޯ ރެޓެގީ ޖެހި ބޯޅަ ސްވިޒަލެންޑްގެ ކީޕަރު، ސޮމާ ވަނީ މަތަކޮށްފަ އެވެ.

އިޓަލީން ގިނަ ވަގުތު ކުރިއަށް ޖެހިގެން ކުޅުނު ނަމަވެސް ސްވިޒަލެންޑުން ރަނގަޅަށް ޑިފެންސްކޮށް ވަނީ ނަތީޖާގައި ހިފަހައްޓައި މޮޅުވެފަ އެވެ. މިއީ ސްވިޒަލެންޑަށް ތާރީހީ މޮޅެކެވެ.

ކުއާޓާ ފައިނަލުގައި ސްވިޒަލެންޑުން ކުޅޭނެ ޓީމެއް އެނގޭނީ ގަދަ 16ގައި ޖޯޖިއާ އާއި ސްޕެއިން ކުޅޭ މެޗުންނެވެ.