ޕްލޭން ކުރިވަރާ ގާތަށް ވެސް މަސައްކަތް ކުރިއަށް ނުގޮސް އޮތް ރަސްމާލެ މަޝްރޫއުގައި ހިމެނޭ ބިން ހިއްކުމުގެ ބައި މިއަހަރުގެ ނިޔަލަށް ނިންމަވާނެ ކަަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

ޕީއެންސީގެ ހަރުގެ ހުޅުވަން މިރޭ ބޭއްވި ޖަލްސާގައި ރައީސް ވިދާޅުވީ ރަސްމާލޭގެ މަސައްކަތް އަންނަ މަހުގެ ތެރޭގައި އަލުން ފެށޭނެ ކަމަށެވެ. އެމަނިކުފާނު ވިދާޅުވި ގޮތުގައި އަންނަ މަހު އެ މަޝްރޫއު ފަށައި އަންނަ ޑިސެމްބަރުގެ ނިޔަލަށް 1،100 ހެކްޓަރުގެ ބިން ހިއްކައި ނިމޭނެ އެވެ.

"މިއަހަރުގެ ޑިސެމްބަރުމަސް ނިމެންވާ އިރަށް އަޅުގަނޑުމެންގެ އަމާޒަކީ، ހަމަ ފުރަތަމަ ވެސް ޕްލޭންކުރި ގޮތަށް، އެތަނުގެ އެއްހާސް އެއްސަތޭކަ ހެކްޓަރުގެ ބިން ހިއްކައި ނިންމުން، އިރާދަކުރެއްވިއްޔާ އެކަން ހާސިލުކުރާނަން،" ރައީސް ވިދާޅުވި އެވެ.

އެމަނިކުފާނު ވިދާޅުވި ގޮތުގައި ރަސްމާލޭގެ މަޝްރޫއު އެގޮތަށް ކުރިއަށް ދާއިރު ގުޅިފަޅާއި ގިރާވަރު ފަޅު އަދި ހުޅުމާލޭގެ ފޭސް ތިނެއް ހިއްކުުމުގެ މަސައްކަތް ވެސް ކުރިއަށްދާނެ އެެވެ.

"އަދި ރާއްޖޭގެ އެކި ކަންކޮޅުތަކުގައި ގެދޮރު ބިނާކުރުމަށް ޓަކައި ހިއްކަން ނިންމާފައިވާ، ވައުދުވެފައިވާ ބިންތައް ހިއްކުމާ މިކަންކަން ހިނގާނެ،" ރައީސް ވިދާޅުވި އެވެ.

އެކަންތައްތައް ކުރިއަށް ގެންދަވާނީ ސަރުކާރުގެ އިގުތިސާދީ އެޖެންޑާގެ ތެރެއިން ޖާގަ ހޯދައިގެން ކަމަށް ވެސް އެމަނިކުފާނު ވިދާޅުވި އެވެ.

ރަސްމާލޭގެ މަޝްރޫއު ހުއްޓުނީ އެ މަޝްރޫއާ ހަވާލުވި ، ސީއެމްސީ އަށް އެ މަޝްރޫއަށް ބޭނުންވާ ފައިސާ ނުހޯދިގެން ކަމަށް ސަރުކާރުން ކުރިން ބުންޏެވެ. އެހެން އެކަން އޮތް އިރު އަންނަ މަހު، އެ މަޝްރޫއު އަލުން ފަށަނީ އާ ބަޔަކާ ހަވާލުކޮށްގެން ކަން ނުވަތަ ނޫން ކަމެއް ރައީސް ވިދާޅެއް ނުވެ އެވެ.

މެއި، 30، ގައި ބޭއްވި ނޫސްވެރިންގެ ބައްދަލުވުމެއް ގައި އިންފްރާސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު ވިދާޅުވީ ރަސްމާލެ މަޝްރޫއު ހުއްޓިފައި އޮތީ އެ މަޝްރޫއު ހަވާލު ކުރި ސީއެމްސީސީ ކުންފުނިން އެ މަޝްރޫއު ކުރިއަށް ގެންދަން ޕްރޮޕޯޒް ކުރި ގޮތަށް އެތަނުގެ މަސައްކަތްތައް ކުރިއަށް ނުގެންދާތީ ކަމަށެވެ.

"އެ ބޭފުޅުންނަށް އެ ބޭފުޅުން ޕްރޮޕޯސް ކުރި ގޮތަށް ފައިނޭންސް ރެއިޒް ނުކުރެވިގެން މަޝްރޫއު ކުރިއަށް ނުގެންދެވިފައި އޮތީ،" މުއްތަލިބު ވިދާޅުވި އެވެ.

މާލޭގެ ދެކުނުން 10 ކިލޯމީޓަރު ދުރުގައި އޮތް 1280 ހެކްޓަރުގެ ފުށިދިއްގަރު ފަޅުން 1153 ހެކްޓަރު ހިއްކަން ފެށީ މިދިޔަ ޑިސެމްބަރު 18، 2023 ގަ އެވެ.

އެ މަޝްރޫއު ކުރިއަށް ގެންދަން ރައީސް މުއިއްޒު ނިންމެވީ އެ މަޝްރޫއު ހިންގުމަށް ބަޖެޓުގައި ހިމެނި 400 މިލިއަން ރުފިޔާ މަޖިލީހުން އުނިކޮށްފައި އޮއްވައި އެކަމަށް ޗެލެންޖު ކުރުމަށްފަހު އެވެ. އެ މަޝްރޫއު ފެށީ ހާމަކަމެއް ނެތި ކުއްލިއަކަށެވެ. އިދިކޮޅު ފަރާތްތަކުންނާއި އާންމުންގެ ތެރެއިން ވެސް ވަރަށް ގިނަ ބަޔަކު އެކަމާ މެދު އޭރު ކަންބޮޑުވުން ފާޅުކުރި އެވެ.

ފުށިދިއްގަރު ފަޅު ހިއްކަން ފެށީ އެތަން ހިއްކާ ކުންފުންޏަށް ހުޅުމާލެއިން 10 ހެކްޓަރު އަދި ރަސްމާލެއިން 60 ހެކްޓަރު ލިބޭ ގޮތަށެވެ.