މި އަހަރު ހައްޖުގެ އަޅުކަން އަދާކުރަން ދިޔަ ދިވެހި ހައްޖުވެރިންގެ ކަންކަން ބެލެހެއްޓުމުގައި ކޮރަޕްޝަން އެކުލެވޭ ކަމުގެ ތުހުމަތުކޮށް, މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅަން ހައްޖާޖީއަކު ނިންމައިފި އެވެ.

ހައްޖުގެ އަޅުކަން ފުރިހަމަ ކުރުމަށްފަހު, އަންނަ އަހަރަށް ރަނގަޅުކޮށްލަން ޖެހޭ ބައެއް ކަންކަން ކަމަށް ބުނެ މިއަހަރު ހައްޖަށް ދިޔަ މުހައްމަދު ނިޒާމް ވަނީ އޭނާގެ ތަޖުރިބާ ފޭސްބުކްގައި ހިއްސާކޮށްފަ އެވެ. އަދި ހިދުމަތް ދިނުމުގައި ހައްޖު ކޯޕަރޭޝަނުން ކޮރަޕްޝަން ހިންގިކަމުގެ ތުހުމަތުކޮށް މައްސަލަ އޭސީސީއަށް ހުށަހަޅަން ގަސްތު ކުރާ ކަމަށް އޭނާ ބުނެފައިވެ އެވެ.

އޭނާ ބުނީ, ހައްޖަށް ގެންދިއުމަށް ނަގާ އަގާ އެއްވަރު ފެންވަރުގެ ހިދުމަތް ނުލިބޭ ކަމަށާއި, ހައްޖާޖީންނާ މެދު އަމަލުކޮށްފައި ވަނީ ލާއިންސާނީ ގޮތަކަށް ކަމަށެވެ. އެގޮތުން, 300 މީހުންގެ ޖާގައިގެ ޓެންޓެއްގައި 500 މީހުން ބައިތިއްބާފައިވުމާއެކު, ހޫނު ގަދަވެގެން ބައެއް ދިވެހިން ނިދަން ކައިރި މިސްކިތަކަށް ދާން ޖެހުނު ކަމަށް އޭނާ ބުންޏެވެ.

ހައްޖުގެ އަޅުކަމަށް ގިނަ އަދަދެއްގެ ފައިސާ ހަރަދުކޮށްފައި ގޮސް, އެއަށް ވުރެ މަދު އެއްޗެއް ހަރަދުކުރި ލަންކާ މީހުންނާ އެއް ޓެންޓެއްގައި އެއް މުތޮއްވިފު ނުވަތަ އެޖެންޓު ހިއްސާ ކުރަންޖެހުނު ކަން ވެސް ނިޒާމް ފާހަގަކުރި އެވެ.

މިއަހަރު ހައްޖަށް ދިޔަ މީހުންގެ ހާލަތު ބަޔާންކޮށް ހައްޖާޖީއަކު ހިއްސާކުރި ފޮޓޯއެއް

ނިޒާމް ބުނި ގޮތުގައި ފުރަތަމަ ދެ ދުވަހު ކާން ދިނީ "ބަންގާޅީ" ކެއުން ކަމަށާއި, އެކަމުގެ ސަބަބުން ދުވަސްވީ ގިނަ މީހުން ނުކައި ތިބި ކަމަށެވެ. އަދި ކާއެއްޗެހި ފޯރުކޮށްދިނުން ލަސް ކަމަށް ވެސް އޭނާ ބުންޏެވެ.

"އެހެންކަމުން ހައްޖުވެރިން އަތުންނެގި ފައިސާއާއި އެއްވަރުގެ ހިދުމަތެއް ނުދެވުނީ މުތޮއްވިފާއި ގުޅިގެން ކޮރަޕްޝަންގެ އަމަލު ހިންގާފައިވާތީ ކަމަށް ތުހުމަތު ކުރެވޭ. މިކަން ތަހުގީގު ކުރުމަށް އޭސީސީ އަށް ހުށަހަޅަން ގަސްތުކުރަން. އަދި ލާއިންސާނީ ގޮތެއްގައި ހާޖީންނާއިމެދު ކަންކަން ކޮށްފައިވާތީ އެކަންކަން ބަލައި ފިޔަވަޅު އެޅުމަށް މަޖްލީހަށާއި އެޗްއާރްސީއެމަށް ހުށަހަޅަން ގަސްތުކުރަން," ނިޒާމު ބުންޏެވެ.

ނިޒާމުގެ ތުހުމަތުތަކަށް ރައްދުދީ, ހައްޖު ކޯޕަރޭޝަނުގެ މެނޭޖިން ޑިރެކްޓަރު މުހައްމަދު ޝަކީލް ވަނީ އޭނާގެ ޕޯސްޓަށް ކޮމެންޓުކޮށްފަ އެވެ.

ޝަކީލް ތުހުމަތު ކުރެއްވި ގޮތުގައި ނިޒާމު އެފަދަ ތުހުމަތުތަކެއް ކުރީ އޭނާގެ ބައްޕަ ހައްޖަށް ދާން ލިބުނު ފުުރުސަތުގައި ނިޒާމްގެ ބައްޕައަށް އެހީތެރިވުމަށް ހައްޖު ކޯޕަރޭޝަންގެ އެހީތެރިންގެ ގޮތުގައި ނިޒާމްގެ ދެ ކަނބަލުންނަށް ބައިވެެރިވުމުގެ ފުރުސަތަށް އެދުމުން, އުސޫލުގެ ބޭރުން އެ ފުރުސަތު ނުދެވޭނެ ކަމަށް ބުނުމުން ކަމަށެވެ.

ޝަކީލް ވިދާޅުވި ގޮތުގައި ހައްޖު ކޯޕަރޭޝަންގެ އެހީތެރިންނަކީ ހުރިހާ ހައްޖުވެރިންނަށް ހިދުމަތް ކުރުމަށް އަންނަ ބަޔަކަށް ވާއިރު ވަކި މީހަކަށް އެހީތެރިވާން އަތުވެއްޖެނަމަ ހިދުމަތް ކޮމްޕްރޮމައިޒް ވާނެ އެވެ.

"ހައްޖު ކޯޕަރޭޝަނުން އިއުލާން ކުރި ބިޑަކަށް ނިޒާމް ކުރިމަތިލުމަށްޓަކާ އަޅުގަނޑަށް ކޮންޓެކްޓް ކުރުމުން އެއީވެސް އޯޕަން ބިޑެއް ކަމަށް ބުނެ ކޮރަޕްޝަނަށް އަޅުގަނޑުވާނީ ދެކޮޅު ހަދާފައި," ޝަކީލް އިތުރަށް ވިދާޅުވި އެވެ.

މި ސަބަބާހުރެ ނިޒާމްގެ ބައްޕަގެ ބަދަލުގައި މި އަހަރު ހައްޖަށް އައިސް ހުރެ ކޮޕަރޭޝަންގެ މެނޭޖްމަންޓަށް އެކި ކަހަލަ ތުހުމަތުތަައް ކުރަމުންދާއިރު, ނިޒާމް އަވަހަށް ތައުބާވެ ހަގީގަތާ ހިލާފް ވާހަކަ ދެއްކި ކަމަށްޓަކާ ރައްޔިތުންގެ ކިބައިން މައާފަށް އެދުމަސް ވެސް ޝަކީލް ވަނީ އެދިފަ އެވެ. އަދި ނިޒާމާއެކު ދެއްކި ވާހަކަތަކުގެ ސްކީންޝޮޓް ހުރިކަން ޝަކީލް ވިދާޅުވި އެވެ.