ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ "ގާތްވުމަށް" ސިހުރު ހެދިކަމަށް ތުހުމަތުކޮށް ހައްޔަރުކޮށްފައިވާ ފާތިމަތު ޝަމްނާޒް ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރު ކަމުން ވަކިކޮށްފި އެވެ.
ޝަމްނާޒް ހައްޔަރުކުރި ހަބަރު އިއްޔެ 'އަދަދު' އިން ރިޕޯޓުކުރި އިރު ތިމާވެއްޓާ ބެހޭ މިނިސްޓްރީގެ ވެބްސައިޓުގައި ސިޔާސީ މުވައްޒަފުންގެ މައުލޫމާތު ހިމަނާފައިވާ ޕޭޖުގައި ޝަމްނާޒަކީ ސްޓޭޓް މިނިސްޓަރެެއްގެ ގޮތުގައި ލިސްޓްކޮށްފައި އޮތެވެ. ނަމަވެސް މިއަދު އޭނާ ވަނީ ކުރީސް ސިޔާސީ މުވައްޒަފުންގެ ބަޔަށް ބަދަލުކޮށްފަ އެވެ.
އެ މިނިސްޓްރީގެ ވެބްސައިޓުގައިވާ ގޮތުން ޝަމްނާޒް މިނިސްޓްރީގެ ސްޓޭޓް މިނިސްޓަރެއްގެ ގޮތުގައި ހުރީ އޭޕްރީލް 4, 2024 އިން ޖޫން 26, 2024ގެ ނިޔަލަށެވެ.
ޝަމްނާޒް, ކުރީގެ ސިޔާސީ މުވައްޒަފުންގެ ބަޔަށް ބަދަލުކޮށްފައި
ސިހުރު ހެދި ކަމަށް ތުހުމަތުކޮށް ޝަމްނާޒް ހައްޔަރު ކުރީ މިދިޔަ އާދީއްތަ ދުވަހެވެ. އޭގެ ކުރިން ޝަމްނާޒް ދިރިއުޅެމުންދިޔަ ގެ ކޯޓު އަމުރެއްގެ ދަށުން ފުލުހުން ބަލައި ފާސް ކުރި އެވެ. އަދި އެގެއިން ބައެއް ތަކެތި ވެސް ފުލުހުން ގެންދިޔަ އެވެ. ޝަމްނާޒުގެ ފޯނު ވެސް އޮތީ ފުލުހުންގެ ބެލުމުގެ ދަށުގަ އެވެ.
ޝަމްނާޒާއެކު އޭނާގެ އެއްބަނޑު އެއްބަފާ ކޮއްކޮ, އާއި ހައްވާ ސަނާ ސަލީމާއި ސިހުރު ހެދި ކަމަށް ބުނާ އެހެން މީހަކު ވެސް ހައްޔަރުކުރި އެވެ. އެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން ހުޅުމާލެ މެޖިސްޓްރޭޓް ކޯޓުން ވަނީ ހަތް ދުވަހުގެ މުއްދަތެއް ޖަހައިދީފަ އެވެ.
