މާލޭގެ މިސްކިތްތަކުން ވައްކަންކޮށްގެންް މި އަހަރުގެ މިހާތަނަށް 21 މައްސަލަ ފުލުހުންނަށް ހުށަހަޅައިފައިވާ ކަމަށް އެ އިދާރާއިން ބުނެފި އެވެ.

މީޑިއާތަކަށް ފުލުހުން ފޮނުވި މެސެޖުގައި ބުނެފައި ވަނީ އެ މައްސަލަތައް ބަލައި ތަހުގީގު ކުރުމުގެ ތެރޭގައި ގެއްލިގެން ރިޕޯޓު ކުރި ހަ ފަންކާ އާއި ދެ ފޯނުގެ އިތުުރުން ފެން މޯޓަރެއް ހޯދައި މިސްކިތްތަކާ ހަވާލު ކޮށްފައި ވާނެ ކަމަށެވެ.

ފުލުހުންނަށް މިސްކިތްތަކުން ވައްކަން ކުރި 21 މައްސަލައެއް ރިޕޯޓު ކޮށްފައިވާއިރު، މާލޭ، އީދު މިސްކިތުން މިމަހު އެކަނިވެސް 10 ފަންކާ ވަގަށް ނަގާފައިވާ ކަމަށް މާލެ ސިޓީ ކައުންސިލުން ރޭ ވަނީ ބުނެފަ އެވެ.

ސިޓީ ކައުންސިލުން އެ މައުލޫމާތު އާންމު ކުރިތާ 12 ގަޑިއިރު ވެސް ނުވަނީސް ވަނީ އީދު މިސްކިތުން އިތުރު ފަންކާއެއް ވަގަށް ނަގައިފަ އެވެ.

ސިޓީ ކައުންސިލުގެ މީޑިއާ އޮފިޝަލް، އާމިނަތު ޝަތުފާ ވިދާޅުވީ އީދު މިސްކިތުގައި ހުރި ފަންކާތައް ވަގަށް ނަގާފައި ވަނީ ތަޅުވެސް ލާފައި ހުއްޓައި ކަމަށެވެ.

"ފަންކާތައް ވަގަށް ގެންދިޔައީ ޗޭނު ޖަހައި ތަޅުވެސް ލާފައި ހުއްޓާ، ރޭ ފަތިހު ވެސް ވަގަށް ފަންކާއެއް ގެންގޮސްފި،" ޝަތުފާ ވިދާޅުވި އެވެ.

އަދި އެ މިސްކިތުގެ ވީޑިއޯ ފުޓޭޖާއެކު އެ މައްސަލަތައް ފުލުހުންނަށް ހުށަހަޅާނެ ކަމަށް ވެސް ސިޓީ ކައުންސިލުން ވަނީ ބުނެފަ އެވެ.