ރާއްޖެއަށް ދިމާވެފައިވާ މަސްތުވާތަކެތީގެ މައްސަލަ ހައްލުކުރުމަށް ޕްރިވެންޝަންގެ މަސައްކަތްތަކަށް ކުރާ ހޭދަ ބޮޑުކޮށް, އެކި އުމުރުފުރާތަކަށް ޓާގެޓްކޮށްގެން ގައުމީ ފެންވަރުގައި ކުރަމުންދާ ކަމަށް ހޯމްލޭންޑް މިނިސްޓްރީން ބުނެފި އެވެ.

މަސްތުވާތަކެއްޗާ ދެކޮޅަށް މަސައްކަތް ކުރާ ބައިނަލްއަގްވާމީ ދުވަހުގެ މުނާސަބަތުގައި ހޯމް މިނިސްޓްރީން ނެރުނު ބަޔާނުގައި ބުނީ މަސްތުވާތަކެތީގެ މައްސަލަ ހައްލުކުރުމަށް ޕްރިވެންޝަންގެ މަސައްކަތްތަކަށް ކުރާ ހޭދަ ބޮޑުކޮށް, އެކަން ގައުމީ ފެންވަރުގައި ކުރުމުގެ އިތުރަށް ރިކަވަރީގައި ތިބި މީހުންނަށް އާފްޓާކެއާގެ ހިދުމަތްތައް ކުރިއަށްގެންދަން ރާވާފައިވާ ކަމަށެވެ.

ހޯމް މިނިސްޓްރީން ބުނީ މަސްތުވާތަކެތީގެ މައްސަލައަކީ ރާއްޖޭގެ ކޮންމެ ގޭބިސީއަކަށްހެން އަސަރުކޮށްފައިވާ މައްސަލައެއް ކަމަށެވެ. އެހެންކަމުން ޒުވާނުންނާއި ފުރާވަރު އުމުރުގެ ކުދިން މަސްތުވާތަކެއްޗާ ދުރުކުރުމަށް އަދި އޭގެ ނުރައްކާތެރިކަން އެ މީހުން ތަޖުރިބާ ކުރުމުގެ ކުރިން ދުރާލާ ތަފާތު ލައިފް ސްކިލްތަކާއި ދީނީ ކަންކަމަށް ހޭލުންތެރި ކުރުވުމަކީ މުހިންމު ކަމެއް ކަން އެ މިނިސްޓްރީން ފާހަގަކުރެ އެވެ.

މަސްތުވާތަކެއްޗާ ދެކޮޅަށް ދުރާލާ މަސައްކަތް ކުރުމާއެކު އެ މަސައްކަތުގައި މުޅި މުޖުތަމައު އެކައްޗެއް ކިޔައި, މަސްތުވާތަކެއްޗާ ދެކޮޅަށް މުޅި ގައުމު އަތުގުޅާލުމުގެ މުހިންމު މިނިސްޓްރީން ވަނީ ފާހަގަކޮށްފަ އެވެ.

ހޯމް މިނިސްޓްރީން ބުނި ގޮތުގައި ސަރުކާރުގެ އަމާޒަކީ, އެވިޑެންސް ބޭސްޑް ސްޓްރެޓެޖީތަކާއި ތައުލީމާއި ކޮމިއުނިތީ ޕާޓްނާޝިޕްގެ ޒަރިއްޔާއިން މަސްތުވާތަކެތީގެ ޑިމާންޑް ކުޑަކޮށް, ކުށުގެ ނެޓްވޯކްތައް ނައްތާލައި, ކަމުގެ އަސްލަށް ވާސިލުވުމެވެ. އަދި އެންމެން ގުޅިގެން ކުރާ މަސައްކަތުން މުޖުތަމައަށާއި ރައްޔިތުންނަށް އަމާން, ދުޅަހެޔޮ މުސްތަގުބަލެއް ގާއިމުކޮށްދިނުމެވެ.