ހުޅުމާލެ ފޭސް 2 ގެ ހިޔާ ފްލެޓެއްގެ ކޮރިޑޯއެއްގައި މީހަކަށް އަނިޔާ ކުރާ ވީޑިއޯއެއްގެ މައްސަލަ ފުލުހުން ބަލަން ފަށައިފި އެވެ.

ފުލުހުން ބުނީ އަނިޔާކުރި މައްސަލަ ޖޫން 19، ގައި ސަމާލުކަމަށް އައިސްފައިވާ ކަމަށާއި ނަމަވެސް އެ އަމަލު ހިންގި މީހުން މިހާތަނަށް ދެނެގަނެވިފައި ނުވާ ކަމަށެވެ.

ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި މީހަކު ބިން މައްޗަށް ވައްޓާލައި ފައިން ބޮލުގައި ޖަހާތަން ފެނެ އެވެ. އަދި އަތުން ވެސް ގައިގައި ޖަހާފައިވެ އެވެ.

ނަމަވެސް އެ ވީޑިއޯއިން ފެންނަނީ 18 އަހަރުން ދަށުގެ ކުއްޖެއް ކަމެއް ނުވަތަ 18 އަހަރުން މަތީގެ މީހެއް ކަމެއް މިހާތަނަށް ސާފުވެފައެއް ނުވެ އެވެ.

އެ ވީޑިއޯއާ ގުޅޭ އެއްވެސް މައުލޫމާތެއް ލިބިފައިވާނަމަ އެ މައުލޫމާތު ހިއްސާކޮށް ދިނުމަށް ފުލުހުން ވަނީ އެދިފަ އެވެ. އަދި މައްސަލަ ތަހުގީގު ކުރަމުންދާ ކަމަށް ފުލުހުން ވަނީ ބުނެފަ އެވެ.

ހިޔާ ފްލެޓުގައި ކުށް ކުރުން އިތުރަވަމުން އަންނައިރު، ދާދި ފަހުން ހިޔާ ފްލެޓުގައި އޮޅުވާލައިގެން މީހުން އެޕާޓްމަންޓްތަކަށް ގެންގޮސް ފޭރޭ މައްސަލައެއްގައި ފުލުހުން ވަނީ ބަޔަކު ހައްޔަރުކޮށްފަ އެވެ.