ކ. ތިލަފުށީގައި ހުރި ގުދަނެއްގައި އަލިފާނުގެ ހާދިސާއެއް ހިނގައިފި އެވެ.

ރޯވި ގުދަނަކީ "ރާއްޖެ ލޮޖިސްޓިކްސް" ކުންފުނީގެ ގުދަނެކެވެ. އެ ގުދަނުގައި ރޯވި އަލިފާން، އެމްއެންޑީއެފް މާލޭ އޭރިއާ ކޮމާންޑް، ތިލަފުށި ފަޔާ ސްޓޭޝަނުގެ ފަޔާމަނުން ހަރަކާތްތެރިވެ ވަނީ ނިއްވާލައިފަ އެވެ.

މި ހާދިސާގެ ރިޕޯޓު ލިބުމާއެކު، އެމްއެންޑީއެފް މާލޭ އޭރިއާ ކޮމާންޑް، ތިލަފުށި ފަޔާ ސްޓޭޝަނުގެ ފަޔާ ފައިޓަރުން ވަނީ އެ ސަރަހަށްދަށް ގޮސް އަލިފާން ނިއްވުމުގެ މަސައްކަތް ކޮށްފަ އެވެ. ހާދިސާގެ ރިޕޯޓު ލިބުނީ މިއަދު 14:35 ހާއިރު ކަމަށް އެންއެންޑީއެފުން ބުނެ އެވެ.

ފަޔާ ފައިޓަރުން ކުރި މަސައްކަތުން ގުދަނުގައި ރޯވި އަލިފާން ނިއްވާލެވުނީ މިއަދު 15:35 ހާއިރު އެވެ.

މި ހާދިސާގައި ގުދަނުގައި ހުރި ހާޑްވެއާ ސާމާނު ބޭނުން ނުކުރެވޭ ވަރަށް ހަލާކުވެފައި ވާއިރު، އެއްވެސް މީހަކަށް އަނިޔާއެއް ލިބިފައި ނުވާ ކަމަށް ވެސް އެމްއެންޑީއެފުން މައުލޫމަތު ދެ އެވެ.