ބާލިން (ޖޫން 29) - ޔޫރޯ ފުޓްބޯޅަ މުބާރާތުގެ ގަދަ 16 ބުރުގައި މިރޭ ސްވިޒަލެންޑާ ދެކޮޅަށް އިޓަލީން ކުޅޭ މެޗު އެ ޓީމަށް ހާއްސަވާ ސަަބަބެއް އެބައޮތެވެ. އެއީ، މި މެޗު ކުޅޭ ދަނޑު، ބާލިންގެ އޮލިމްޕިކް ސްޓޭޑިއަމް އަކީ، އިޓަލީން 2006 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ދަނޑު ކަމަށްވުމެވެ. މެޗުގެ ކުރިން އިޓަލީ ޓީމުން ވަނީ އެކަން ފާހަގަކޮށްފަ އެވެ.

"އެންމެން ހަނދާން އެބަހުރި އަހަރެމެން ބާލިންގައި އެ ހޯދި ކާމިޔާބީތަކުގެ އުފާފާޅުކުރި ގޮތް. އެއީ، 2006 ވަނަ އަހަރުގެ ވޯލްޑް ކަޕްގެ އުފާފާޅުުކުރުންތައް ފެށިގެންދިޔަތަން. އަހަރެމެންގެ ކޯޗިން ޓީމުގައި އެބަހުރި ބުފޮން، އެ ވާހަކަތައް އޭނާ ހިއްސާކޮށްފި،" އިޓަލީގެ ކޯޗު ލޫޝިއާނޯ ސްޕަލެއްޓީ ބުންޏެވެ.

"އަހަރެމެންނަށް ގޭގައި ތިބެ އުފާފާޅުކުރަން ލިބުނު އެ 2006ގެ ކަންކަމުގެ ހަނދާންތަކާ އެކު، އެ ދަނޑުގައި މި ފަހަރު ވެސް ކޮންމެ ވެސް އުފަލެއް ހާސިލްކުރަން ބޭނުން،"

އެންމެ ފަހުގެ ޔޫރޯގެ ޗެމްޕިއަން، އިޓަލީން ގަދަ 16 ބުރަށް ދަތުރުކުރީ ފަހު ސިކުންތު ކޮޅުގެ ތެރޭގައި، ކްރޮއޭޝިއާ ކޮޅަށް ޖެހި ލަނޑުން 1-1 އިން އެއްވަރުކޮށްގެންނެވެ. އިޓަލީ ނޮކައުޓްގެ ފުރުސަތު ހޯދީ ގްރޫޕްގެ ދެ ވަނަ ޓީމުގެ ގޮތުގަ އެވެ.

އިޓަލީގެ ކޯޗު ސްޕަލެއްޓީ: އޭނާ ދެކޭގޮތުގައި ސްވިޒަލެންޑަކީ އިޓަލީ އަށް އުނދަގޫ ޗެލެންޖެއް،

ސްޕަލެއްޓީ ބުނީ އިޓަލީގެ އަސްލު ފެންވަރުގައި އަދި މި މުބާރާތުގައި ނުކުޅެވެނީ، ކޮންމެވެސް "ޕްރެޝަރެއް"ގައި ތިބެ ކުޅެން ހަނދައިގެން ކަމަށެވެ.

"ފުރަތަމަ ކަަމަކަށް އަަހަރެމެން ގްރޫޕް ސްޓޭޖު ފަހަނައަޅައިދިޔައީ ހައްގު ނަތީޖާތަކެއް ނެރެގެން، އެންމެ ފަހު ވަގުތުގައި ލަނޑު ޖަހައި މި ހިސާބުގައި މި ތިބީ، އެ ގާބިލުކަން ދައްކައިގެން،" ސްޕަލެއްޓީ ބުންޏެވެ. "ކަންކަން ރަނގަޅުކުރަންވީ، ހަމަޖެހިލައިގެން ރޭވުންތެރިކަމާ އެކީގައި މި މެޗު ކުޅެންވީ، އެއީ މީގެ މޮޅެއް ހޯދައިގެން ނޫނީ ކުރިއަކަށް ނުދެވޭނެ،"

ސްވިޒަލެންޑަކީ ޔޫރޯގެ ނޮކައުޓް ބުރުގައި ޖެހިޖެހިގެން ތިން ވަނަ ފަަހަރު ވާދަކުރާ ޓީމެއް ކަމަށާއި މުބާރާތުގައި އަދި ބަލިނުވެ އޮތުމުން އެ ޓީމުގެ ރޫހު ރަނގަޅުވާނެ ކަމަށް ސްޕަލެއްޓީ ވެސް ގަބޫލުކުރެ އެވެ. އެހެންކަމުން، އިޓަލީން މި މެޗަށް ދޭން ޖެހޭ ސަމާލުކަން އިތުުރު ކަމަށް ސްޕަލެއްޓީ ގަބޫލުކުރެ އެވެ.

އިޓަލީ އާއި ސްވިޒަލެންޑްގެ މެޗު ފަށާނީ މިރޭ 9 ޖަހާއިރު އެވެ.