މިއުނިކް (ޖޫން 24) - މިހާރު ކުރިއަށްދާ ޔޫރޯ ފުޓްބޯޅަ މުބާރާތުގެ މެޗުތައް ކުރިއަށްދާ ވަގުތު ކުޅުންތެރިންނާ އެކު ސެލްފީ ނަގަން ދަނޑަށް އަރާ ސަޕޯޓަރުންގެ ނިސްބަތް އިތުރު ވަމުން އަންނާތީ، ޔުއެފާ އިން ސެކިއުރިޓީގެ ޕްރޮޓޮކޯލްތައް ވަރުގަދަ ކުރަން ނިންމައިފި އެވެ.

އެންމެ ފަހުން ތުރުކީއާ ދެކޮޅަށް ޕޯޗުގަލް އިން 3-0 އިން ކުރިހޯދި މެޗުގައި އެކަނި ވެސް ކްރިސްޓިއާނޯ ރޮނާލްޑޯއާ އެކު ސެލްފީ ނަގަން ދަނޑަށް ފަސް ސަޕޯޓަރަކު އެރި އެވެ. އެންމެ ފުރަތަމަ ކުޑަ ކުއްޖެއް އެރިއިރު، ފަހުން އެރީ ދޮށީ އުމުރުގެ މީހުންނެވެ.

ޕޯޗުގަލްގެ ކޯޗު ރޮބާޓޯ މާޓީނޭޒް ބުނީ، ސަޕޯޓަރުން ކުޅުންތެރިންނަށް އޮތް ލޯބި ދައްކުވައިދޭން ކޮންމެ ކަމެއް ވެސް ކޮށްފާނެ ކަމަށާއި އެކަމަކު، މިއީ މެޗެއްގެ ތެރެއިން ކުރަން ޖެހޭ ކަހަލަ ކަންތައްތަކެއް ނޫން ކަމަށެވެ.

އެ ގޮތުން، ޔުއެފާ އިން މިހާރު ވަނީ ކުޅުންތެރިންގެ ރައްކާތެރިކަމަކީ އެންމެ ބޮޑު އަހައްމިއްޔަތުތަކެއް ދޭން ޖެހޭ ކަންތައް ކަމަށް ބުނެ، ދަނޑުތަކުގެ ސެކިއުރިޓީ އިތުރަށް ވަރުގަދަކުރަން ނިންމައިފަ އެވެ. އެކަމަކު، ސީދާކޮށް، ސެކިއުރީޓީގެ ކަންކަން އިތުރަށް ރަނގަޅުކުރަންކުރާނެ ކަމެއް ހާމަކުރުމަށް ވުރެ، މި ކަމަކީ ރަނގަޅު ކަމެއް ނޫންކަން ސަޕޯޓަރުން ގަބޫލުކުރަން ޖެހެ އެވެ.

ޔުއެފާ އިން ބުނީ މި ގޮތަށް ދަނޑަށް އަރާ ސަޕޯޓަރުންނަށް ފިޔަވަޅުތަކެއް އަޅާނެ ކަމަށާއި މެޗުތަކަށް ނުވެއްދުމުގެ އިހުތިޔާރު ވެސް ގަވާއިދުގެ ތެރެއިން ލިބޭ ކަމަށެވެ.