ލައިޕްޒިގް (ޖޫން 18) - ޕޯޗުގަލް އިން މި ފަހަރުގެ ޔޫރޯ ފުޓުބޯޅަ މުބާރާތައް ދިޔައީ ހަތް ޖާޒީ ހިފައިގެން ފައިނަލް ކުޅުމުގެ އަޒުމުގައި ކަމަށާއި، މިރޭގެ މެޗަކީ އެ ޓީމުން ވި ތައްޔާރީތައް އާންމުންނަށް ދައްކާލާނެ މެޗު ކަމަށް ޕޯޗުގަލްގެ ކޯޗު ރޮބާޓޯ މާޓިނޭޒް ބުނެފި އެވެ.

މިރޭ ޗެކް ރިޕަބްލިކާ ދެކޮޅަށް ނުކުންނަ މެޗުގެ ކުރިން ޕޯޗުގަލްގެ ކޯޗު މާޓިނޭޒް ބުނީ, ޕޯޗުގަލް އިން މުބާރާތައް ނުކުންނަނީ, ބޮޑު ހުވަފެނެއް ދެކި އެ ކަން ހަގީގަތަކަށް ހެދުމަށް ކަމަށެވެ. އަދި ބޮޑުކޮށް ހުވަފެން ދެކިގެން ނޫނީ ކާމިޔާބު ނުވާނެ ކަމަށް މާޓިނޭޒް ގަބޫލުކުރެ އެވެ.

ކުރިން ބެލްޖިއަމްގެ ކޯޗަކަށް ހުރި، މާޓިނޭޒް ބުނީ ޕޯޗުގަލް ޓީމުން ޔޫރޯ އަށް ދިޔައީ ހަތް ޖާޒީ ހިފައިގެން ކަމަށެވެ. އެއީ ފައިނަލަށް ދިއުމަކީ، ޕޯޗުގަލް ޓީމުގެ ޓާގެޓް ކަމަށާއި, އެ ހިސާބައް ދިޔުމުގެ ފެންވަރު އޭނާގެ ޓީމުގައި އެބަހުރި ކަމަށެވެ.

"އަހަރެމެން ފޮށި ތަންމަތި ޕެކް ކުރީ ތިން ޖާޒީ ހިފައިގެންނެއް ނޫން. ހަތް ޖާޒީ ހިފައިގެން މުބާރާތައް މި ނުކުންނަނީ" މާޓިނޭޒް ބުންޏެވެ.

މާޓީނޭޒް އެ ފާހަގަކުރި ތިން ޖޯޒީގެ ވާހަކަ އަކީ ގްރޫޕް ސްޓޭޖުގައި ތިން މެޗު ކުޅެފައި ކަޓައިގެން ދިއުމަށް އުންމީދުނުކުރާކަން ދައްކުވައިދިނުމަށެވެ.

ޔޫރޯ ކޮޮލިފިކޭޝަނުގައި ޕޯޗުގަލް އަކީ އެންމެ ކާމިޔާބު ޓީމެވެ. އެ ޓީމުން ވަނީ ކޮލިފިކޭޝަނުގައި މެޗަކުން ބަލިނުވެ، ކޮލިފިކޭޝަން ނިންމާލައިފަ އެވެ. އަދި ކޮލިފިކޭޝަނުގައި އެ ޓީމުން ވަނީ 36 ގޯލު ޖަހައިފަ އެވެ. މިއީ، މި ފަހަރުގެ ކޮލިފިކޭޝަނުގައި ޓީމަކުން ކާމިޔާބުކުރި އެންމެ ގިނަ ގޯލުވެސް މެ އެވެ.

ޕޯޗުގަލް އިން މިފަހަރުގެ މުބާރާތައް ނުކުންނައިރު, އަދިވެސް އެ ޓީމުގެ ތަރިއަކީ ކްރިސްޓިއާނޯ ރޮނާލްޑޯ, 39 އެވެ.

ރޮނާލްޑޯ ވަނީ ކޮލިފިކޭޝަނުގައި އެކަނިވެސް 10 ގޯލު ޖަހައިފަ އެވެ. އެކަމަކު، ސައުދި އަރަބިއްޔާގައި ކުޅެމުން އަންނަ ރޮނާލްޑޯ އަށް ޕޯޗުގަލް ޓީމުން ފުރުސަތު ދިނުމުން އެކަމަށް ފާޑުކިޔުން ވަނީ އަމާޒުވެފަ އެވެ.

މި ކަމަށް ރައްދުދެމުން މާޓިނޭޒް ބުނީ ރޮނާލްޑޯ ޓީމަށް އެރީ ރަނގަޅު ޕާފޯމެންސް އެއް މި ސީޒަނުގައި ދައްކާފައިވާތީ ކަމަށެވެ. އެގޮތުން ރޮނާލްޑޯ ވަނީ މި ސީޒަނުގައި އެކަނިވެސް 51 ގޯލު ޖަހާފައި ކަމަށް މާޓިނޭޒް ބުންޏެވެ.

ޕޯޗުގަލް އިން ވަނީ އެންމެ ފަހުން ޗެކް ރިޕަބްލިކާ ދެކޮޅަށް ކުޅުނު ހަތަރު މެޗުން ވެސް މޮޅުވެފަ އެވެ. މިރޭގެ މެޗު ފަށާނީ 12 ޖަހާއިރު އެވެ.