ޑޯޓްމަންޑް (ޖޫން 25) - މެޑިކަލް ޓީމުން ހުއްދަދީފިނަމަ ފްރާންސްގެ ކެޕްޓަން ކީލިއަން އެމްބާޕޭ، މިރޭ ޔޫރޯ ފުޓްބޯޅަ މުބާރާތުގައި ޕޮލަންޑާ ދެކޮޅަށް ފްރާންސުން ކުޅޭ މެޗުގައި ފެންނާނެ ކަމަށް އެ ޓީމުގެ ކޯޗު ޑިޑިއޭ ޑެޝޯމްޕްސް ބުނެފި އެވެ.

މި ފަހަރުގެ ޔޫރޯގައި ފްރާންސް ކުޅުނު ފުރަތަމަ މެޗުގައި އެމްބާޕޭގެ ނޭފަތު ކަށިގަނޑަށް ލިބުނު އަނިޔާއާ ހެދި އެ މެޗުގައި އޭނާ ބަދަލުކުރި އެވެ. އޭގެ ފަހުން ފްރާންސް އިން 0-0 ގެ ނަތީޖާ އަކުން ނެދަލެންޑްސްއާ އެއްވަރުވި މެޗުގައި އެމްބާޕޭ އިނީ ބެންޗުގަ އެވެ.

ޕޮލަންޑް މެޗުގެ ކުރިން އެމްބާޕޭ މި މެޗުގައި ފެންނާނެތޯ ނޫސްވެރިން ކުރި ސުވާލަށް ސީދާ ޖަވާބެއް ޑެޝޯމްޕްސް ދީފައި ނުވެ އެވެ. އެކަމަކު، ނުސީދާ ގޮތެއްގައި ޑެޝޯމްޕްްސް ބުނީ, މެޑިކަލް ޓީމުން ހުއްދަ ދީފި ނަމަ އެމްބާޕޭ ޕޮލަންޑް މެޗުގައި ކުޅޭނެ ކަމަށެވެ.

"އެމްބާޕޭ ދުވަހެއް ދުވަހަކަށް އަންނަނީ ރަނގަޅުވަމުން. ޓީމާއެކު ވެސް މިހާރު އަންނަނީ ފަރިތަކުރަމުން. މެޑިކަލް ޓީމުން ހުއްދަ ދީފި ނަމަ ކުރިއަށް އޮތް މެޗުގައި (ޕޮލަންޑް މެޗުގައި) ފެންނާނެ." ޑެޝޯމްޕްސް ބުންޏެވެ.

ނޫސްވެރިންގެ ބައްދަލުވުމުގައި ބައިވެރިވި, ފްރާންސްގެ މިޑްފިލްޑަރު އެންގޯލޯ ކާންޓޭ ވެސް ވަނީ ޕޮލަންޑް މެޗުގައި އެމްބާޕޭ ފެނިދާނެ ކަމުގެ އިޝާރާތެއް ދީފަ އެވެ.

"ނެދަލަންޑްސް މެޗުގައި އަހަރެމެން އަށް ނަސީބު ވެސް އެހީނުވި، ޕޮލަންޑް މެޗުގައި އެމްބާޕޭ އެނބުރި އައިސް ގޯލުތަކެއް ޖަހާދާނެ" ކާންޓޭ ބުންޏެވެ.

ފްރާންސް އިން ޖަރުމަނުގެ ކްލަބެއް ކަމަށްވާ ޕަޑެބޯންގެ 21 އަހަރުން ދަށުގެ ޓީމާ ދެކޮޅަށް ކުޅުނު ޕްރެކްޓިސް މެޗުގެ 60 މިނިޓް އެމްބާޕޭ ވަނީ ކުޅެފަ އެވެ. އެހެންކަމުން، ޕޮލެންޑް މެޗުގައި ކޮންމެ ވެސް ވަރަކަށް އެމްބާޕޭ ބޭނުންކުރާނެ ކަމަށް ބެލެވެ އެވެ.

ގްރޫޕް އޭ އާއި ގްރޫޕް ބީގެ މެޗުތައް ނިމުނު ގޮތުން، ފްރާންސަށް ވަނީ ނޮކައުޓް ބުރު ޔަގީންވެފަ އެވެ.

އެކަމަކު، ގްރޫޕްގެ އެއް ވަނަ ޓީމުގެ ގޮތުގައި ދެ ވަނަ ބުރަށް ދިއުމަށް ފްރާންސް އިން މިރޭގެ މެޗުގައި ޕޮލަންޑް އަތުން ކާމިޔާބު ހޯދަން ޖެހޭނެ އެވެ. މިރޭގެ މެޗު ފަށާނީ 9 ޖަހާއިރު އެވެ.