އޭޑީކޭ ހޮސްޕިޓަލުން ކާމިޔާބުކަމާއެކު މުޅިން އާ ދެ ސާޖަރީއެއް ކޮށްފި އެވެ.

އެ ހޮސްޕިޓަލުން މުޅިން އަލަށް ކޮށްފައި ވަނީ "މިނިމަލީ އިންވެސިވް ސްޕައިން" (އެމްއައިއެސް) ސާޖަރީ އަދި "ތުރީޑީ ޕްރިންޓެޑް ޓައިޓޭނިއަމް ކްރަނިއޮޕްލަސްޓީ" އެވެ.

މި ދެ ސާޖަރީ ކޮށްފައި ވަނީ އޭޑީކޭގައި ގިނަ ދުވަސްތަކެއް ވަންދެން ހިދުމަތް ކުރަމުން އަންނަ ޑރ. އަލީ ނިޔާފްގެ އިތުރުން ޑރ. ކިރަން ނިރައުލާ އެވެ.

އެމްއައިއެސް ސާޖަރީ ޖޫން 3، ގައި އުމުރުން 46 އަހަރުގެ ދިވެހި ފިރިހެނެއްގެ ކުރިއިރު، މިއީ ރާއްޖޭގައި މުޅިން އަލަށް ކޮށްފައިވާ ސާޖަރީއެކެވެ.

މި ސާޖަރީއަށްފަހު ޕޭޝަންޓު ފަސް ދުވަސް ފަހުން ހޮސްޕިޓަލުން ދޫކޮށްލި އެވެ. އަދި ސާޖަރީއަށްފަހު އޭނާގެ ބުރަކަށި އަދި ފައިގައި ރިއްސުމަށް ލުޔެއް ލިބިގެންދިޔަ ކަމަށް އެ ހޮސްޕިޓަލުން ބުނެ އެވެ.

މީގެއިތުރުން އެމްއައިއެސް ސާޖަރީއަށްފަހު މުޅިން އެއްކޮށް އެއް މަސް ތެރޭގައި އެއްކޮށް ރިކަވާވެ އެވެ.

ދެޅުގަޑިއިރު ހޭދަވި ތުރީޑީ ޕްރިންޓެޑް ޓައިޓޭނިއަމް ކްރަނިއޮޕްލަސްޓީ ސާޖަރީ ޖޫން 18، ގައި ކުރެވުނީ އުމުރުން 25 އަހަރުގެ ބިދޭސީ ފިރިހެނެއްގެ އެވެ.

ސާޖަރީއަށްފަހު ޕޭޝަންޓު ފަސް ވަނަ ދުވަހު ހޮސްޕިޓަލުން ދޫކޮށްލެވުނުއިރު، އެއްވެސް މައްސަލައެއް ދިމާވެފައެއް ނުވެ އެވެ. އަދި ޕޭޝަންޓު އެއްކޮށް ހަ ހަފްތާ ތެރޭގައި ރިކަވާ ވާނެ އެވެ.

މި ސާޖަރީކުރަނީ ބޮލަށް ލިބޭ ގެއްލުމަށް ފަރުވާ ދިނުމުގެ ގޮތުންނެވެ. މިގޮތުން ސިކުނޑި ދުޅަވެ، ސިކުނޑިއަށް ލޭ އެޅިގެން ގޯސްވުމުން، މި ސާޖަރީ ކުރުމުން ފަސޭހަތަކެއްވެ އެވެ.

އޭޑީކޭއިން އަންނަނީ ރާއްޖޭގައި ނުކުރެވޭ ގިނަ ސާޖަރީތައް ތައާރަފްކޮށް، މުޅިން އާ ހިދުމަތްތަކެއް ތައާރަފް ކުރަމުންނެވެ.