ލަންޑަން (ޖޫން 24) - މެންޗެސްޓާ ޔުނައިޓެޑްގެ ޑިފެންޑަރު ލޫކް ޝޯ އަށް ޔޫރޯގެ ގްރޫޕް ސްޓޭޖުގައި ނުކުޅެވޭނެ ކަމަށް އެ ޓީމުގެ ކޯޗު އެރިކް ޓެން ހާގު ބުނެފައިވަނިކޮށް، އެ އަށް ރައްދު ދީ އިންގްލެންޑްގެ ކޯޗު ގަރެތު ސައުތުގޭޓް ވާހަަކަ ދައްކައިފި އެވެ.

ޔުނައިޓެޑްގެ ކޯޗު ޓެން ހާގް ވަނީ އިންގްލެންޑުން ގްރޫޕް ސްޓޭޖުގައި ކުޅޭ މެޗުތަކުގައި ޝޯ ފެނުމުގެ ފުރުސަތު ނެތް ކަމަށް ބުނެފަ އެވެ.

ގްރޫޕް ސްޓޭޖުގައި އިންގްލެންޑުން ކުޅުނު ފުރަތަމަ ދެ މެޗުގައި އަނިޔާގެ ސަބަބުން ލޫކް ޝޯ ކުޅެފައިނުވެ އެވެ. ޓީމު ޓްރެއިނިންތަކުގައި ވެސް ޝޯ މާ ރަނގަޅަށް ބައިވެރިނުވެ އެވެެ. އެކަމަކު، ފަހު މެޗުގައި އޭނާ ކުޅުމުގެ ފުރުސަތު އެބައޮތް ކަމަށް ސައުތުގޭޓް ވަނީ ބުނެފަ އެވެ.

އަނިޔާއިން ސަލާމަތްވެ, ޝޯ އަންނަނީ އިންގްލެންޑްގެ ޓީމާ އެކު، މިހާރު ފަރިތަކުރުންތަކުގައި ބައިވެރިވަމުންނެވެ.

ފެބްރުއަރީ މަހުން ފެށިގެން އަނިޔާގެ ސަބަބުން ޝޯ މެޗެއް ކުޅެފައިނުވާއިރު، ސައުތުގޭޓް ބުނީ އިންގްލެންޑުގެ ސްކޮޑުގައި މިހާރު ތިބި ކުޅުންތެރިންނަކީ އެ ކުޅުންތެރިން ކުޅޭ މަގާމަށް ބަލާއިރު އެންމެ މޮޅެތި ކުޅުންތެރިން ކަމަށެވެ.

"މި ސްކޮޑު ވަރަށް ބެލެންސް. މިހާރު ސްކޮޑުގައި މިތިބި ކުޅުންތެރިންނަށް ބަލާއިރު, މި ތިބީ އެއް ފެންވަރެއްގައި ކުޅޭ ކުޅުންތެރިން" ސައުތުގޭޓް ބުންޏެވެ.

ޝޯ އަކީ އިންގްލެންޑް ޓީމުގައި ވާތު ބެކަށް ކުޅެން ނެގި ކުޅުންތެރިޔާ އެވެ. އެކަމަކު، އޭނާ ފިޓްނުވާތީ، ސައުތުގޭޓް އަންނަނީ އެ މަގާމަށް އެހެން ކުޅުންތެރިން ބޭނުންކުރަމުންނެވެ. އޭގެ ތެރެއިން އެއް ކުޅުންތެރިއަކީ ކަނާތު ބެކަށް އާންމުކޮށް ކުޅޭ ކިއެރަން ޓްރިޕިއޭ އެވެ.

އިންގްލެންޑް ޓީމަށް ކުރިން ކުޅެފައިވާ ލެޖެންޑުން ދެކޭގޮތުގައި، ސައުުތުގޭޓް މި ފަހަރުގެ ޔޫރޯ އަށް ސްކޮޑު ނެގީ އެންމެ ރަނގަޅަށް ބަލާފައި، ނެގެން އޮތް އެންމެ ރަނގަޅު ކުޅުންތެރިން ނޫން ކަމަށެވެ.